މެދުއިރުމަތީގައި ދިރިއުޅޭ ދިވެހިންގެ ހާލު މި އަންނަނީ ބަލަމުން: ޑރ. ޚަލީލް

މެދުއިރުމަތީގެ މަސްރަހު ގޯސްވެފައިވާ މި ދަނޑިވަޅުގައި، އެ ސަރަހައްދުގައި ދިރިއުޅެމުން އަންނަ ދިވެހިންގެ ހާލު ވަރަށް ގާތުން ބަލަމުން ކަމަށް ފޮރިން މިނިސްޓަރު ޑރ. އަބްދުﷲ ޚަލީލް ވިދާޅުވެއްޖެއެވެ.

ޑރ. ޚަލީލް މިހެން ވިދާޅުވެފައި މިވަނީ މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން އެކްސްގައި ކުރެއްވި ޕޯސްޓެއްގައެވެ. އިޒްރޭލުން އިސްވެހުރެ އީރާނަށް ހަމަލާ ދިނުމާއި ގުޅިގެން މި މަހުގެ 13 ވަނަ ދުވަހުން ފެށިގެން މެދުއިރުމަތީގެ ހާލަތުވަނީ ކުރިއަށްވުރެ ގޯސްވެފައެވެ.

ޑރ. ޚަލީލް އެކްސްގައި ކުރެއްވި ޕޯސްޓެއްގައި ވިދާޅުވެފައިވާ ގޮތުގައި ދިވެހިރާއްޖޭގެ ސަރުކާރުން އަންނަނީ ޑިޕްލޮމެޓިކް އޮފީސްތައް މެދުވެރިކޮށް މެދުއިރުމަތީ ޤައުމުތަކުގައި ދިރިއުޅެމުން އަންނަ ދިވެހިންގެ ހާލު ވަރަށް ގާތުން ބަލަމުންކަމަށާއި، ހަމަނުޖެހުން އުފެދިފައިވާ ޤައުމުތަކާއި ވައިގެ ސަރަހައްދު ބަންދުކޮށްފައިވާ ޤައުމުތަކުގެ ސަރުކާރުން ދެއްވާ ލަފަޔާ އިރުޝާދާއި އެއްގޮތަށް އަމަލުކުރުމަށް ވަޒީރު ވަނީ އިލްތިމާސްކުރައްވާފައެވެ.

ރޭގެ ވަގުތެއްގައި އީރާނުން ވަނީ ގަތަރުގައި ހުންނަ އެމެރިކާގެ އަސްކަރީ މަރުކަޒަކަށް ވެސް ހަމަލާތަކެއް ދީފައެވެ. އީރާނުން ގަތަރުގައި ހުންނަ އެމެރިކާގެ އަސްކަރީ މަރުކަޒަށް ހަމަލާ ދީފައިމިވަނީ އެމެރިކާއިން، އީރާންގެ ނިޔުކްލިއަރ ފެސިލިޓީސްތަކަށް ހަމަލާދިނުމުގެ ސަބަބުން އެކަމުގެ ރައްދެއްގެ ގޮތުންނެވެ.

އީރާނުން ޤަތަރުގައި ހުންނަ އެމެރިކާގެ އަސްކަރީ މަރުކަޒަށް ދިން ހަމަލާއާއި ގުޅިގެން މެދުއިރުމަތީގެ ބައެއް ޤައުމުތަކުން ވައިގެ ސަރަހައްދު ވަގުތީ ގޮތުން ބަންދު ކޮށްފައިވީ ނަމަވެސް، މުހިއްމު ބައެއް ފްލައިޓުތައް ޖެއްސުމުގެ ހުއްދަ ދީފައިވާ ކަމަށް މީޑިޔާތަކުން ރިޕޯޓުކޮށްފައިވެއެވެ.