ބޭރުފައިސާ މާރުކުރާ މިންވަރު ދެ ގުނަ އިތުރުކުރުމަކީ ތަހައްމަލުކުރެވޭނެ ކަމެއް ނޫން: މަޓީ

ރިސޯޓްތަކަށް އާމްދަނީގެ ގޮތުގައި ލިބޭ ބޭރުފައިސާގެ ތެރެއިން މިހާރު މާރުކުރަން ލާޒިމްކޮށްފަ އޮންނަ އަދަދު 40 އިންސައްތައަށް އިތުރުކުރުމަކީ ތަހައްމަލުކުރެވޭނެ ކަމެއް ނޫންކަމަށް ރިސޯޓްތައް ހިއްސާވާ ޖަމިއްޔާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ބުނެފިއެވެ.

ރިސޯޓްތަކުން މާރުކުރާ ބޭރުފައިސާގެ މިންވަރު އިތުރުކުރުމަށް ނިންމާފައިވާކަމަށް މިއަދު ބޭއްވި ނޫސްވެރިންގެ ބައްދަލުވުމުގައި ގަވަރުނަރު އަހުމަދު މުނައްވަރު ވަނީ ވިދާޅުވެފައެވެ. މިކަމާ ގުޅިގެން މަޓީން ނެރުނު ބަޔާނުގައި ބުނެފައިވަނީ، ރިސޯޓް އޮޕަރޭޓަރުންގެ ތެރެއިން ބަޔަކު ބޭރު ފައިސާގެ ކަޅު ބާޒާރަށް މަގުފަހިކުރާ ކަމުގެ ތުހުމަތުތަކާ ގުޅިގެން "ކެޓަގަރީ އޭ" ގެ ތަންތަނުން މާރުކުރަންޖެހޭ ބޭރު ފައިސާގެ މިންވަރު ޖުމްލަ އާމްދަނީގެ 40 އިންސައްތައަށް ބޮޑުކުރުމަށް ހުށަހެޅި ހުށަހެޅުމާމެދު ކަންބޮޑުވާކަމަށެވެ.

މަޓީގެ ބަޔާނުގައި ބުނީ އިއްޔެ މަޓީގެ އެގްޒެކެޓިވް ބޯޑު ރައީސުލްޖުމްހޫރިއްޔާގެ އޮފީހަށް ކުއްލި ބައްދަލުވުމަކަށް ހާޒިރުކުރެވުނު ކަމަށެވެ. ކެބިނެޓް މިނިސްޓަރުންނާއި ސަރުކާރުގެ އިސް ބޭފުޅުން ބައިވެރިވެވަޑައިގެންނެވި އެ ބައްދަލުވުމުގައި ބޯޑަށް އެންގެވީ ތަންފީޒީ އިދާރާތަކުގެ ތަޙުޤީޤުތަކުން ބައެއް ރިސޯޓް އޮޕަރޭޓަރުން ޣައިރު ޤާނޫނީ މުޢާމަލާތްތައް މެދުވެރިކޮށް ކަޅު ބާޒާރުގެ ރޭޓް އާދަޔާޚިލާފަށް މައްޗަށް ގެންދާ ކަން ފާހަގަކުރެވިފައިވާ ކަމަށެވެ. ނަމަވެސް މިފަދަ އެއްވެސް ޢަމަލެއްގެ މަޢުލޫމާތު ލިބިފައިނުވާ ކަމަށް މަޓީން ސާފުކޮށް ބުނެފައިވާކަމަށް އެ ޖަމިއްޔާގެ ބަޔާނުގައި ބުންޏެވެ.

މަޓީން ބުނީ ކަޅު ބާޒާރަށް އޮތް ޕްރެޝަރަކީ ހަމައެކަނި ރިސޯޓް އޮޕަރޭޓަރުންގެ ސަބަބުން ކުރިމަތިވާ ކަމެއް ކަމަށް ބުނުމަކީ ޙަޤީޤަތާ ޚިލާފު ބޭއިންސާފެއް ކަމަށެވެ.

މި މައްސަލައިގެ ފެށުން ގޮސް ގުޅެނީ އޮގަސްޓް ކުރީކޮޅު އެމްއެމްއޭގެ ގަވަރުނަރާ އެކު މަޓީން ބޭއްވި ބައްދަލުވުމަށްކަން ފާަގަކުރަމުން މަޓީގެ ބަޔާނުގައި ބުނެފައިވަނީ، އެ ބައްދަލުވުމުގައި އެމްއެމްއޭއިން ހުށަހެޅީ ކޮންމެ ފަތުރުވެރިއަކަށް 500 ޑޮލަރު މާރުކުރަންޖެހޭ މިހާރުގެ އުސޫލު އުވާލައި "ކެޓަގަރީ އޭ" ގެ ހުރިހާ ތަނަކުން 20 އިންސައްތަ މާރުކުރާ ގޮތަށް ބަދަލުކުރުމަށް ކަމަށެވެ. އެ ހުށަހެޅުމާ ގުޅިގެން 10 އިންސައްތައަށް ވުރެ އެ މިންވަރު މައްޗަށް ގެންގޮސްގެން ނުވާނެ ކަމަށް ބުނެފައިވާނޭ ކަމަށާއި، އެހެން ނަމަވެސް މަދު ހަފުތާތަކެއް ތެރޭ އެ ނިސްބަތް 40 އިންސައްތައަށް ބޮޑުކުރުމަށް ހުށަހެޅުމުން ސިނާޢަތަށް އެ ބުރަ ތަހައްމަލުކުރެވެން ނެތް ކަމަށް މަޓީން ބުންޏެވެ.

އެގޮތުން ރިސޯޓްތަކުން މިހާރު ވެސް ތެލާއި މުސާރައާއި ސަރވިސް ޗާޖާއި މުދަލާއި ލޮޖިސްޓިކްސް، ފަތުރުވެރިން އުފުލުމާއި ޓީޖީއެސްޓީއާއި ގްރީން ޓެކްސާއި ވިތްހޯލްޑިންގ ޓެކްސާއި އިންކަމް ޓެކްސާއި ބިމު ކުއްޔާއި ބޭރު ފައިސާގެ ލޯނު އަނބުރާ ދެއްކުމަށް ޑޮލަރުން ބޮޑެތި ޚަރަދުތައް ކުރަންޖެހޭ ކަމަށް އެ ޖަމްޢިއްޔާއިން ފާހަގަކޮށްފައިވެއެވެ.

ޖުމްލަ 200 މެންބަރުންގެ ތެރެއިން 146 ރިސޯޓެއް ތަމްސީލުކުރާ މަޓީން ބުނެފައި ވަނީ ސަރުކާރާއި އެމްއެމްއޭ އަދި ކަމާ ބެހޭ ހުރިހާ ފަރާތްތަކާ އެކު މަޝްވަރާކޮށް އިންސާފުވެރި އަދި ދެމެހެއްޓެނިވި ޙައްލެއް ހޯދުމަށް ތައްޔާރަށް އޮތް ކަމަށެވެ. ރާއްޖޭގެ އިޤްތިޞާދަށް އެންމެ ގިނައިން ބޭރު ފައިސާ ވައްދައިދޭ ފަރާތެއްގެ ހައިސިއްޔަތުން ބޭރު ފައިސާގެ މައްސަލައިގައި ސަރުކާރާ އެކު އިޚްލާޞްތެރިކަމާ އެކު މަސައްކަތް ކުރާނެ ކަމަށް ވެސް މަޓީގެ ބަޔާނުގައި ވަނީ ބުނެފައެވެ.