12 ކިލޯ މަސްތުވާތަކެއްޗާއެކު ދެ ދިވެހިން ބެންކޮކުން ހައްޔަރުކޮށްފި

ގިނަ އަދަދެއްގެ ކްރިސްޓަލް މެތް އަދި ކެނެބިސްއާއެކު ދިވެހި ދެ ފިރިހެނުން ތައިލެންޑުގެ ވެރިރަށް ބެންކޮކުން ހައްޔަރުކޮށްފިއެވެ. ބެންކޮކުގެ ނޫސްތަކުން ރިޕޯޓްކޮށްފައިވާ ގޮތުގައި މި މައްސަލައިގައި ހައްޔަރުކޮށްފައިވަނީ އުމުރުން 46 އަހަރުގެ އަލީ ރަޝީދު އަދި 34 އަހަރުގެ މުޙައްމަދު ވިސާމް އެވެ.

މި ދެ މީހުން ހައްޔަރުކޮށްފައިވަނީ ޕްރަތުނާމް ސަރަޙައްދުގައި ހުންނަ ކާގޯ ޚިދުމަތްދޭ ތަނަކަށް ޓޭޕް އަޅައި ބަންދުކޮށްފައިވާ ބޮޑެތި ފޮށިގަނޑުތަކެއް އެ ދެމީހުން ގެނައުމުން އެއާމެދު ޝައްކު އުފެދިގެން، އޮކްޓޫބަރު 5 ވަނަ ދުވަހު ފުލުހުންނަށް ލިބުނު މަޢުލޫމާތަކާ ގުޅިގެން ހިންގި ތަޙުގީގަށް ފަހުގައެވެ.

އެގޮތުން، ފޮށިތައް ވަރަށް ބާރަށް ޓޭޕް އަޅައި ބަންދުކޮށްފައި ހުރި ނަމަވެސް، އެ ފޮށިތަކުން ގަދަވަހެއް ދުވާތީ، އެއީ ޤާނޫނާ ޚިލާފު އެއްޗެއް ކަމަށް ޝައްކުކޮށް ކާގޯ އޮފީހުގެ މުވައްޒަފުން ވަނީ އެ ތަކެތި އަނބުރާ ގެންދިއުމަށް އެމީހުންނަށް އެންގުމަށްފަހު ފުލުހުންނަށް ރިޕޯޓްކޮށްފައެވެ.

ތަޙުގީގު ޓީމުން ބެލިބެލުމުން އެ ފޮށިތައް ދެން ފެނިފައިވަނީ ރަޗަތޭވީ ޑިސްޓްރިކްޓްގެ ސޮއި ޕެޗްބުރީ 11 ގައި ހުންނަ ޑޯމިޓަރީއެއްގެ ތިރީގައި ބަހައްޓާފައި ހުއްޓައެވެ. އެއީ އެހެން ކުންފުންޏެއް މެދުވެރިކޮށް އެ ތަކެތި ފޮނުވުމަށް ތައްޔާރުކޮށްފައި ކަމަށް ބެލެވޭ ކަމަށާ، އެ ސަރަޙައްދު ފުލުހުން މޮނިޓަރ ކުރަމުން ދަނިކޮށް، މި ދެމީހުން ޓުކްޓުކެއް ގެނެސްގެން އެ ފޮށިތައް އަރުވަން އުޅެނިކޮށް ފުލުހުން ވަނީ އެ ދެ މީހުން ހުއްޓުވައި ފޮށިތައް ފާސްކޮށްފައެވެ.

ފުލުހުން އެ ފޮށިތައް ބަލައި ފާސްކުރިއިރު، ސްޓެއިންލެސް ސްޓީލް އިންސިއުލޭޓެޑް 8 ތަށީގެ ތެރޭގައި ފޮރުވާފައި ހުރި ޖުމްލަ 2.37 ކިލޯގްރާމްގެ ކްރިސްޓަލް މެތް ފެނިފައިވާ ކަމަށާ، ކޮންމެ ތައްޓެއްގެ ތެރޭގައި ގާތްގަނޑަކަށް 200 އާއި 300 ގްރާމާ ދެމެދުގެ މެތް ރައްކާކޮށްފައި ހުރި ކަމަށް ބެންކޮކުގެ ނޫސްތަކުން ރިޕޯޓްކޮށްފައިވެއެވެ.

މީގެ އިތުރުން، ކުޑަކުދިންގެ އަންނައުނުތަކެއްގެ ތެރޭގައި އޮޅައި ޓޭޕް އަޅާފައި ހުރި ގާތްގަނޑަކަށް 10 ކިލޯގްރާމްގެ ކެނެބިސް ވެސް ވަނީ ފެނިފައިވާ ކަމަށާ، މި މަސްތުވާތަކެތި ފޮރުވާފައި ހުރީ އާދައިގެ މުދާ ހުރި ފޮއްޓެއްހެން ހީވާ ގޮތަށް، ކުޑަކުދިންގެ ހެދުމާއި ކުޅޭ ކާރު ފަދަ ތަކެތީގެ ތެރޭގައި ކަމަށް ރިޕޯޓްތަކުގައި ބުނެފައިވެއެވެ.

މި މައްސަލައިގައި ފަސް ފޮށިގަނޑު ފުލުހުންގެ ބެލުމުގެ ދަށަށް ގެންގޮސް، ދެ މީހުން ވަނީ ޕަޔާތައި ޕޮލިސް ސްޓޭޝަނަށް ގެންގޮސްފައެވެ. އެ ދެ މީހުންގެ މައްޗަށް ވަނީ ހުއްދައެއް ނެތި ވިއްކުމުގެ ބޭނުމުގައި ކެޓަގަރީ 1 ގެ މަސްތުވާތަކެތި ކަމަށްވާ ކްރިސްޓަލް މެތަމްފެޓަމިން ގެންގުޅުމާއި ބެހުމުގެ ތުހުމަތު ކޮށްފައެވެ. ނަމަވެސް، އެ ދެ މީހުން ވެސް ވަނީ މި ތުހުމަތުތަކަށް އިންކާރުކޮށްފައެވެ.

އެ މީހުން ބުނެފައިވަނީ ފޮށިތަކުގައި މަސްތުވާތަކެތި ނުވަތަ ޤާނޫނާ ޚިލާފު އެއްޗެއް ހުރިކަން ނޭނގޭ ކަމަށާއި، އެއީ ރައްޓެއްސަކު އެދިގެން ފޮނުވައިދޭން އުޅުނު ތަކެތި ކަމަށެވެ. އަދި ފުރަތަމަ ކާގޯ ކުންފުނިން އެ ފޮށިތަކުން ވަސްދުވާތީ ބަލައިނުގަނެ އަނބުރާ ގެންދަން އެންގުމުން އެ ތަކެތި ހުރުމަށް ހަމަޖެހިފައިވާ ތަނުގައި ބެހެއްޓީ ކަމަށްވެސް އެމީހުން ބުނެފައިވެއެވެ.

ތައިލެންޑުގެ ފުލުހުން މިހާރު ދަނީ މި ދެ މީހުންނަކީ ބައިނަލްއަޤްވާމީ މަސްތުވާތަކެތީގެ ވިއުގައަކާ ގުޅުން އޮތް ބައެއްތޯ ބެލުމަށާއި، މި ކަމުގައި ބައިވެރިވާ އެހެން މީހުން ހޯދުމަށް އިތުރު ތަޙުގީގުތައް ހިންގަމުންނެވެ.