ބަންގްލަދޭޝް އިން ނިޕާ ވައިރަސް ފެނިއްޖެ

ބަންގްލަދޭޝްގެ އުތުރުގެ ނައޯގޯން ޑިސްޓްރިކްޓުން ނިޕާ ވައިރަހުގެ ކޭހެއް ފެނިފައިވަކަމަށް އެ ގައުމުގެ ސިއްހީ އިދާރާތަކުން ރިޕޯޓުކޮށްފިއެވެ.

މ ބަލި ޖެހުނު އަންހެން ވަނީ މިދިޔަ މަހުގެ 28 ވަނަ ދުވަހު މަރުވެފައެވެ. މި މީހާ މަރުވީ ނިޕާ ވައިރަހުންކަން ދުނިޔޭގެ ސިއްހަތު ޖަމްއިއްޔާ (ޑަބްލިއު.އެޗް.އޯ) އަށް ކަށަވަރުކުރެވިފައިވަނީ މިއަދެވެ. މިއީ 2026 ވަނަ އަހަރުގެ ތެރޭގައި އެ ގައުމުން މި ބަލީގައި މަރުވި ފުރަތަމަ މީހާއެވެ.

އުމުރުން 40 އާއި 50 އަހަރާ ދެމެދުގެ މި އަންހެން މީހާ މަރުވެފައިވަނީ ހުން އައުމާއި، ބޮލުގައި ރިއްސުންފަދަ އަލާމާތްތައް ޖެނުއަރީ 21 ހިސާބުގައި ފެނުމަށްފަހު ހާލަތު ވަރަށް ބޮޑަށް ގޯސްވުމުން، ރާޖްޝާހީ މެޑިކަލް ކޮލެޖް ހޮސްޕިޓަލުގައި ފަރުވާ ދެމުންދަނިކޮށެވެ.

ލެބޯޓްރީ ޓެސްޓުތަކުން އޭނާއަށް ބަލި ޖެހިފައިވާކަން ކަށަވަރުވުމާއެކު، އޭނާއާ ގާތުން ބައްދަލުވި މީހުން މޮނިޓަރ ކުރަން ވަނީ ފަށާފައެވެ. ޑަބްލިއު.އެޗް.އޯ އާއި ސިއްހީ އިދާރާތަކުން ބުނާ ގޮތުގައި، އޭނާއާއި ގާތުން ބައްދަލުވި 35 މީހަކު ދެނެގަނެ ޓެސްޓު ކުރެވުނު ނަމަވެސް، މިހާތަނަށް އިތުރު މީހަކު މި ބައްޔަށް ޕޮޒިޓިވްވެފައެއް ނުވެއެވެ.

ނިޕާ ވައިރަހަކީ ވާލުގެ ފަރާތުން ފެތުރޭ، ސިކުނޑި ދުޅަވުން ފަދަ ނުރައްކާތެރި މައްސަލަތައް ކުރިމަތިކުރުވާ ބައްޔެކެވެ. މި ބަލީގައި މަރުވާ މީހުންގެ ނިސްބަތް މަތި ނަމަވެސް، މިއީ އެކަކު އަނެކަކުގެ ގަޔަށް ފަސޭހައިން ފެތުރޭ ބައްޔެއް ނޫން ކަމަށް މާހިރުން ބުނެއެވެ. ބަންގްލަދޭޝްގައި ކޮންމެ އަހަރަކުވެސް ފިނި މޫސުމާ ދިމާކޮށް މި ބަލި ފެނެއެވެ.

ދުނިޔޭގެ ސިއްހަތު ޖަމްއިއްޔާއިން އަންދާޒާކުރާ ގޮތުގައި، މި ބަލި ބައިނަލްއަގުވާމީ ފެންވަރެއްގައި ފެތުރުމުގެ ނުރައްކާ ކުޑައެވެ. އަދި މިވަގުތު ދަތުރުފަތުރުކުރުމާއި ވިޔަފާރީގެ އެއްވެސް ހުރަހެއް އެޅުމަށް އެ ޖަމްއިއްޔާއިން ލަފައެއް ނުދެއެވެ. ވޭތުވެދިޔަ އަހަރުތަކުގައިވެސް ބަންގްލަދޭޝްއިން މި ބަލީގައި މީހުން މަރުވެފައިވާއިރު، ބަލި ފެތުރޭ ދުވަސްވަރު ސަމާލުވެ ތިބުމަކީ ބަލި ކޮންޓްރޯލް ކުރުމަށް މުހިންމު ކަމެއް ކަމަށް ކަމާބެހޭ ފަރާތްތަކުން ފާހަގަކުރެއެވެ.