ކެލާ ފެނު އަޑީގައި. އެންމެބޮޑު ގެއްލުމެއް ސްކޫލް ކޮމްޕިއުޓަރ ލެބަށް

ރާއްޖެއަށް މިހާރު ކުރަމުންދާ މޫސުމީ ވިއްސާރައިގައި ހއ.ކެލައަށް ބޮޑެތި ގެއްލުންތަކެއް ލިބިއްޖެއެވެ.

ރާއްޖޭގެ މޫސުމާ ބެހޭ ޤައުމީ ޤައުމީ އިދާރާ، މޯލްޑިވްސް މީޓިއޮލޮޖިކަލް ސެންޓަރުގެ ތަފާސްހިސާބުތަކަށް ބަލާއިރު، ރާއްޖެއަށް މިހާރު ކުރަމުންދާ ވިއްސާރާގައި އެންމެގިނައިން ވާރޭވެހިފައިވަނީ ހއ.ކެލައަށެވެ. އެރަށަށް އިއްޔެ އެކަނިވެސް 231.5 މިލިމީޓަރުގެ ވާރޭ ވެހުނެވެ.

މިހާރު ކުރަމުންދާ ވިއްސާރާގައި ކެލާގައި ފެންބޮޑުވެ ލިބިފައިވާ ގެއްލުންތަކުގެ މައުލޫމާތު "ވޮއިސް" އާ ހިއްސާކުރަމުން އެރަށު ކައުންސިލްގެ ރައީސް ޢަބްދުﷲ އިންފާޒް ވިދާޅުވީ، އިއްޔެ އާއި މިއަދު ވެހުނު ވާރޭގައި އެ ރަށުގައި ފެންބޮޑުވެ، ބައެއް ގޭތަކަށް ފެންވަދެ ހިފާ ގެންގުޅޭ ސާމާނުގެ އިތުރުން އެހެނިހެން ތަކެއްޗަށްވެސް ގެއްލުންތައް ލިބިފައިވާކަމަށެވެ. މިގޮތުން އިލެކްޓްރޯނިކް އާލާތްތަކާއި ފަރުނީޗަރުފަދަ ތަކެއްޗަށް ފެންވަދެ ގެއްލުންތައް ވަނީ ލިބިފައެވެ.

އެންމެބޮޑު ގެއްލުމެއްގެ ގޮތުގައި އިންފާޒް ފާހަގަކުރީ ރަށު ސްކޫލް ކޮމްޕިއުޓަރލެބަށް ފެންވަދެ، އެތަނުގައި ހުރި ސީޕީޔޫތަކަށްވެސް ފެނުގެ އަސަރު ކުރުމެވެ.

ކޮމްޕިއުޓަރލެބްގައިވެސް ފެންބޮޑުވެފަ ހުރީ.އެތަނުގައި މޮނީޓަރުތައް ޑެސްކުގަ ހުރިނަމަވެސް ސީޕީޔޫތައް ހުންނާނީ ގްރައުންޑްގަ. ފެންވަދެގެން ބޮޑެތި ގެއްލުންތަކެއް ލިބިފައިވަނީ.

ކައުންސިލްގެ ރައީސް އިންފާޒް ވިދާޅުވިއެވެ.

ކެލައަށް މިހާރު ކުރަމުންދާ ވިއްސާރައިގައި ވައިގަދަވުމުގެ ސަބަބުން ބައެއް ގަސްތައް ވެއްޓިފައިވާއިރު، މިކަމުގެ ސަބަބުން އެއްވެސް މީހެއްގެ ގޯތި ގެދޮރަށް ގެއްލުން ލިބިފަ ނުވާކަން އިންފާޒު ވިދާޅުވިއެވެ. އޭނާ ވިދާޅުވީ ކެލާގައި އެހާބޮޑަށް ފެންބޮޑުވަނީ ރަށުގެ މަގުތައް ނުހަދައި އޮތުމުގެ ސަބަބުން ކަމަށެވެ. މަގުތައް ހަދައި ފެން ހިންދާ ނިޒާމެއް ޤާއިމްކުރެވިފައި އޮތްނަމަ ލިބޭ ގެއްލުންތައް ކުޑަވާނޭކަން އޭނާ ފާހަގަކުރިއެވެ.

ކެލާގައި ފެންބޮޑުވުމުގެ ސަބަބުން ރަށުތެރެއިން ފެންގަނޑު ހިންދަމުންދަނީ ކޯރު ކެނޑެން އޮތް ދިމާތަކުން މޫދަށް ކޯރު ކަނޑައިގެންނެވެ. މިހާރުވެސް 5 ސަރަހައްދަކުން ވަނީ މޫދާ ހިސާބަށް ކޯރު ކޮނެފައެވެ. މިކަމުގައި ފުލުހުންނާއި، ރަށުގެ މުއައްސަސާތަކާއި ރައްޔިތުންނާއި އަދި މިވަގުތު ރަށުގައި ކޮންސްޓްރަކްޝަން މަސައްކަތްކުރަމުންދާ ކުންފުނިތަކުގެ އެއްބާރުލުން ލިބެމުންދާކަމަށް އިންފާޒް ވިދާޅުވިއެވެ.

އިންފާޒް ވިދާޅުވީ މެދުނުކެނޑި މިހާރު ވެހެމުންދާގޮތަށް ވިއްސާރަ ވެހެމުންދާނަމަ ބައެއް ގޭތަކުން މީހުން ނެރެންޖެހޭނެ ކަމަށެވެ. ރާއްޖޭގެ ބައެއް ރަށްރަށަކީ ފެންތިލަ ރަށްރަށަށް ވީނަމަވެސް ކެލައަކީ އެފަދަ ރަށެއް ނޫނެވެ. ނަމަވެސް ކެލާގައި މީހުން ދިރިއުޅެމުންދާ ބައެއް ސަރަހައްދުތަކަކީ ވާރޭ ވެހިއްޖެނަމަ ވަރަށް ފަސޭހައިން ފެން ބޮޑުވާ ސަރަހައްދު ތަކެއްކަމަށް ކައުންސިލްގެ ރައީސް އިންފާޡް ވަނީ ފާހަގަކުރައްވާފައެވެ.

މޫސުމާ ބެހޭ އިދާރާގެ އެންމެ ފަހުގެ ހަބަރުތަކަށް ބަލާއިރު، މާލެ އަތޮޅުން ފެށިގެން އދ އަތޮޅާ ހަމަޔަށް ވަނީ އޮރެންޖު އެލާޓް ނެރެފައެވެ.