ރާއްޖޭގެ މިނިވަންކަމަކީ ކިހާ މުހިއްމުކަމެއް ކަން ރައީސް މުޅި ދުނިޔެއަށް ދައްކަވައިފި: ޒަމީރު
ދުނިޔޭގެ ނިސްބަތުން ދިވެހިރާއްޖެއަކީ ކިތަންމެ ކުޑަ ޤައުމަކަށްވީ ނަމަވެސް ރާއްޖޭގެ މިނިވަންކަން ދިވެހިންނަށް އަމިއްލައަށް ދެމެހެއްޓޭނެ ކަން ރައްޔިތުންނާއި މުޅި ދުނިޔެއަށް ރައީސް ޑރ. މުހައްމަދު މުއިއްޒު ދައްކަވައިފި ކަމަށް ރާއްޖޭގެ ފޮރިން މިނިސްޓަރ މޫސާ ޒަމީރު މިއަދު ވިދާޅުވެއްޖެއެވެ.
މިހާރު ރައީސުލްޖުމހުރިއްޔާ ތ.އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ތ. މަޑިފުށްޓަށް ވަޑައިގެންނެވުމުން އެރަށުގައި ބޭއްވި ޖަލްސާގައި ވާހަކަ ދައްކަވަމުން ފޮރިން މިނިސްޓަރ މޫސާ ޒަމީރު ވިދާޅުވީ މި ސަރުކާރު ވެރިކަމަށް އައިއިރު ރާއްޖޭގެ މިނިވަންކަން އޮތީ ވަރަށް ވަރަށް ނާޒުކު ފައްތަރެއްގައި ކަމަށެވެ.
ޒަމީރު ވިދާޅުވީ ރައީސް ޑރ. މުއިއްޒު ވެރިކަމަށް ވަޑައިގެންނެވީ ރާއްޖޭގެ މިނިވަންކަމާއި އިސްތިގްލާލަށްޓަކައި ކުރަން ޖެހޭ ކަންކަން ކުރުމަށް ކަމަށާއި އެ ކަންކަން ރައީސް ހާސިލް ކުރައްވަމުން ގެންދަވާ ކަމަށާއި އެ މަސައްކަތުގައި ރައީސް ޑރ.މުހައްމަދު މުއިއްޒު މިހާހިސާބަސްވެސް ވަނީ ވަރަށް ބޮޑު ކުރިއެރުމަކާއި ކާމިޔާބީއެއް ހާސިލްކުރައްވާފައި ކަމަށެވެ.
"އަޅުގަނޑުމެންނަށް ވިސްނިފައި އޮތީ އަޅުގަނޑުމެން އަބަދުވެސް ތިބެން ޖެހެނީ ކޮންމެވެސް ބަޔަކަށް ޑިޕެންޑުވެގެންނޭ. ރައީސްގެ ދުރުވިސްނުންފުޅާއެކު އަޅުގަނޑުމެން ދެ މަހެއްހާ ދުވަހު ކުރެވުނު މަސައްކަތުން އަޅުގަނޑަށް ފާހަގަކުރެވުނީ ރައީސް އެ ކާމިޔާބީ ހޯއްދެވި ގޮތް"
ޒަމީރު ވިދާޅުވި އެވެ.
ފޮރިން މިނިސްޓަރ ޒަމީރު މިފަދައިން ވިދާޅުވިއިރު ރާއްޖޭގައި ތިބި އިންޑިއާގެ އަސްކަރީ ސިފައިން ރާއްޖެއިން ބޭރުކުރުމުގެ މަސައްކަތް މި ސަރުކާރުން ގެންދަނީ ބާރަށް ހަލުވި ސްޕީޑުގައި ކުރަމުންނެވެ. އަދި މިހާރު ހަމަޖެހިފައިވާ ގޮތުން ނަމަ ރާއްޖޭގައި ތިބި އިންޑިއާ އަސްކަރިއްޔާގެ ފުރަތަމަ ގްރޫޕް މިއަންނަ މަހުގެ 10 ވަނަ ދުވަހު ރާއްޖެ ދޫކޮށް ދާނެއެވެ. އަދި ދެންތިބި ސިފައިން ދެމަސްތެރޭ ރާއްޖެ ދޫކޮށް ފައިބާން ޖެހޭނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
