އުފެއްދުންތެރިކަމުގެ ޤައުމީ މައުރަޒުގައި އިންސާފްކޮށްދޭނޭ ފަނޑިޔާރުން ހޯދަނީ

މިއަހަރު ބޭއްވުމަށް ހަމަޖެހިފައިވާ އުފެއްދުންތެރިކަމުގެ މައުރަޒުގައި އިންސާފުކޮށްދޭނޭ ފަނޑިޔާރުން ހޯދުމަށް އިއުލާނުކޮށްފިއެވެ.

ބިޒްނަސް ސެންޓަރ ކޯޕަރޭޝަނުން ކޮށްފައިވާ އިއުލާނުގައި ބުނެފައިވަނީ، މައުރަޒުގައި ބައިވެރިކުރާ އުފެއްދުންތަކަށް އިންސާފުކޮށް ފަނޑިޔާރުކަން ކުރުމަށް ޝައުޤުވެރިވާ ފަރާތްތަކުން، ނަން ހުށަހެޅުމުގެ ފުރުސަތު މިއަދުން ފެށިގެން ހުޅުވާލާފައިވާކަމަށެވެ. ބީސީސީން ވަނީ މިކަމަށް އެދި ހުށަހަޅާ މީހުްނގެ ކިބާގައި ހުންނަން ޖެހޭ ޝަރުތުތައްވެސް ބަޔާންކޮށްފައެވެ.

ފުރަތަމަ ޝަރުތެއްގެ ގޮތުގައި ކަނޑައަޅާފައިވަނީ ދިވެހި ރައްޔިތަކަށް ވުމާއި، އުމުރުން 21 އަހަރު ވުމެވެ. ފާހަގަކޮށްލެވޭ އިތުރު ޝަރުތުތަކުގެ ތެރޭގައި ވާދަކުރުމުގެ ބައިގައި އެއްވެސް ގިންތިއަކުން ވާދަކުރާ ފަރާތެއް ކަމުގައި ނުވުމާއި، ފަނޑިޔާރުކަން ކުރުމަށް ހުށަހަޅާ ގިންތީގައި ވާދަކުރާ ފަރާތަކާއި އާއިލީ ގުޅުމެއް އޮތް ފަރާތެއް ނުވަތަ ވިޔާފާރީގެ މަސްލަހަތު އޮތް ފަރާތެއްކަމުގައި ނުވުމެވެ. މީގެ އިތުރުންވެސް އިތުރު ޝަރުތުތައް ހިމެނެއެވެ.

މައުރަޒުގައި ބައިވެރިކުރާ ތަކެއްޗަށް އިންސާފްކުރުމަށް ފަނޑިޔާރުން ހޯދުމުގެ މަސައްކަތް ބީސީސީން ފަށާފައިވާއިރު، މިދިޔަ އަހަރު ބޭއްވި މައުރަޒުގައި ބައެއް ތަކެތިން ވަނަތައް ދިންގޮތުން ބައެއް ފަރާތްތަކުން ވަނީ ނުރުހުން ފާޅުކޮށްފައެވެ. މިގޮތުން އެންމެ ހޫނުވެގެން ދިޔައީ ލިޔެލާޖެހުމަށް އެންމެ ފާހަގަކޮށްލެވޭ ތުޅާދޫއިން ބައިވެރިކުރި އެއްޗަކަށް ވަނަ ދިންގޮތުން އުފެދިގެންދިޔަ ހިޔާލް ތަފާތުވުމެވެ.

އުފެއްދުންތެރިކަމުގެ ޤައުމީ މައުރަޒުގައި ބައިެވރިވުމުގެ ފުރުސަތު ހުޅުވާލާފައިވާއިރު، މިފަހަރު ވަނީ ޤައުމީ މައުރަޒުގައި ފުރަތަމަ ފަހަރަށް ދީނީ ކޮންޓެންޓް އުފެއްދުމުގެ ފުރުސަތު ދީފައެވެ. ދީނީ ކޮންޓެންޓް، އޯޑިއޯ އަދި ވީޑިއޯ ފޯމެޓުގައި ހުށަހެޅުމުގެ ފުރުޞަތު މިފަހަރު ބާއްވާ މައުރަޒުގައި ހުޅުވާލާފައިވާއިރު، މީގެ ތެރޭގައި އިސްލާމީ ތީމްތަކުގެ މައްޗަށް ބިނާކޮށް ތައްޔާރުކޮށްފައިވާ ޑޮކިއުމެންޓްރީތަކާއި، ރިޕޯޓްތަކާއި، އަދި ދީނީ ރޫޙު އާލާކުރުމަށް ތައްޔާރުކޮށްފައިވާ މަލްޓިމީޑިއާ އުފެއްދުންތައް ހިމެނެއެވެ. މިފަދަ އުފެއްދުންތައް ހުންނަންވާނީ ކަނޑައެޅިފައިވާ ދީނީ އުޞޫލުތަކާއި މިންގަނޑުތަކަށް ފެތޭގޮތަށެވެ.