އޭވިއޭޝަން އިންސްޓިޓިއުޓް އޮފް މޯލްޑިވްސްގެ ސަބަބުން ދާއިރާއަށް ގާބިލު މީހުން ބިނާކުރުން ހަލުވިވާނެ: ޝަރީފް
އޭވިއޭޝަން އިންސްޓިޓިއުޓް އޮފް މޯލްޑިވްސް (އެއިމް) އިފްތިތާހުކުރުމާއެކު، ރާއްޖޭގެ އޭވިއޭޝަން ދާއިރާއަށް ބޭނުންވާ ގާބިލު ފަންނީ މީހުން ބިނާކުރުމަށް ކުރެވޭ މަސައްކަތްތައް އިތުރަށް ހަލުވިވެގެންދާނެ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިން ދިރެކްޓަރު އިބްރާހީމް ޝަރީފް މުހައްމަދު ވިދާޅުވެއްޖެއެވެ.
ޝަރީފް މިހެން ވިދާޅުވީ މިއަދު ހުޅުލޭ އައިލެންޑް ހޮޓެލްގައި ބޭއްވި ޚާއްސަ ރަސްމިއްޔާތެއްގައެވެ. މިއީ އޭވިއޭޝަން އިންސްޓިޓިއުޓް ރަސްމީކޮށް އިފްތިތާހުކުރުމާއި، އެ އިންސްޓިޓިއުޓްގެ ފުރަތަމަ ދަސްވެނިވުން ފާހަގަކުރުމަށް ބޭއްވި ރަސްމިއްޔާތެކެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޝަރީފް ފާހަގަކުރެއްވި ގޮތުގައި، އެމްއޭސީއެލްއަށް ލިބެމުންދާ ކުރިއެރުންތަކުގެ އަސްލަކީ މެދުކެނޑުމެއްނެތި ތަރައްގީވަމުން އަންނަ، ގާބިލު އަދި މަސައްކަތްތެރި މުވައްޒަފުންނެވެ. އަދި އަލަށް މި ހުޅުވުނު އިންސްޓިޓިއުޓްގެ މައިގަނޑު މަގުސަދަކީ ކުންފުނީގެ މުވައްޒަފުންނަށް ބޭނުންވާ ތަމްރީނުތައް ހަރުދަނާ އޮނިގަނޑެއްގެ ތެރެއިން ފޯރުކޮށްދީ، ސަނަދު ހާސިލުކޮށްގެން ވަޒީފާގެ ކުރިއެރުން ހޯދައިދިނުން ކަމަށް އޭނާ ވިދާޅުވިއެވެ.
އޭވިއޭޝަން އިންސްޓިޓިއުޓްގެ ފުރަތަމަ ދަސްވެނިވުމުގެ ރަސްމިއްޔާތުގައި، ސެޓްފިކެޓް ލެވެލް 3 އިން 'އެއަރޕޯޓް ސެކިއުރިޓީ މެނޭޖްމަންޓް' ކޯސް ފުރިހަމަކުރި 29 ދަރިވަރަކު ވަނީ ދަސްވެނިވެ، ސެޓްފިކެޓް ހާސިލުކޮށްފައެވެ.
ރަސްމިއްޔާތު ނިންމަވާލައްވަމުން ސީއީއޯ ޝަރީފް ވަނީ ދަސްވެނިވި ހުރިހާ ދަރިވަރުންނަށް މަރުހަބާ ދަންނަވާފައެވެ. އަދި އެމްއޭސީއެލްގެ ހުރިހާ މުވައްޒަފުންވެސް މި އިންސްޓިޓިއުޓް މެދުވެރިކޮށް ލިބެން ހުރި ތައުލީމާއި ތަމްރީނުގެ ފުރުސަތުތަކުގެ ބޭނުން އެންމެ ހެޔޮގޮތުގައި ހިފުމަށް އޭނާ އިލްތިމާސް ކުރެއްވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
