ޕާކިސްތާން މުބާރާތުން ވަކިވުމުން 20 އަހަރުންދަށު ސާފު ޗެންޕިއަންޝިޕްގެ ޝެޑިއުލްއަށް ބަދަލުތަކެއް

ނޭޕާލުގައި އަންނަ މަހު 18 އިން 28 އަށް ބޭއްވުމަށް ހަމަޖެހިފައިވާ 20 އަހަރުންދަށުގެ ސާފް ޗެންޕިއަންޝިޕް ފުޓްބޯޅަ މުބާރާތުން ޕާކިސްތާން ވަކިވުމާއި ގުޅިގެން މުބާރާތުގެ ޝެޑިއުލްއަށް ބަދަލުތަކެއް ގެނެސްފިއެވެ.

މިމުބާރާތުގައި ހަ ގައުމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރި ހަ ގައުމު ދެ ގުރޫޕްކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭއިރު މުބާރާތުގެ ފައިނަލް ކުޅުމަށް ހަމަޖެހިފައިވަނީ އޮގަސްޓް 28 ވަނަ ދުވަހު އެވެ.

ގުރޫޕް އޭގައި ހިމެނެނީ މުބާރާތް ބާއްވާ ގައުމު ނޭޕާލުގެ އިތުރުން ބަންގްލަދޭޝް އަދި ސްރީލަންކާ އެވެ. އަދި ގުރޫޕް ބީގައި ހިމެނެނީ އިންޑިޔާގެ އިތުރުން ބޫޓާން އަދި ދިވެހިރާއްޖެ އެވެ.

މުބާރާތުގައި ޝެޑިއުލްއަށް ގެނެވުނު ބަދަލާއެކު ރާއްޖޭގެ ޒުވާން ގައުމީ ޓީމު ކުޅޭ ފުރަތަމަ މެޗުގައި އޮގަސްޓް މަހުގެ 21 ވަނަ ދުވަހު ރާއްޖޭ ގަޑިން ހަވީރު 16:00 ގައި ބޫޓާން އާއި ދެކޮޅަށް ނުކުންނައިރު، އޮގަސްޓް މަހުގެ 23 ވަނަ ދުވަހު ރާއްޖޭ ގަޑިން ހަވީރު 16:00 ގައި ކުޅޭ ދެވަނަ މެޗުގައި ދިވެހި ޓީމު ނުކުންނާނީ އިންޑިޔާއި ދެކޮޅަށެވެ.