ވެސްޓްހޭމް މެޗުން ލިބުނު ތިން ޕޮއިންޓާއެކު، ލީގް ހޯދުމަށް އާސެނަލް ކުރާ މަސައްކަތްތަކަށް އިތުރު ހިތްވަރެއް

އިނގިރޭސި ޕްރިމިއާ ލީގްގައި ރޭ ވެސްޓްހޭމް ޔުނައިޓެޑާއި އާސެނަލް ބައްދަލުކުރިމެޗް ހަނިގޮތަކަށް އާސެނަލް ކާމިޔާބުކޮށް ލީގް ހޯދުމަށް އެޓީމް ކުރަމުންގެންދާ މަސައްކަތްތަކަށް އިތުރު ހިތްވަރެއް ލިބިއްޖެއެވެ.

ވެސްޓްހޭމް ދަނޑުގައި ކުޅުނު މިމެޗް އާސެނަލް މޮޅުވީ 0-1 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެންދިޔަ މިމެޗްގައި ފެނިގެންދިޔަ ހަމައެކަނި ލަނޑު އާސެނަލަށް ކާމިޔާބުކޮށްދިނީ، އޮޑެގާޑް ތަނަވަސްކޮށްދިން ފުރުސަތެއްގައި ޓްރޮސާޑް އެވެ. މެޗްގައި ދެޓީމަށްވެސް ވަނީ ލަނޑުޖަހާގެ ރަނގަޅު ފުރުސަތުތައް ލިބިގެންގޮސްފައެވެ. މެޗްގައި ވެސްޓްހޭމުން ފޮނުވާލި ބައެއް ހަމަލާތައް އާސެނަލްގެ ކީޕަރު ރާޔާ ވަނީ ވަރަށް ހުށިޔާރުކަމާއެކު ދިފާއުކޮށްފައެވެ.

މެޗްގެ އިތުރު ވަގުތު ކުޅުމުގެ ތެރޭގައި ވެސްޓްހޭމުން ލަނޑެއް ޖެހުމަށްފަހު ވީއާރު ބެލުމަށްފަހު ރެފްރީ ފަހުން ނިންމީ ގޯލެއް ނޫންކަމަށެވެ. މިއީ ވީއާރު ބެލުމަށްފަހު އެހާ ގިނަ ވަގުތުން ރެފްރީ ނިންމުމެއ ްނިންމި ފުރަތަމަ ފަހަރުކަން ފާހަގަކޮށްލެވެއެވެ. އެގޮތުން ވެސްޓްހޭމުން ޖެހީ ގޯލެއް ނޫންކަމަށް ނިންމަން ހަތަރު މިނެޓަށްވުރެ ގިނަ ވަގުތު ހޭދަވިއެވެ.

މި މުހިންމު މޮޅާއެކު، އާސެނަލުން ވަނީ ތާވަލުގެ އެއްވަނައިގައި މެންޗެސްޓަރ ސިޓީގެ މައްޗަށް ފަސް ޕޮއިންޓްގެ ކުރިއެރުމެއް ހޯދާފައެވެ. ސިޓީއަށް އަތުގައި އެއް މެޗު އިތުރަށް އޮތް ނަމަވެސް، ޖެހިޖެހިގެން ތިން އަހަރު ދެވަނައިގައި ނިންމާލަން ޖެހުމަށްފަހު، މިފަހަރު ލީގު ތަށި އާސެނަލަށް މިވަނީ ވަރަށް ބޮޑަށް ގާތްވެފައެވެ.