ޓޯކުރި ސައިކަލެއް އޮޅިގެން ނައްތާލުމުން ބަދަލަށް -/82،000 ދޭން ޖެހިއްޖެ

ފުލުހުން ޓޯކުރި ސައިކަލެއް އޮޅިގެން ނައްތާލެވިފައިވާތީ ސައިކަލުގެ ވެރިފަރާތަށް -/82،000 ގެ ބަދަލެއް ދޭން ފުލުހުންގެ މައްޗަށް ސިވިލް ކޯޓުން މިއަދު ހުކުމްކޮށްފި އެވެ.

މި މައްސަލަ އަކީ 2022 ވަނަ އަހަރުގެ އޭޕްރީލް މަހުގެ އޭޕްރިލް 7 ވަނަ ދުވަހު ހުޅުމާލޭ ދެވަނަ ފިޔަވަހީގައި ހިނގި އެކްސިޑެންޓަކާ ގުޅިގެން ފުލުހުން ޓޯކޮށްފައިވާ ސައިކަލެއް ހުޅުމާލޭ ޓޯ ޔާޑުގައި ހުއްޓާ ގެއްލިފައިވާ ކަމަށް ފުލުހުންގެ ފަރާތުން މައުލޫމާތު ލިބުމުން، އެ ސައިކަލުގެ ވެރިފަރާތުން، އޭނާއަށް ލިބުނު ގެއްލުމުގެ ބަދަލު ހޯދުމަށް ފުލުހުންނާ ދެކޮޅަށް ދައުވާ ކުރި މައްސަލައެކެވެ.

އެ މައްސަލާގައި ސައިކަލު ގެ ވެރިފަރާތުން ބުނެފައިވާ ގޮތުގައި، ފުލުހުން އޭނާގެ ސައިކަލް ޓޯވ ކުރީ އެކްސިޑެންޓް ހިނގި ވަގުތު ގައި އޭނާގެ އަތުގައި ލައިސަންސް ނެތުމުންނެވެ.

އެގޮތުން ސައިކަލު ފުލުހުންގެ ބެލުމުގެ ދަށުގައި ބެއިންދީ 15 ދުވަހަށް ކަމަށާ، އެ މުއްދަތު ހަމަވުމުން ވެރިފަރާތުން ސައިކަލް ބަލައި ދިޔައިރު ސައިކަލް އެތަނުގައި ނެތް ކަމަށްވެސް އޭނާ ބުނެފައިވެއެވެ.

އެހެންކަމުން ސައިކަލުގެ ވެރިފަރާތުން ވަނީ، އޭނާގެ މުދަލެއް ދައުލަތުގެ ބެލުމުގެ ދަށުގައި ހުއްޓާ ގެއްލުމުގެ ބަދަލުގައި، ސައިކަލް ގަންނަން ޚަރަދުވި، 57,900 ރުފިޔާއާއި، ޕިޔުނިޓިވް ޑެމޭޖަސްގެ ގޮތުގައި 19,300 އަދި ވަކީލުގެ ފީގެ ގޮތުގައި 25,000 އެކު ޖުމްލަ އެއް ލައްކަ ދެހާސް ދުއިސައްތަ ރުފިޔާ ހޯދުމަށް ދައުވާ ކޮށްފައެވެ.

މި މައްސަލާގައި ކޯޓުގައި ދައުލަތުން ވަނީ، ސައިކަލް ޓޯވް ޔާޑްގައި ހުއްޓާ 19 އޭޕްރިލް 2022 ގައި ޓީވް ޔާޑުން ސައިކަލް ތަކެއް ނައްތާލުމަށް ގެންދެވުނު އިރު، އެ ސައިކަލްތަކާއެކު، ދައުވާ ކުރާ ފަރާތުގެ ސައިކަލު އޮޅިގެން ގެންދެވި ނައްތާލެވިފައިވާ ކަމަށް ބުނެފަ އެވެ. އަދި އެކަން ހިނގީ، އެ މަސައްކަތުގައި އުޅުނު ފުލުހަކު ގަސްތުގައި ކުރި ކަމަކުން ނޫން ކަމަށްވެސް ބުނެފައިވެއެވެ.

މައްސަލައިގައި ސިވިލް ކޯޓުން އިއްވި ހުކުމުގައިވަނީ ސައިކަލުގެ އަގު ކަމަށްވާ -/57،000 އާއި ސައިކަލުގެ ވެރިފަރާތުން އެ މައްސަލާގައި ވަކީލަށް ހަރަދު ކުރަން ޖެހުނު 25،000ރ. އާ އެކު ޖުމްލަ 82،000ރ. ދައުލަތުން އެ މީހާއަށް ދައްކަން ޖެހޭނެ ކަމަށެވެ. ހަމަ އެހެންމެ އެ ފައިސާ ހަތް ދުވަސް ތެރޭގައި ދެއްކުމަށް ވެސް އެ ހުކުމުގައި އަންގާފައިވެއެވެ.

އެ މައްސަލާގައި ޕިއުނިޓިވް ޑެމޭޖަސްގެ ގޮތުގައި -/19،000 ނަގައިދިނުމަށް އެދިފައިވީ ނަމަވެސް ކޯޓުގެ ހުކުމުގައިވަނީ އެ ފައިސާ ނަގައި ނުދެވޭނެ ކަމަށެވެ. ސަބަބަކީ އެ ބާވަތުގެ ބަދަލަކީ ގަސްދުގައި ކުރާ ކަންކަމަށް ނަގައިދޭ ބަދަލެއް ކަމަށްވެފައި، އެ މައްސަލާގައި ސައިކަލު ނައްތާލެވުނީ އޮޅިގެން ކަމަށް ވާތީ ކަމަށް ހުކުމުގައިވެ އެވެ.