ލީބިޔާ ބަލިކޮށް އަރަބި ކަޕަށް ފަލަސްތީން ކޮލިފައިވެއްޖެ

ފީފާ އަރަބި ކަޕް ކޮލިފައިން މެޗުގައި ލީބިޔާގެ މައްޗަށް ފަލަސްތީނު ކުރި ހޯދައިއެ މުބާރާތުން ޖާގަ ކަށަވަރުކޮށްފިއެވެ.

އަރަބި ކަޕް ކޮލިފައިންގައި އިއްޔެ ފަލަސްތީނާއި ލީބިޔާ ވާދަކުރި މެޗުން ފަލަސްތީން ކުރިހޯދާފައިވަނީ 3-4 ގެ ނަތީޖާ އަކުންނެވެ. މިއީ މެޗުގެ ފުރިހަަމަ ވަގުތު ހަމަވެގެން ދިޔައިރުވެސް ދެ ޓީމުން ކުރެ އެއްވެސް ޓީމަކަށް ގޯލެއް ކާމިޔާބު ކުރެވިފައި ނުވުމުން މެޗުގެ ނަތީޖާ ނެރުމަށް ޕެނަލްޓީ ޖަހައިގެން ހޯދި ކާމިޔާބީއެކެވެ.

އަންނަ ޑިސެމްބަރު މަހު ފެށުމަށް ހަމަޖެހިފައިވާ ފީފާ އަރަބް ކަޕްގައި ފަލަސްތީނު ހިމެނެނީ ގުރޫޕް އޭގައެވެ. މި ގުރޫޕުގައި ދެން ހިމެނެނީ މުބާރާތް ބާއްވާ ގައުމު ކަމަށްވާ ގަތަރާއި ޓިއުނީޝިއާގެ އިތުރުން ސީރިއާއެވެ.

ފަލަސްތީނުގެ ކޯޗު އިހަބް އަބޫ ޖަޒަރު، މި މެޗަށްފަހު ވާހަކަ ދައްކަމުން ބުނީ އެހެން ޓީމު ތަކާއި ފަލަސްތީނުގެ ޓިމާއި ވަރަށް ތަފާތު ކަމަށެވެ. އެއީ އެހެން ޓީމު ތަކުން ނިކުންނަނީ ވާދަވެރި ކުޅުމެއް ކުޅެން ނަމަވެސް ފަލަސްތީނުން މެޗަށް ނިކުންނަނީ އެގައުމުގައި ހަނގުރާމައިގެ ސަބަބުން މާޔޫސް ވެފައިވާ ރައްޔިތުންނަށް ކުޑަ ނަމަވެސް ހިތްހަމަ ޖެހުމެއް ފުޓްބޯޅައިން ގެނެސްދިނުމަށް ކަމަށެވެ.

"އަހަރެމެން މި ކުޅެނީ ހަމައެކަނި ޓްރޮފީއެއް ހޯދާކަށް ނޫން، އަހަރުމެން މި ކުޅެނީ ފަލަސްތީނުގެ ރައްޔިތުންނަށް އުފާވެރި ކަމެއް ގެނެސްދޭން"

ފަލަސްތީނުގެ ކޯޗު އިހަބް އަބޫ ޖަޒަރު

ފަލަސްތީނުގެ ކޯޗު ބުނި ގޮތުގައި އެ ޓީމުން އަންނަނީ ކުޅުން އިތުރަށް ރަނގަޅު ކުރަމުންނެވެ. އަދިި މިހާރު ފަލަސްތީނަކީ ފުޓްބޯޅައިގައި އޭޝިއާގެ ވަރުގަދަ ނަމަކަށް ހެދިއްޖެ ކަމަށް ގަބޫލުކުރާކަން ކޯޗުވަނީ ބުނެފައެވެ. މި އަހަރުގެ ޑިސެންބަރު 1-18 އަށް ކުރިއަށްދާ ފީފާ އަރަބި ކަޕުގެ އިތުރަށް ފަލަސްތީނުގެ ޓީމުމް ވަނީ 2027 ވަނަ އަހަރުގެ އޭޝިއަން ކަޕުންވެސް ޖާގަ ހޯދާފައެވެ. މިއާއިއެކު މި ޓީމުގެ ކޯޗު ބުނީ ވޯލްޑް ކަޕް ކޮލިފައިން އާ ގާތަށް ވެސް މިހާރު ފަލަސްތީނަށް އާދެވިފައިވާ ކަމަށް ގަބޫލުކުރާކަމަށެވެ.