ބޮޑީކެމް ގަންނަން އަނެއްކާ ވެސް ހަވާލުކުރީ ޝަރުތު ހަމަނުވި ކުންފުނީގެ ވެރީންގެ ކުންފުންޏަކާ

ފުލުހުންނަށް ބޭނުންވާ ބޮޑީ ވޯން ކެމެރާ ނުވަތަ ބޮޑީ ކެމެރާ ގަތީ އޭރު ހަވާލުކުރި ކުންފުނީގެ ޝަރުތު ހަމަނުވެގެން އެ ބީލަން ކެންސަލް ކުރުމަށް ޓެންޑާ ބޯޑުން އެންގުމުން، ހަމަ އެ ކުންފުނީގެ ވެރިން ހިމެނޭ އިތުރު ކުންފުންޏަކާއި ހަވާލުކޮށްގެން ކަމަށް މާލިއްޔަތު ކޮމެޓީން ބުނެފި އެވެ.

ކޮމިޝަނާ އޮފް ޕޮލިސް (ސީޕީ)ގެ މަގާމުގައި މުހައްމަދު ހަމީދު ކުރިން ހުންނެވިއިރު ހިންގި މި މުއާމަލާތާއި ގުޅޭ ގޮތުން މިއަދުގެ މާލިއްޔަތު ކޮމެޓީގެ ސަބް ކޮމެޓީގައި ވާހަކަފުޅު ދައްކަވަމުން މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވީ، 2021 ވަނަ އަހަރު އެންމެ ފުރަތަމަ ބޮޑީކެމް ގަންނަން ހަވާލުކުރީ ސިންގަލް ސޯސް ޕްރޮކިއުމަންޓްގެ ދަށުން، ޒެޓާ އެންޓަޕްރައިސެސް ނަމަކަށް ކިޔާ ކުންފުންޏަކަށް ކަމަށެވެ.

ނާޒިމް ވިދާޅުވި ގޮތުގައި އެ ފަހަރު ސިންގަލް ސޯސްގެ ދަށުން އެ ކުންފުންޏާއި ހަވާލުކުރީ 1400 ބޮޑީ ކެމް ގަތުމަށެވެ. އެހެން ނަމަވެސް އެ ބީލަމުގައި މައްސަލަތަކެއް ހުރިކަން ޓެންޑާ ބޯޑުން ފާހަގަކޮށް، އެކަން އެ އިއުލާނު ކުރި ޕޮލްކޯއަށް އެންގުމުން އެކަން ހުއްޓުނީއެވެ.

އެގޮތުން އޭރު ޓެންޑާ ބޯޑުން ފާހަގަކުރި ކަންކަމުގެ ތެރޭގައި،  ޒެޓާ އެންޓަޕްރައިޒަސް އިން ސަޕްލަޔަ ކްރެޑިޓް ލެޓާއެއް ހުށަހެޅި ނަމަވެސް، އެ ކުންފުނީގެ މާލީ ހިސާބުތަކަށް ބަލާއިރު އެފަދަ ކަމެއް ކުރުމުގެ ގާބިލްކަން ނެތްކަން ފާހަގަކޮށްފައިވެއެވެ.

އަދި އެ ކުންފުންޏަކީ ސެކިއުރިޓީ އާއި އިލެކްޓްރޯނިކް ސާމާނު ސަޕްލައި ކުރަމުން ދިޔަ ކުންފުންޏަކަށް ނުވާތީ އެފަދަ ކަމެއް ކުރުމުގެ ފަންނީ ގާބިލުކަން ވެސް ޒެޓާގައި ނެތް ކަމަށް ޓެންޑާ ބޯޑުން އޭރު ފާހަގަކޮށްފައި ވެސް ވެއެވެ.

ޓެންޑާ ބޯޑުން އެހެން ނިންމުމުން، އެ ބީލަން ކެންސަލްކޮށް 200 ބޮޑީކެމްގަންނަން އަލުން ބީލަމަށް ޕޮލްކޯ އިން ހުޅުވާލިއެވެ. އެ ބީލަމަށް ތިން ފަރާތަކުން ކުރިމަތިލިއިރު، އޭގެ ތެރެއިން އެ ބީލަން އެވޯޑުކުރީ، ސިންގަލް ސޯސްކޮށް ކުރިން އެވޯޑުކުރި ޒެޓާ އެންޓަޕްރައިސެސްގެ ވެރިން ހިމެނޭ އެހެން ކުންފުންޏެއް ކަމުގައިވާ ޒެޓާ ޓެކްނޮލޮޖީއާއެވެ.

އެކަންތަކާއި ގުޅިގެން އެ މައްސަލަ އެންޓި ކޮރަޕްޝަން ކޮމިޝަނުން ވެސް ބެލިއެވެ.

ފާހަގަކުރެވޭ ގޮތުގައި، އެ ކުންފުންޏަކީ އޭރުގެ ޕޮލިސް ކޮމިޝަނަރު މުޙައްމަދު ހަމީދު ފުލުހުންގެ ޚިދުމަތުން ރިޓަޔާކުރުމަށް ފަހު އެ ކުންފުނީގެ މަގާމަކަށް ވަޑައިގެންނެވި ކުންފުންޏެވެ. އެކަމާއި ގުޅިގެން ވެސް މީގެ ކުރިން މަޖިލީހުގެ ކޮމެޓީގައި އެ މައްސަލައިގައި ވާހަކަ ދައްކައިފައިވެއެވެ.

އެގޮތުން އެ މުއާމަލާތުގައި ޕްރޮފެޝަނަލް މިސްކޮންޑަކްޓް ނޫނީ މޯރަލް އިޝޫސް ހުރި ކަމަށް ބެލެވޭ ކަމަށް ފާހަގަކޮށް، އެކަމަކީ ގާނޫނު ތަންފީޒުކުރާ އިދާރާތަކުން އިތުރަށް ބަލަންޖެހޭ މައްސަލައެއް ކަމަށް ވެސް އެ ކޮމެޓީގައި ވަނީ ފާހަގަކޮށްފައެވެ.

ކުރީގެ ސީޕީ ހަމީދު، ދިވެހި ފުލުހުންގެ ޚިދުމަތުން ޝަރަފުވެރިކަމާއި އެކު ރިޓަޔާކުރެއްވީ 2023 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހުއެެވެ. ފުލުހުންގެ ޚިދުމަތަށް ބޮޑީ ކެމް ތައާރަފްކޮށްފައިވަނީ 2022 ވަނަ އަހަރުގެ ފެބްރުވަރީ މަހުގެ ތެރޭގައެވެ.