ހުޅުމާލޭގެ ލަގްޒަރީ އެޕާޓްމެންޓުތަކުގެ ވެރިންގެ ލިސްޓެއް ހޯދާ އޭސީސީއިން ތަހުގީގެއް ހިންގަންޖެހޭ: އަޒާން

ހުޅުމާލޭގެ ލަގްޒަރީ އެޕާޓްމެންޓުތަކުގެ ވެރިންގެ ލިސްޓެއް ހޯދާ އޭސީސީއިން ތަހުގީގެއް ހިންގަންޖެހޭކަމަށް ހިތަދޫ މެދު ދާއިރާގެ މެންބަރު އަހުމަދު އަޒާން ވިދާޅުވެއްޖެއެވެ.

އަޒާން މިހެން ވިދާޅުވީ، ކުރީގެ ސްޓޭޓް މިނިސްޓަރ ޒިފްލީނާ ހަސަން އޭނާގެ ދަރިފުޅު އައިޝަތު މިސްކްގެ ނަމުގައި ހުޅުމާލެއިން 3.8 މިލިއަން ރުފިޔާއަށް ފްލެޓެއް ގަނެފައިވާކަމަށް ނޫހަކުން ރިޕޯޓް ކުރުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ.

އެގޮތުން އަޒާން ވިދާޅުވީ، ކުށްކޮށްގެން ހޯދާ ފައިސާ ރިއަލްއެސްޓޭޓަށް އިންވެސްޓް ކުރުމަކީ މިހާރު ވަރަށް އާންމުކަމެއް ކަމަށެވެ.

ހުޅުމާލޭގެ ލަގްޒަރީ އެޕާޓްމެންޓުތަކުގެ އޯނަރުންގެ ލިސްޓެއް ހޯދާ އޭސީސީއިން ތަހުގީގެއް ހިންގަންޖެހޭ.

އޮންލައިން ނޫހުން ބުނެފައިވާ ގޮތުން، ޒިފްލީނާގެ ދަރިފުޅަށް ގަތް މި ފްލެޓަކީ އާރްސީސީއިން ހުޅުމާލޭގައި ތަރައްގީކުރި ބްލޫ ހެވަން ރެސިޑެންސްއިން ގަނެފައިވާ ފްލެޓެކެވެ. އަދި އާންމުކޮށް 3.2 މިލިއަނަށް ވިއްކާ ފްލެޓް 3.8 މިލިއަނަށް ގަތީ ފްލެޓަށް ބައެއް ބަދަލުތައް ގެންނަން ބޭނުންވުމުން އެ ބަދަލުތައް ގެނެސްގެންކަމަށްވެސް ބުނެފައިވެއެވެ.

މީގެ އިތުރުން އެ ނޫހުގައި ބުނެފައިވާ ގޮތުގައި، ޒިފްލީނާ އޭނާގެ ދަރިފުޅުގެ ނަމުގައި ގަތް ފްލެޓަށް ފައިސާ ދައްކާފައިވަނީ ޒިފްލީނާ ސްޓޭޓް މިނިސްޓަރަކަށް ހުރިއިރު 2022 ވަނަ އަހަރުއެވެ.

ޒިފްލީނާގެ ދަރިފުޅަށް އެޕާޓްމަންޓެއް ގަނެފައިވާއިރު، ޒިފްލީނާ އަމިއްލައަށްވެސް އެފްޑަބްލިއު ރެސިޑެންސްއިން 3.5 މިލިއަން ރުފިޔާއަށް ފްލެޓެއް ގަތް މައްސަލައެއް ދާދިފަހުން ވަނީ ފެންމަތިވެފައެވެ. މި މައްސަލަ މިހާރު އެންޓި ކޮރަޕްޝަން ކޮމިޝަން (އޭސީސީ) އިން ދަނީ ތަހުގީގު ކުރަމުންނެވެ.

ޒިފްލީނާ އާއި އޭނާގެ ދަރިފުޅު ގަތް ދެ ފްލެޓްގެ ޖުމްލަ އަގު 7.3 މިލިއަން ރުފިޔާއަށް އަރައެވެ.