ތިމަރަފުށީ މުސްތަފާ އެމްޑީޕީއަށް ސޮއިކުރައްވައިފި

ރައްޔިތުންގެ މަޖިލީހުގެ ތިމަރަފުށީ ދާއިރާގެ އިއްޒަތްތެރި މެންބަރު މުހައްމަދު މުސްތަފާ އެމްޑީޕީއަށް ގުޅިވަޑައިގަންނަަވައިފިއެވެ.

މިރޭގެ ވަގުތެއްގައި އެބޭފުޅާ އެމްޑީޕީއަށް ސޮއިކުރެއްވިއިރު، އެބޭފުޅާގެ މެންބަރޝިޕް ފޯމާއި ހަވާލުވެ ވަޑައިގެންނެވީ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދެވެ. މިއީ މުސްތަފާ އެމްޑީޕީއަށް ގުޅިވަޑައިގެންނެވި ދެވަނަ ފަހަރެވެ.

މިހިނގާ ރައްޔިތުންގެ މަޖިލީހުގެ ދައުރަށް މުސްތަފާ އިންތިހާބު ވެވަޑައިގަންނަވާފައިވަނީވެސް އެމްޑީޕީގެ ޓިކެޓެއްގައެވެ. ނަމަވެސް ހޮވިވަޑައިގަތުމަށްފަހު އެބޭފުޅާ ވަނީ އޭރު ވެރިކަންކުރަމުންދިޔަ ޕީޕީއެމްއަށް ގުޅިވަޑައިގަންނަވާފައެވެ.

ޕީޕީއެމްގައި ހުންނަވަނިކޮށް މުސްތަފާގެ ރައްޔިތުންގެ މަޖިލީހުގެ މެންބަރުކަން، އެންޓި-ޑިފެކްޝަން ގާނޫނުގެ ދަށުން ގެއްލި، ފަހުން އެގޮނޑި އިޔާދަވުމާއި ހަމައަށް ހުންނެވީ ރައީސް މައުމޫން ފެކްޝަންގެ ހަރަކާތްތެރިއެއްގެ ގޮތުގައެވެ.

މުސްތަފާ މީގެކުރިން ވަނީ ކުރިއަށް އޮތް މަޖިލިސް އިންތިހާބުގައި، އެމްޑީޕީގެ ޓިކެޓެއްގައި ވާދަކުރައްވާނެކަމަށް ވިދާޅުވެފައެވެ.