މަހިބަދޫ ފުޓުބޯޅައިގެ ރަސްގެފާނަކީ ޖިބިއްލީކަން އަނެއްކާވެސް ސާބިތުކޮށްދީފި؛ މިފަހަރު އުފުލާލީ 13ވަނަ ތަށި

މަހިބަދޫ ފުޓުބޯޅައިގެ ރަސްގެފާނު، ޖިބިއްލީ ސްޕޯޓްސް ކްލަބުން ޒުވާނުންގެ ފުޓުބޯޅަ މުބާރާތުގެ ތަށި 13 ވަނަ ފަހަރަށް އުފުލާލައިފިއެވެ.

މަހިބަދޫ ޕެލޭ ސްޓޭޑިއަމްގައި މިއަދު ހަވީރު ކުޅެވުނު، ޒުވާނުންގެ 22 ވަނަ ފުޓުބޯޅަ މުބާރާތުގެ ފައިނަލް މެޗުގައި ވާދަކޮށްފައިވަނީ އެކްސްޕްރެސް އާއި ޖިބިއްލީ ސްޕޯޓްސް ކްލަބެވެ.

މި މެޗު 7-1 ގެ ނަތީޖާއަކުން ކާމިޔާބު ކޮށްފައިވަނީ ޖިބިއްލީ ސްޕޯޓްސް ކުލަބުންނެވެ.

މެޗުގެ ފުރަތަމަ ލަނޑު، ޖިބިއްލީއަށް ކާމިޔާބު ކޮށްދިނީ، އެ ޓީމުގެ ޖާޒީ ނަންބަރު 17 ނަސޫހުއެވެ.

1-0 ނަތީޖާއަކުން ފުރަތަމަ ހާފު ނިމިފައިވާއިރު، ދެވަނަ ހާފުގައި ޖިބިއްލީން ވަނީ ލީޑް ފުޅާކޮށްފައެވެ. އެގޮތުން މެޗުގެ 56 ވަނަ މިނެޓުގައި އެޓީމަށް ދެވަނަ ލަނޑު ކާމިޔާބު ކޮށްދިނީ ޖާޒީ ނަމްބަރު 15 އަބްދުالله މިދުހަތު ފަހުމީއެވެ. އެފަހުން މާ ގިނައިރުތަކެއް ނުވެ، ނަސޫހު ވަނީ ލީޑް އިތުރަށް ފުޅާކޮށް ނަތީޖާ 3-0 އަށް ބަދަލުކޮށްފައެވެ.

ޖިބިއްލީން ލީޑް ފުޅާކޮށްފައިވަނިކޮށް މެޗުގެ 61 ވަނަ މިނެޓްގައި އެކްސްޕްރެސް އިން ވަނީ ލަޑެއްޖަހައި ފަރަގު ކުޑަކޮށްފައެވެ. މި ލަނޑު އެ ޓީމަށް ކާމިޔާބު ކޮށްދިނީ ޖާޒީ ނަމްބަރު 20 އީނާޒެވެ.

ނަމަވެސް އޭގެ ފަހުން ޖިބިއްލީން ވަނީ އިތުރު ހަތަރު ލަނޑު ޖަހާފައެވެ. އެތަނުން އެއްލަނޑު އެ ޓީމަށް ކާމިޔާބު ކޮށްދިނީ މިދުހަތެވެ. އަނެއް ތިން ލަނޑުޖަހައި މެޗުގައި ހެޓްރިކް ހަދާފައިވަނީ ބަދަލު ކުޅުންތެރިއެއްގެ ގޮތުގައި ކުޅެން އެރި، ޒުވާން ކުޅުންތެރިޔާ، ޖިބިއްލީގެ ޖާޒީ ނަމްބަރު 14, އިޝްފާޤެވެ.

7-1 ގެ ނަތީޖާއަކުން ފައިނަލް މެޗު ނިމިގެން ގޮސްފައިވާއިރު، މި ނަތީޖާއާއެކު ޖިބިއްލީން ވަނީ މަހިބަދޫ ފުޓުބޯޅައިގެ ރަސްގެފާނަކީ އެ ޓީމުކަން އަނެއްކާވެސް ސާބިތުކޮށްދީފައެވެ. މިއީ ޖިބިއްލީން ޒުވާނުންގެ މުބާރާތުގެ ތަށި މިލްކު ކުރި ހަތަރުވަނަ ފަހަރެވެ.

އެގޮތުން، އެޓީމުން ވަނީ މިއަހަރުގެ އިތުރުން މަހިބަދޫ ޒުވާނުންގެ މުބާރާތުގެ މިހާތަނަށް ބޭއްވުނު މުބާރާތްތަކުން، 2010, 2012، 2013، 2014, 2016, 2017, 2018, 2019, 2021, 2022، 2023 އަދި 2024 ވަނަ އަހަރު ބޭއްވުނު މުބާރާތުގައި ވެސް ޗެންޕިއަންކަން ކޮށްފައެވެ. މަހިބަދޫގެ ތާރީޚްގައިވެސް ޖިބިއްލީގެ މި ކާމިޔާބީއާއި ވާދަކުރެވޭ ވަރުގެ ޓީމެއް އަދި ނެތެވެ.