30.3 ބިލިޔަން ރުފިޔާގެ ބަޖެޓް ކޮމެޓީން ފާސްކޮށްފި

އަންނަ އަހަރަށް ލަފާކުރާ ދައުލަތުގެ ބަޖެޓުގެ ގޮތުގައި 30.3 ބިލިޔަން ރުފިޔާގެ ބަޖެޓެއް، ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމެޓީން ފާސްކޮށްފިއެވެ.

މި ބަޖެޓް މިރޭ ފާސްކުރީ އެކޮމެޓީގެ ހުރިހާ މެންބަރުންގެ އިއްތިފާގުންނެވެ.

30.3 ބިލިޔަން ރުފިޔާގެ މި ބަޖެޓަކީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ސަރުކާރުން އަންނަ އަހަރު ބޭނުންކުރާނެ ބަޖެޓެވެ. މި ބަޖެޓް ތައްޔާރުކޮށްފައިވަނީ ކުރީގެ ސަރުކާރުގެ ފިނޭންސް މިނިސްޓަރ މުހައްމަދު މުނައްވަރުގެ ބެއްލެވުމުގެ ދަށުންނެވެ.

މި ބަޖެޓް ފުރަތަމަ ހުށައެޅި އިރު އަންނަ އަހަރު 26.7 ބިލިއަން ރުފިޔާ ޚަރަދުގެ ގޮތުގައި ހިނގާނެ ކަމަށް ލަފާ ކުރިއެވެ. އަދި އާމްދާނީއާއި ހިލޭ އެހީގެ ގޮތުގައި 23 ބިލިއަން ރުފިޔާ ލިބޭނެކަމަށްވެސް ފާހަގަކުރިއެވެ. އަދި ބަޖެޓު ޑެފިސިޓްގެ ގޮތުގައި 3.4 ބިލިއަން ރުފިޔާ އަރަނި ވާނެ ކަމަށްވެސް ވަނީ ލަފާކޮށްފައެވެ.

ނަމަވެސް ބަޖެޓް އިސްލާހުކުރުމަށްފަހު ވަނީ އާންމު އޮފީސްތަކުގެ ބަޖެޓުންނާއި އުމްރާނީ ތަރައްގީގެ މަޝްރޫއުތައް ހިމެނޭ، ބަޖެޓްގެ ބައި ޕީއެސްއައިޕީ ހިމެނޭ ގޮތުން އިތުރު 180 މިލިއަން ރުފިޔާ ބަޖެޓްގެ ހަރަދުތަކުގެ ތެރެއަށް ވަނީ އިތުރުކޮށްފައެެވެ.

މިފަހަރުގެ ބަޖެޓަކީ ރާއްޖޭގެ ތާރީހުގައި ހުށައަޅާފައިވާ އެންމެ ބޮޑު ބަޖެޓެވެ.