މަގުތައް ހެދުމުގެ މަޝްރޫއުއާ ވިލިމާލެ ހޮސްޕިޓަލްގެ މަސައްކަތް ލަސްވެގެން އަންނަ އަހަރު ކުރީކޮޅު ފެށޭނެ: ޗައިނާ ސަފީރު
ލިޔުންތެރިޔާ
އަހުމަދު ހަމީދު އާދަމް
މާލޭގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު އާއި ވިލިމާލެ ހޮސްޕިޓަލްގެ މަސައްކަތް ލަސްވެގެން އަންނަ އަހަރު ކުރީކޮޅު ފެށޭނެ ކަމުގައި ޗައިނާ ސަރުކާރުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، ކޮންގް ޝިންހުއާ ވިދާޅުވެއްޖެ އެވެ.
ޗައިނާގެ 77 ވަނަ ޤައުމީ ދުވަސް ފާހަގަކުރުމަށް ބޭއްވި ޙަފްލާގައި ވާހަކަފުޅު ދައްކަވަމުން ސަފީރު ވިދާޅުވީ ޗައިނާގެ އެހީގައި ރާއްޖޭގައި މުހިންމު ގިނަ މަޝްރޫއުތަކެއް ހިންގާފައިވާ ކަމަށެވެ. އަދި މިހާރުވެސް މުހިންމު މަޝްރޫއުތަކެއް ފެށުމަށް ނިންމާފައިވާ ކަމަށެވެ.
އެގޮތުން ސަފީރު ފާހަގަ ކުރެއްވީ ޗައިނާގެ އެހީގައި ހިންގުމަށް ހަމަޖެހިފައިވާ ދެ މަޝްރޫއު ކަމުގައިވާ މާލޭގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު އާއި ވިލިމާލެ ހޮސްޕިޓަލް މަޝްރޫއު އެވެ.
އެ ދެ މަޝްރޫއުގެ ޑިޒައިން މަރުހަލާ އޮތީ ނިމުމުގެ މަގުމަތީ އެވެ. ސަފީރު ވަނީ ދެ މަޝްރޫއުގެ އަމަލީ މަސައްކަތް ފެށުން ދެން މާ ލަސްނުވާނެ ކަމުގެ ޔަގީންކަން ދެއްވާފަ އެވެ.
އެގޮތުން މި ދެ މަޝްރޫއު ވެސް މި އަހަރުގެ ފަހުކޮޅު ނޫނީ އަންނަ އަހަރުގެ ކުރީކޮޅު ފެށިގެންދާނެ ކަމުގައި ވިދާޅުވި އެވެ.
މީގެ އިތުރުން ސަފީރު ވަނީ ރާއްޖޭގެ ގިނަ ރަށްތަކެއްގައި މިހާރު ކުރިއަށްދާ ކައުންސިލް މަޝްރޫއުތައް ވެސް ފާހަގަ ކުރައްވާފަ އެވެ. އެ މަޝްރޫއުގެ ދަށުން އިމާރާތްކުރާ ކައުންސިލް އިދާރާތަކުގެ މަސައްކަތް ބާރަށް ކުރިއަށްދާ ކަމުގައި ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
