ގެސްޓްހައުސް އެޅުމަށް ހުރާއިން 25 ބިން ދޫކުރަނީ

ކ. ހުރާގައި ގެސްޓުހައުސް އެޅުމަށް، ހުރާއިން އަލަށް ހިއްކާފައިވާ ސަރަހައްދުގެ ބިމުން، ޖުމްލަ 25 ބިމެއް ކުއްޔަށް ދޫކުރުމަށް އެ ރަށު ކައުންސިލުން އިއްޔެ އިއުލާނުކޮށްފިއެވެ.

މި އިއުލާނުގައިވާ ގޮތުގައި، ގެސްޓުހައުސް އަޅަން އެ ބިންތައް ދޫކުރަނީ 50 އަހަރަށެވެ. އަދި މި 25 ބިމުގެ ތެރެއިން 8 އަށް ބިމަކަށް ކުރިމަތިލެވެނީ، ހުރާގައި ރަށްވެހިވެފައިވާ މީހުންނަށް އެކަންޏެވެ. ބާކީ 17 ބިމަކަށް ކޮންމެ މީހަކަށް ވެސް ކުރިމަތިލެވެއެވެ.

ހުރާގެ ރަށްވެހިންނަށް ދޫކުރާ 8 ބިމަށް ހުށަހަޅާ ބިޑު ފޯމެއްގެ އަގަކީ، 10،000 ރުފިޔާއެވެ. އެ ބިންތަކުގެ ބިޑު ބަލައިގަތުމަށް އެދޭ ފޯމުތައް ބަލައިގަނެ، ދޫކުރާނީ އަންނަ ހަފުތާގެ ބުދަ ދުވަހުގެ 12:30ގެ ނިޔަލަށެވެ. ބާކީ 17 ބިމުގެ ބިޑު ފޯމުގެ އަގަކީ، 25،000 ރުފިޔާއެވެ. އެ ބިންތައް ހޯދުމަށް ބިޑު ފޯމު ދޫކުރާނީ، އަންނަ ހަފުތާގެ ބުރާސްފަތި ދުވަހުގެ 12:30ގެ ނިޔަލަށް ހުރާ ކައުންސިލް އިދާރާއިން ކަމަށް މައުލޫމާތުލިބެއެވެ.

ގެސްޓްހައުސް ހެދުމަށް ދޫކުރާ އެ ބިންތަކުގެ ބީލާމާ ގުޅޭ މައުލޫމާތު ބައްދަލުވުން އޮންނާނީ، އަންނަ ހަފުތާގެ ބުރާސްފަތި ދުވަހުގެ 10:00ގައި ހުރާ ކައުންސިލް އިދާރާގެ ހުރަވީ މާލަމުގައި ކަމަށްވެސް އެރަށު ކައުންސިލުން މައުލޫމާތުދެއެވެ.

ހުރައަކީ ގެސްޓްހައުސްގެ ވިޔަފާރި ފުޅާ ދާއިރާއެއްގައި ކުރާ ރަށެކެވެ. އަދި އަލަށް ގާއިމުކުރުމަށް ހަމަޖެހިގފައިވާ ގެސްޓުހައުސްތަކުގެ ސަބަބބުން މި ވިޔަފާރި އިތުރަށް ފުޅާވާނެކަމަށް ލަފާކުރެވެއެވެ.