ދައުލަތުގެ މަގާމުތަކަށް އައްޔަންކުރާ މީހުންނަކީ ޤާބިލު ބައެއްކަމަށް ކަނޑައެޅުން މިއަދު ވާޖިބުވެއްޖެ: ސަލީމް
ސަރުކާރުން ދައުލަތުގެ މަގާމުތަކަށް އައްޔަނުކުރާ ބޭފުޅުންނަކީ އެ ކަމަށް ގާބިލް ބޭފުޅުންކަން ކަށަވަރު ކުރުމަކީ މިއަދު ކޮންމެހެންވެސް ކުރުން ވާޖިބު ކަމެއް ކަމުގައި ހޯރަފުށީ ދާއިރާގެ މެންބަރު އަދި މަޖިލީހުގެ ނާއިބު ރައީސް އަހުމަދު ސަލީމް ވިދާޅުވެއްޖެެއެވެ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓްގައި ހިމެނިވަޑައިގަންނަވާ ވަޒީރުންނަށް ރުހުން ދިނުމަށް މިއަދު ދައުރުން ބޭރުން ބޭއްވި ޖަލްސާގައި، ރުހުން ދިނުމާއި ގުޅޭގޮތުން ކޮމިޓީން އެކުލަވާލި ރިޕޯޓަށް ބަހުސް ކުރައްވަމުން ސަލީމް ވިދާޅުވީ، ގާނޫނު އަސާސީން ވަޒީރެއްގެ ކިބާގައި ހުރުމަށް ކަނޑައަޅާފައިވާ 5 ޝަރުތަކީ ވަރަށް އާދައިގެ ޝަރުތު ތަކެއް ކަމަށެވެ.
ގާނޫނު އަސާސީގައި އެބުނާ ފަސް ޝަރުތަކީ ވަރަށް އާދައިގެ 5 ޝަރުތު. އޭގެ ތެރޭގައި ލިޔަންކިޔަން އެނގުން ހިމެނިފައެއް ނުވޭ. އެހެން ނަމަވެސް، ގާނޫނު އަސާސީގައި ބަޔާންކޮށްފައިޗާ ވަޒީރުންގެ ވާޖިބުތަކާއި މަސްއޫލިއްޔަތު ތައް ވަރަށް ގިނަ.
އަހުމަދު ސަލީމް
ކަންމިހެން ހުރުމުން، ރައްޔިތުންގެ މަޖިލީހުން ރުހުންދޭ ވަޒީރަކީ އޭނާއާ ހަވާލުވާ ޒިންމާތައް އަދާކުރުމުގެ ގާބިލުކަން ހުރި މީހެއްތޯ ބަލަންޖެހޭ ކަމަށް ސަލީމް ވިދާޅުވި އެވެ. އަދި އެކަމަށްޓަކައި ގާނޫނަށް ވެސް ބަދަލު ގެންނަންޖެހޭ ކަމަށް އޭނާ ވިދާޅުވި އެވެ.
އަޅުގަނޑު ދެކޭގޮތުގައި ގާނޫނު އަސާސީއަށް އިސްލާހު ގެނެސްގެން ނަމަވެސް ދައުލަތުގެ އެކިއެކި މަގާމްތަކަށް އައްޔަން ކުރެވޭ ފަރާތްތަކަކީ ގާބިލު ބައެއްކަން ކަނޑައެޅުން އަޅުގަނޑުމެންގެ މައްޗަށް މިއަދު ވާޖިބު ވެއްޖެ
އަހުމަދު ސަލީމް
މީގެ އިތުރުން ސަލީމް ވަނީ، ވަޒީރުންގެ މަޖިލީހަށް، ރައީސުލްޖުމްހޫރިއްޔާ ބޭނުން މިންވަރަކަށް މެންބަރުން އައްޔަނު ކުރެވުމުގެ ބާރު ގާނޫނު އަސާސީން ރައީސުލްޖުމްހޫރިއްޔާ އަށް ދެއްވާފައިވާ ކަމަށާ، އަދި ބޭނުން މިންވަރަކަށް ވުޒާރާތައް އުފެއްދުމުގެ ބާރުވެސް އޮންނަ ކަމަށެވެ. އެހެންނަމަވެސް، އެއީ އެކަން އެގޮތަށް ކުރަންވީ ސަބަބެއް ނޫންކަމަށް އޭނާ ވިދާޅުވި އެވެ.
ސަލީމް މިފަދައިން ވިދާޅުވެ، ވަޒީރުންގެ މަޖިލީހުގެ މެންބަރުންގެ އަދަދު މަދުކުރަން ވާހަކަ ދައްކަވާފައިވާއިރު، އެމްޑީޕީއާއި އިދިކޮޅު ޑިމޮކްރެޓްސް އިން ވަނީ، ސިޔާސީ މަގާމު ތައް ލިމިޓް ކުރަން ގާނޫނަށް ބަދަލު ގެންނަން ދެ ޕާޓީން އެކުގައި މަޖިލީހުގައި މަސައްކަތް ކުރުމަށް އެއްބަސްވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
