ހިޔާ ފްލެޓަށް ވަދެވޭނީ އަންނަ އަހަރުގެ ނޮވެންބަރުގައި
ލިޔުންތެރިޔާ
ޝަފްރާޒް އަހްމަދު
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުން ހިންގެވި ހިޔާ މަޝްރޫއުގެ ދަށުން ދޫކޮށްފައިވާ ފްލެޓްތަކަށް ވަދެވޭނީ އަންނަ އަހަރުގެ ނޮވެންބަރުގައި ކަމަށް ހައުސިންގް މިނިސްޓަރ އާމިނަތު އާތިފާ ޝަކޫރު ވިދާޅުވެއްޖެއެވެ.
އެކަމަނާ މިހެން ވިދާޅުވީ އިއްޔެ ހައުސިންގް މިނިސްޓްރީގައި ބޭއްވި ނޫސްވެެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ އަންނަ އަހަރުގެ ނޮވެމްބަރު މަހުގެ ތެރޭގައި އެ ފްލެޓްތަކުގައި މީހުންނަށް ދިރިއުޅެން ފެށޭނެކަމަށާއި އޭގެ ކުރިން އެ ފްލެޓްތަކުގެ މައްސަލަތައް ބެލޭނެކަމަށެވެ. އަދި އެ ފްލެޓްތަކުގެ މައްސަލަ ބެލުމަށް ކޮމެޓީއެއް އުފައްދާފައިވާކަންވެސް އެކަމަނާ ވަނީ ފާހަގަކުރައްވާފައެވެ. މީގެ ކުރިން ގިނަބަޔަކު ވަނީ ހިޔާ މަޝްރޫއުގެ ފްލެޓްތައް ދިންގޮތާއި ބެހޭގޮތުން ސުވާލުއުފައްދާފައެވެ.
ހުޅުމާލެ ދެވަނަ ފިޔަވަހީގައި އަޅާ ހިޔާ ފްލެޓްގެ އިމާރާތްތަކުގެ ސްޓްރަކްޗަރގެ ބޮޑު ބައެއް މިހާރު ވަނީ ނިމިފައިކަން ފާހަގަކޮށްލަންޖެހެއެވެ.
މި ބައްދަލުވުމުގައި ވާހަކަފުޅު ދައްކަވަމުން ހައުސިންގް މިނިސްޓްރީގެ ސްޓޭޓް މިނިސްޓަރ އަހުމަދު ނަޝީދު ވަނީ ކިއުގައި ނުތިބެ ފްލެޓްތަކަށް ފޯމުލުމުގެ އިންތިޒާމު ހަމަޖައްސަވާނެކަމަށް ވިދާޅުވެފައެވެ.
އެގޮތުން ނެޝަނަލް ސެންޓަ ފޯ އިންފޮމޭޝަން އެންޑް ޓެކްނޮލޮޖީއާ ގުޅިގެން ފްލެޓްތަކާއި ގުޅޭ ވެބް ޕޯޓަލްއެއް ފަރުމާކުރަމުން އަންނަ ކަމަށް އެބޭފުޅާ ވަނީ ފާހަގަކުރައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
