ޖޫންމަހާ އަޅައިބަލާއިރު ޖުލައި މަހު އެމްއެމްއޭއިން ޑޮލަރު ވިއްކި އަދަދު ބޮޑުތަނުން އިތުރުވެއްޖެ

ނިމިދިޔަ ޖޫން މަހާ އަޅައިބަލާއިރު ޖުލައި މަހު އެ އޮތޯރިޓީން ޑޮލަރު ވިއްކި އަދަދު ބޮޑުތަނުން އިތުރުވެއްޖެއެވެ.

އެމްއެމްއޭގެ ތަފާސް ހިސާބުތަކުން ދައްކާގޮތުގައި ޖުލައި މަހަކީ އެމްއެމްއޭއަށް ބޭރުފައިސާ ލިބުނު ޖުމްލަ އަދަދަށްވުރެ، އެ އޮތޯރިޓީން ބޭރުފައިސާ ވިއްކި ޖުމްލަ އަދަދު އިތުރުވި މަހެކެވެ. މީގެ މައިގަނޑު ސަބަބެއް ކަމަށް ބެލެވެނީ ފާއިތުވި ޖުލައި މަހަކީ ފަތުރުވެރިކަމުގެ އޯފް-ސީޒަން ކަމަށް ވުމާއެކު، އެމްއެމްއޭއަށް ލިބުނު ބޭރުފައިސާގެ އަދަދު ދަށްވުމެވެ.

މީގެ އިތުރުން، ޖުލައި މަހަކީ ސްކޫލް ބަންދާ ދިމާކޮށް ގިނަ ބަޔަކު ރާއްޖޭން ބޭރަށް ދަތުރުކުރުމުގެ ސަބަބުން ޑޮލަރަށް އޮންނަ ޑިމާންޑް އާދަޔާޚިލާފަށް ބޮޑުވެގެން ދިޔަ މަހެކެވެ.

މިގޮތުން، އެމްއެމްއޭއިން ޖުލައި މަސް ތެރޭގައި ދަތުރުފަތުރާއި، ބޭސްފަރުވާއާއި، އުމްރާގެ ދަތުރުތަކަށް ޑޮލަރު ވިއްކި މިންވަރު ޖޫންމަހާ އަޅާބަލާއިރު %172 އަށް ވަނީ އިތުރުވެފައެވެ.

ބޭންކިންގ ނިޒާމުގެ ތެރެއިން ބޭރު ފައިސާ ލިބުން އިތުރަށް ފަސޭހަކޮށްދިނުމަށާއި، ބޭރު ފައިސާގެ ބާޒާރަށް ދިމާވެފައިވާ ދަތިތަކަށް ލުޔެއް ހޯދައިދިނުމުގެ ގޮތުން އެމްއެމްއޭއިން ވަނީ މުހިންމު ނިންމުމެއް ނިންމާފައެވެ. އެގޮތުން، ބޭންކުތަކަށް ޑޮލަރު ވިއްކާ މިންވަރު އަނެއްކާވެސް އިތުރުކުރުމަށް މި މަހުގެ 11 ވަނަ ދުވަހު ވަނީ ނިންމާފައެވެ. މި ނިންމުމުގެ ދަށުން، މި ހިނގާ ހަފްތާއިން ފެށިގެން ކުރިއަށް އޮތް ތިން ހަފްތާގެ މުއްދަތަށް ބޭންކުތަކަށް ވިއްކާ ޑޮލަރުގެ މިންވަރު އިތުރުވާނެއެވެ. މިއީ އާންމު އުސޫލުން ކޮންމެ ހަފްތާއަކު ވިއްކާ މިންވަރަށްވުރެ %51 އިތުރު އަދަދެކެވެ.

މި ބަދަލުގެ މައިގަނޑު މަޤްޞަދަކީ ވިޔަފާރިތަކުން މުދާ އިމްޕޯޓްކުރުމަށްޓަކައި ހަދަންޖެހޭ ޓީޓީ އަދި އެލްސީ ތަކަށް ބޭނުންވާ ބޭރު ފައިސާ ހޯދުމުގައި ހުރި ދަތިތައް ހައްލުކޮށްދިނުން ކަމަށް އެމްއެމްއޭއިން ހާމަކުރެއެވެ.

ރާއްޖޭގެ ރަސްމީ ރިޒަރވްގެ ހިސާބުތަކަށް ބަލާއިރު، ޖުލައި މަސް ނިމުނުއިރު ރަސްމީ ރިޒަރވް ވަނީ 686.8 މިލިއަން ޑޮލަރުން 638.0 މިލިއަން ޑޮލަރަށް ދަށްވެފައެވެ. މިއީ ގާތްގަނޑަކަށް %7 ގެ ދަށްވުމެކެވެ. ރިޒަރވްއަށް މި ބަދަލު އައިސްފައިވަނީ ބޭރުގެ ބާޒާރުން ލިބުނު ފައިސާ މަދުވުމާއި، ބާޒާރުގެ ޑިމާންޑާ އެއްވަރަށް ޑޮލަރު ދޫކުރަން ޖެހުމުގެ ސަބަބުންނެވެ.