ވިލުފުށީ ބަނދަރުގައި އަޅާފައި އޮތް ދެ ބޯޓެއްގައި ރޯވެ އަނދަނީ، ދެމީހަކު ފިހިގެން ފަރުވާ ދެނީ
ވިލުފުށީ ބަނދަރުގައި އަޅާފައި އޮތް ދެ ތެޔޮ ބޯޓެއްގައި އަލިފާނުގެ ހާދިސާއެއް ހިނގައި، ދެމީހަކަށް އަނިޔާވެއްޖެއެވެ.
ވިލުފުށީ ކައުންސިލުން ”ވޮއިސް“ އަަށް މައުލޫމާތު ދިން ގޮތުގައި މި ހާދިސާ ހިނގާފައިވަނީ މިއަދު ހެނދުނު 9:10 ކަންހާއިރުއެވެ.
އަދި ހާދިސާގައި އެންމެ ފުރަތަމަ ރޯވީ އެއްބޯޓު ސްޓާޓް ކޮށްލި ވަގުތު ކަމަށާ، އެ ބޯޓުގައި ރޯވި އަލިފާން ޖެހިގެން ހުރި ތެޔޮ ބޯޓަށްވެސް ފެތުރި ދެ ބޯޓުގައިވެސް ރޯވެ އަނދަމުންދާ ކަމަށް ކައުންސިލުން މައުލޫމާތު ދެއެވެ.
ރޯވި ދެ ބޯޓުގެ އަލިފާންގަނޑު އަދިވެސް ނިއްވައެއް ނުލެވޭ އިރު، މި ހާދިސާގައި އަނިޔާވެފައިވަނީ، ބިދޭސީއަކާއި ދިވެއްސަކަށް ކަމަށްވެސް ބުނެފައިވެއެވެ. އެމީހުންނަށް ލިބުނު އަނިޔާގެ ތަފްސީލް އަދި ސާފެއް ނުވެއެވެ.
އަލިފާން ރޯވި ދެބޯޓަކީވެސް، ހާދިސާގައި އަނިޔާވި ދިވެހި މީހާގެ ދެ ބޯޓު ކަމަށް ވިލުފުށީ ކައުންސިލުން ވޮއިސް އަށް މައުލޫމާތު ދީފައިވެއެވެ.
މި ހާދިސާއާ ގުޅިގެން އެމްއެންޑީއެފުން ބުނީ، ފަޅުތެރޭގައި އޮތް ތެޔޮބޯޓެއްގައި އަލިފާން ރޯވެގެން، އެމްއެންޑީއެފް ސެންޓްރަލް އޭރިއާ ކޮމާންޑްގެ ފަޔަރ ކޮމްޕޯނަންޓްގެ ސިފައިން އަލިފާން ނިއްވުމުގައި ހަރަކާތްތެރިވަމުންދާ ކަމަށެވެ.
ވޮއިސް އަށް މައުލޫމާތު ލިބިފައިވާ ގޮތުގައި މިދިޔަ އަހަރުގެ ތެރޭގައިވެސް، މި ދެ ތެޔޮ ބޯޓުގެ ވެރިމީހާގެ ދެ ތެޔޮ ބޯޓެއްގައި ވަނީ އަލިފާނުގެ ހާދިސާއެއް ހިނގާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
