ބަންގްލަދޭޝް: ކުރިއަށް އޮތް އެއް އަހަރުތެރޭ އިންތިޚާބު ބާއްވަނީ
ލިޔުންތެރިޔާ
ސްޓާފް ރައިޓަރ
ބަންގްލަދޭޝްގެ ވަގުތީ ސަރުކާރުން ވެރިކަންކުރާތާ މާގިނަ ދުވަސްވެއްޖެ ކަމަށް ބުނެ ގިނަ ފާޑުކިޔުންތަކެއް އަމާޒުވެފައިވަނިކޮށް، މިއަހަރުގެ ޑިސެމްބަރާއި އަންނަ އަހަރުގެ ޖޫން މަހާއި ދެމެދުގެ ތާރީޚެއްގައި އިންތިޚާބު ބާއްވާނެކަން އިއުލާންކޮށްފިއެވެ.
ބަންގްލަދޭޝްގެ ވެރިކަމާއި ވަގުތީ ގޮތުން ހަވާލުވެހުންނެވި ވިޔަފާރިވެރިޔާ މުހައްމަދު ޔޫނުސް މިކަން އިއުލާންކުރެއްވީ މިހާރު ޖަޕާނަށް ކުރައްވަމުން ގެންދަވާ ދަތުރުފުޅުގައި، ޓޮކިޔޯގައި އޮތް ބައްދަލުވުމެއްގައެވެ. އަންނަ އަހަރުގެ ޖޫންގެ ކުރިން އިންތިޚާބު އޮންނާނެކަން އިއްޔެ ޔޫނުސް އިއުލާންކުރެއްވިއިރު، އިއްޔެ ބަންގްލަދޭޝްގެ ވެރިރަށް ޑާކާގައި އިދިކޮޅު ބަންގްލަދޭޝް ނޭޝަނަލިސްޓް ޕާޓީ (ބީ.އެން.ޕީ) އިން ވަނީ ޒުވާނުންގެ ސިޔާސީ ހައްޤުތައް ސަރުކާރުން ކަށަވަރުކޮށްދިނުމަށް ގޮވާލާ ބޮޑު މުޒާހަރާއެއް ބާއްވާފައެވެ.
ޔޫނުސް ވިދާޅުވީ އިންތިޚާބުގެ ވާހަކަ އެހާ ގިނައިން ރައްޔިތުން އަހަނީ، ސިޔާސީ ބޭބޭފުޅުން އެބޭފުޅުންގެ މަޖިލިސް ގޮނޑިއަށާއި ބާރުވެރި އެހެން މަޤާމުތަކަށް އަނެއްކާވެސް އައުމަށް ކެތްމަދުވެގެން އުޅޭތީކަމަށެވެ. އަދި އިންތިޚާބު ލަސްވަމުން ދަނީ ނިޒާމީ ބަދަލުތައް ގެނައުމަށް ކުރާ މަސައްކަތް ނުނިމޭތީކަމަށާއި، އެހެންނަމަވެސް ސިޔާސީ ޕާޓީތަކަށް އެއްގަލަކަށް ނޭރިގެން ނިޒާމީ އިސްލާހުތައް ގެނައުން މާބޮޑަށް ދިގުދެމިގެން ދިޔުމަކީވެސް ހައްލެއް ނޫންކަމަށް އޭނާ ވިދާޅުވިއެވެ.
އިއްޔެ ޑާކާގައި ބޭއްވި އެއްވުމަށްފަހު ބީ.އެން.ޕީގެ ވަގުތީ ލީޑަރު ތާރިޤުއްރަޙްމާން ވިދާޅުވީ އިސްލާހުކުރަންވީ ލިޔުމުން އެކަނި ކަންކަން އިސްލާޙުކޮށްގެން ނުނިމޭކަމަށާއި، މީހުންގެ ވިސްނުން އިސްލާހުކުރަން ޖެހޭކަމަށެވެ. އޭގެ މިސާލެއް ނަންގަވަމުން އޭނާ ވިދާޅުވީ އުތުރު ކޮރެއާގެ ޤާނޫނު އަސާސީގައިވެސް ބުނަނީ އެޤައުމަކީ "ކޮރެއާ ރައްޔިތުންގެ ޑިމޮކްރެޓިކް ޖުމްހޫރިއްޔާ" ކަމަށާއި، ކަން އޮތީ ދިމާއިދިކޮޅަށްކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
