ދަނޑުވެރިންގެ އުފެއްދުންތައް ވިއްކުމަށް މާލޭގައި ވަގުތީ މާރުކޭޓެއް ހަދަނީ

ކުރިއަށްއޮތް ރަމަޟާންމަހަށް ހާއްސަކޮށް ދިވެހި ދަނޑުވެރިން އުފައްދާ ދަނޑުވެރިކަމުގެ އުފެއްދުންތައް ވިއްކުމަށް މާލެސިޓީގައި ވަގުތީ މާރުކޭޓެއް އެޅުމަށް ނިންމައިފިއެވެ.

މިކަމާ ގުޅޭގޮތުން ދަނޑުވެރިކަމާ ބެހޭ ވުޒާރާއިން ބުނެފައިވަނީ ދަނޑުވެރިން އުފައްދާ ތަކެތި ވިއްކުމަށް ފުރުސަތު ހޯދައިދިނުމުގެ ގޮތުން ވަގުތީ މާރުކޭޓެއް ނޯތް ހާބަރުސަރަހައްދުގައި އެޅުމަށް ނިންމާފައިވާކަމަށެވެ. މި މާރުކޭޓު އެޅުމުގެ ކަންކަން ކުރިއަށްގެންދާނީ އެމްޕީއެލްގެ އެހީތެރިކަމާއެކުގައިކަން ވުޒާރާއިން ވަނީ ބުނެފައެވެ.

މި ވަގުތީ މާރުކޭޓުގައި ތަކެތި ވިއްކުމުގެ ފުރުސަތު ރަށްރަށުގެ ކައުންސިލްތައް މެދުވެރިކޮށް މިނިސްޓްރީއަށް ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ. އެގޮތުން މިމަހުގެ 29 ވަނަ ދުވަހުގެ ނިޔަލަށް ފުރުސަތު ހުޅުވާލާފައިވާއިރު، އަންނަ ފެބުރުއަރީމަހުގެ 15 ވަނަ ދުވަހުން ފެށިގެން ވަގުތީ އެ މާރުކޭޓަށް މުދާ ވައްދަން ފަށާނޭކަމަށް ވަނީ ބުނެފައެވެ.

ދަނޑުވެރިކަމާ ބެހޭ ވުޒާރާއިން ނެރުނު އުސޫލުގައި ބުނެފައިވާގޮތުން ރާއްޖޭގެ ރަށްރަށުގައި އުފައްދާފައިވާ ރޯ މޭވާއާއި ތަރުކާރީ ފިޔަވާ އިތުރު ތަކެތި މިމާރުކޭޓުގައި ވިއްކުމަކީ މަނާކަމެކެވެ. އަދި މި މާރުކޭޓުގައި ބިދޭސީންނަކަށް މަސައްކަތެއް ނުކުރެވޭނެއެވެ. ވުޒާރާއިން ނިންމާފައިވަނީ ރޯދަމަސް ނިމުމާއެކު އެތަން ހުސްކުރުމަށެވެ.

އާއްމުގޮތެއްގައި ކޮންމެ އަހަރެއްގެވެސް ރޯދަމަހާ ދިމާކޮށް އަތޮޅުތެރޭގެ ރަށްތަކުގައި ދަނޑުތައް ހެއްދުމަކީ ވަރަށް ކުރިންސުރެ ފެށިގެން ކުރަމުން އަންނަ މަސައްކަތެކެވެ. އާއްމުގޮތެއްގައި ކޮންމެ އަހަރެއްގެވެސް ރޯދަމަހު އަތޮޅުތެރޭގެ ގިނަ ރަށްތަކަކުން ދަނޑުވެރިކަމުގެ އުފެއްދުންތައް ވިއްކުމަށް މާލެ ގެނެއެވެ. މީގެ ތެރޭގައި އެންމެ ގިނަ އަދަދަކަށް ގެންނަ ބާވަތްތަކުގެ ތެރޭގައި ކަރާ، ލެޓިއުސް ކަމްބާ ފަދަ ބާވަތްތައް ހިމެނެއެވެ.

ދިވެހި ދަނޑުވެރިންގެ އުފެއްދުންތައް ވިއްކުމަށް ނޯތް ހާބަރުގައި މާރުކެޓެއް އެޅުމަކީ ދަނޑުވެރިންނަށް ލިބިގެންދާނޭ ވަރަށްބޮޑު ހިތްހަމަ ޖެހުމަކަށް ވާނޭކަމަށް ވުޒާރާއިން ބުނެއެވެ. ދަނޑުވެރިން ހައްދާ ތަކެތި ބާޒާރަށް ވިއްކޭނޭ ފަސޭހަ ގޮތެއް ނެތުމަކީ ދަނޑުވެރިން އަބަދުވެސް ކުރަމުން އަންނަ ޝަކުވާއެކެވެ.