އަދީބުގެ މައްޗަށް އެއް މިލިއަން ރުފިޔާ ދައްކަން ހުކުމްކޮށްފި

މޯލްޑިވްސް މާކެޓިން، ޕީއާރު ކޯޕަރޭޝަން (އެމްއެމްޕީއާރުސީ) ހިޔާނާތުގެ މައްސަލާގައި ކުރީގެ ނައިބުރައީސް އަހުމަދު އަދީބުގެ މައްޗަށް މަސްދުވަހުގެ ތެރޭގައި އެއް މިލިއަން ރުފިޔާ ދެއްކުމަށް ސިވިލްކޯޓުން އިއްޔެ ހުކުމްކޮށްފިއެވެ.

އެމްއެމްޕީއާރުސީ މައްސަލާގައި ކްރިމިނަލް ކޯޓުން ވަނީ އަދީބު 20 އަހަރަށް ޖަލަށްލުމަށް ހުކުމްކޮށް 2 މިލިއަން ރުފިޔާ ދައުލަތަށް ދެއްކުމަށް ހުކުމްކޮށްފައެވެ. މި ހުކުމް ކޮށްފައިވަނީ 2020 ވަނަ އަހަރުގެ އޮކްޓޯބަރުމަހުގެ ތެރޭގައެވެ. އޭރު 2 މިލިއަން ރުފިޔާ ދައްކަން ހުކުމްކުރީ ދެމަސްދުވަހުގެ ތެރޭގައި ދައްކާ ހަލާސްކުރާ ގޮތަށެވެ.

ސިވިލްކޯޓުން އިއްޔެ އަދީބުގެ މައްޗަށް 1 މިލިއަން ރުފިޔާ ދެއްކުމަށް ހުކުމްކުރީ މިއަދާ ހަމަޔަށް އާއިރުވެސް ފައިސާ އެއްކޮށް  ދައްކާފައި ނުވުމުންނެވެ. ޝަރީއަތުގެ މަޖިލީހުގައި އަދީބުގެ ފަރާތުން ބުނެފައިވައިވަނީ، އެއް މިލިއަން ރުފިޔާ އެއްފަހަރާ ދެއްކުމަކީ ދަތިކަމެއް ކަމަށެވެ.

އެމްއެމްޕީއާރުސީ ހިޔާނާތް 4 ބިލިއަން ރުފިޔާއަށް އަރާއިރު، މީގެ ތެރެއިން ބޮޑުބައެއް ގެއްލިފައިވަނީ ރައީސް ޔާމިނު ޗެއާކުރައްވަމުން ގެންދަވާ އިކޮނޮމިކް ކައުންސިލްގެ ތެރެއިންނެވެ. އޭރު ކައުންސިލްގެ ޗެއާއަކީ ރައީސް ޔާމީނުއެވެ. ކޯ ޗެއާއަކީ އަހުމަދު އަދީބެވެ. ފަހުން އެމްއެމްޕީއާރުސީގެ މައްސަލަ ފެންމަތިވުމުން 2015 ވަނަ އަހަރުގެ އޮކްޓޯބަރުމަހުގެ 25 ވަނަ ދުވަހު ރައީސް ޔާމީން ވަނީ، އިކޮނޮމިކް ކައުންސިލްގެ ކޯ ޗެއާކަމުން އަދީބު ވަކިކުރައްވައި، ކައުންސިލުންގެ ކަންކަން ސީދާ ރައީސް ޔާމީނުގެ ބެއްލެވުމުގެ ދަށަށް ބަދަލުކުރައްވާފައެވެ.

އެމްއެމްޕީއާރުސީ މައްސަލާގައި އަދީބުގެ މައްޗަށް 20 އަހަރުގެ ޖަލުހުކުމެއް ކުރެއްވި ނަމަވެސް ފަހުން ރައީސް ސޯލިހު ވަނީ،  އަދީބުއަށް މައާފްދެއްވާފައެވެ.