މިހާރު މި ފެނިގެންދަނީ ޤައުމީ ބޭންކް އަސްލު މަޤާމަށް އަންނަތަން: މާލީ ވަޒީރު

މިއަދު މި ފެނިގެންދަނީ ދިވެހި ރާއްޖޭގެ ޤައުމީ ބޭންކްގެ އަސްލު މަޤާމަށް އަންނަމުންދާ މަންޒަރުކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

ދ.ކުޑަހުވަދޫގައި ބީއެމްއެލްގެ އައު ބްރާންޗްގެ ހިދުމަތް ފެށުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން މާލީ ވަޒީރު މޫސާ ޒަމީރު ވިދާޅުވީ، މިއަދު ބޭންކް އޮފް މޯލްޑިވްސް ފުޅާވެ، ވިޔަފާރިކުރަމުންދާ މޮޑަލްގެ މިޝްރާބު ބަދަލުކޮށްލުމާއެކު ބައެއް ބޭފުޅުން ތަފާތު އެކިއެކި ހިޔާލްތައް ފާޅުކުރައްވަމުން ގެންދަވާކަމަށެވެ. ވަޒީރު ވިދާޅުވީ، ޤަބޫލުކުރަންޖެހޭ ހަޤީޤަތަކީ ކޮންމެ ޤައުމެއްގެވެސް އިގްތިސާދު ފުޅާވެ ރައްޔިތުންނަށް ހިދުމަތްދެމުންގެންދާއިރު، ޤައުމީ ބޭންކުތަކުން އެހެން ބޭންކުތަކުން ނުކުރާ މަސައްކަތްތަކެއް ކުރާކަމަށެވެ.

ދުނިޔޭގެ ތަރައްޤީވެފައިހުރި ކޮންމެ ޤައުމަކަށް ބެލިނަމަވެސް އެންމެދުރާ ކައިރީގައިވާ ޤައުމުތަކުގެ ޤައުމީ ބޭންކުތަކުން އަމަލުކުރަމުން އަންނަނީ މިގޮތަށްކަން ވަޒީރު ވިދާޅުވިއެވެ.

ޒަމީރު ވިދާޅުވީ 10 މިލިއަން ރުފިޔާގެ ކެޕިޓަލްއަކުން ވިޔަފާރި ފެށި ބޭންކްގެ ކެޕިޓަލް މިއަދު 16 ބިލިއަން ރުފިޔާ ފަހަނައަޅައި ދިޔައިރު، ބޭންކުން މިހާރު ފަށާފައިވާ ޕްރޮޖެކްޓްތަކަކީ ރައްޔިތުންނަށް އޭގެ ލާބަ އާއި ފައިދާ ލިބޭނޭ ޕްރޮޖެކްޓްތަކެއް ކަމަށެވެ.

ސަރުކާރުގެ ބޯހިޔާވަހިކަމުގެ ސިޔާސަތަށް އެއްބާރުލުން ދިނުމުގެ ގޮތުން ބީއެމްއެލުން ވަނީ ހައުސިންނަށް ހާއްސަ ކުންފުންޏެއް ހަދައި ރައްޔިތުންނަށް ބޯހިޔާވަހިކަން ހޯދައިދިނުމަށް ފްލެޓްތައް އެޅުމުގެ މަސައްކަތް ފަށާފައެވެ.

އެކަމަށް އިޝާރާތް ކުރައްވައި ވަޒީރު ވިދާޅުވީ، ރައީސް ޑރ.މުހައްމަދު މުއިއްޒުގެ ޒައާމަތުގެ ދަށުން ޤައުމީ ބޭންކް މިހާރު ފެނިގެންދަނީ ބޭންކްގެ އަސްލު މަޤާމަށް އަންނަތަން ކަމަށެވެ.

ރާއްޖޭގެ އިގްތިސާދު ފުޅާވެގެންދާނީ ރާއްޖޭގެ ވިޔަފާރިތައްވެސް ފުޅާވެގެން. ރާއްޖޭގެ ވިޔަފާރިތައް ފުޅާކުރުމަށްޓަކައި ޤައުމީ ބޭންކުގެ އެންމެ މުހިންމު ރޯލަކަށް ވާނީ ކުދި އަދި މެދުފަންތީގެ ވިޔަފާރިތަކުގެ އިތުރުން ބޮޑެތި ވިޔަފާރިތަކުގެވެސް އަތުގައި ހިފައިގެން އެކުގައި މަސައްކަތްކުރަމުންދިޔުން

ބޭންކްގެ ފައިދާ މިދިޔަ އަހަރު ރެކޯށް މިންވަރަކަށް އިތުރުވެފައިވާއިރު، މާލީ ވަޒީރު ވިދާޅުވީ އުއްމީދަކީ، ސަރުކާރުގެ ސިޔާސަތްތަކާ އެއްގޮތްވާނެގޮތަށް އިގްތިސާދުގެ ހަރަކާތްތައް ފުޅާކުރުމަށް ކުދި އަދި މެދުފަންތީގެ ވިޔަފާރިތަކާއެކުގައި މަސައްކަތްކުރުން ކަމަށެވެ. ވަޒީރު ވިދާޅުވީ ޤައުމީ ބޭންކް ފުޅާވުމަކީ އެކަމުގެ މަންފާ ރައްޔުތުންނަށް ނިހާޔަތަށް ކުރާނޭ ކަމެއްކަމަށެވެ.

އެގޮތުން ޤައުމީ ބޭންކް މާލީގޮތުން ވަރުގަދަވެގެން ދިއުމުގެ ސަބަބަބުން ރައްޔިތުންގެ ޒަރޫރީ ބޭނުންތައް ފުއްދުމާއި އެނޫންވެސް ކަންކަމަށް ތަނަވަސް ފުރުސަތުތައް ހުޅުވިގެންދާނޭކަން ވަޒީރުގެ ވާހަކަފުޅުގައި ފާހަގަކުރެއްވިއެވެ.