ނޮވެމްބަރުމަހު މީރާއަށް، އާމްދަނީގެ ގޮތުގައި 2 ބިލިއަނަށްވުރެ ގިނަ ރުފިޔާ ބަލައިގަނެފި

ހުސްވި ނޮވެމްބަރުމަހުގެ ތެރޭގައި އާމްދަނީގެ ގޮތުގައި ދައުލަތުގެ ޓެކްސް އިދާރާއަށް 2 ބިލިއަނަށްވުރެ ގިނަ ރުފިޔާ ބަލައިގަނެފިއެވެ.

މޯލްޑިވްސް އިންލަންޑް ރެވެނިއު އޮތޯރިޓީ، މީރާއިން ނެރެފައިވާ ނޮވެމްބަރުމަހު ދައުލަތަށް ޓެކްސްގެ ގޮތުގައި ލިބުނު އާމްދަނީގެ ތަފާސްހިސާބަށް ބަލާއިރު އެމަހު ޖުމްލަ އާމްދަނީގެ ގޮތުގައި ވަނީ، 2.20 ބިލިއަން ރުފިޔާ ލިބިފައެވެ. މިއީ މިދިޔަ އަހަރުގެ ނޮވެމްބަރުމަހާ އަޅާބަލާއިރު 16.6 އިންސައްތަ އިތުރު އަދަދެކެވެ. މިދިޔަ އަހަރުގެ ނޮވެމްބަރުމަހު ދައުލަތަށް ލިބުނު އާމްދަނީގެ ގިޮތުގައި ލިބިފައިވަނީ 1.8 ބިލިއަން ރުފިޔާއެވެ.

މިއަހަރުގެ ނޮވެމްބަރުމަހު ލިބުނު އާމްދަނީ އަކީ ލިބޭނޭކަމަށް ލަފާކުރި އަދަދަށްވުވެ 6.7 އިންސައްތަ އިތުރު އަދަދެއްކަމަށް މީރާއިން ވަނީ ބުނެފައެވެ. ނޮވެމްބަރުމަހު ދައުލަތަށް ލިބުނު އާމްދަނީ އިތުރުވުމުގެ މައިގަނޑު ސަބަބަކީ ޓޫރިޒަމް ޖީއެެސްޓީ އާއި ގްރީންޓެކުހުގެ އިތުރުން އެއާޕޯޓް ފީގެ ގޮތުގައި ލިބުނު އާމްދަނީ އިތުރުވުމެވެ.

ނޮވެމްބަރުމަހު އާމްދަނީ ލިބުނު ދާއިރާ:

- މުދަލާ ހިދުމަތުގެ އަގުން: 1.3 ބިލިއަން ރުފިޔާ

- ގްރީން ޓެކްސް: 191 މިލިއަން ރުފިޔާ

- އެއާޕޯޓް ޑިވެލޮޕްމަންޓް ފީ: 178.8 މިލިއަން ރުފިޔާ

- ޑިޕާޗާ ޓެކްސް: 164.9 މިލިއަން ރުފިޔާ

- އިންކަމް ޓެކްސް: 131 މިލިއަން ރުފިޔާ

ހުސްވި ނޮވެމްބަރުމަހު ޓެކްސްގެ ގޮތުގައި ލިބުނު އާމްދަނީ 0.7 ބިލިއަން ރުފިޔާ އަށް އަރާއިރު ޓެކްސް ނޫން ގޮތުގައި ލިބުނު އާމްދަނީ އުޅެނީ 409.9 މިލިއަން ރުފިޔާގައެވެ.