ބަންޑާރަ ނައިބުގެ އޮފީހުގެ 2024 ވަނަ އަހަރު ހަރަދުކުރިގޮތް ރަނގަޅު: އޮޑިޓް

ބަންޑާރަ ނައިބު އޮފީހުގެ 2024 ވަނަ އަހަރުގެ މާލީ ކަންކަން މައިގަނު ގޮތެއްގައި ހިންގާ ބަލަހައްޓާފައިވަނީ ދައުލަތުގެ މާލިއްޔަތު ޤާނޫނާއި ގަވާއިދުތަކާ އެއްގޮތަށްކަމަށް އޮޑިޓަރ ޖެނެރަލް އޮފީހުން ބުނެފިއެވެ.

ދައުލަތުގެ އޮޑިޓަރ ޖެނެރަލްގެ އޮފީހުން ނެރެފައިވާ ބަންޑާރަ ނައިބު އޮފީހުގެ 2024 ވަނަ އަހަރުގެ ކޮމްޕްލަޔަންސް އޮޑިޓްގައި ބުނެފައިވަނީ، ބަންޑާރަ ނައިބު އޮފީހުގެ އެ އަހަރުގެ ފާސްކުރެވުނު ބަޖެޓާއި އެ ބަޖެޓުމް ހޭދަކުރިގޮތުގެ ބަޔާނުގައި ހިމަނާފައިވާ އަދަދުތަކާއި،  ޕަބްލިކް އެކައުންޓިންގ ސިސްޓަމްގައި ހުރި ރެކޯޑްތަކުގައި އުނި އިތުރުކަމެއް ފާހަގަކުރެވިފައި ނުވާކަމަށެވެ.

އޮޑިޓް ރިޕޯޓްގައި ބުނެފައިވަނީ އެއަހަރު ބަންޑާރަ ނައިބުގެ އޮފީހުން ހަރަދުތައް ކޮށްފައިވަނީ އެ އޮފީހަށް ބަޖެޓްގައި ކުރުމަށް ކަނޑައަޅާފައިވާ ކަންތައްތަކަށް ކަނޑައަޅާފައިވާ މިންވަރަށް ގާނޫނާއި ގަވައިދުގެ ތެރެއިން ކަމަށެވެ.

ބަންޑާރަ ނައިބު އޮފީހުގެ އެ އަހަރުގެ މަސައްކަތްތަކަށް ބަލާއިރު އެ އޮފީހަށް 556 މައްސަލަ ހުށަހެޅުނުއިރު އޭގެ ތެރޭގައި ހިމެނެނީ ދައުލަތުގެ މައްޗަށް ދައުވާލިބޭ 125 މައްސަލައަކާއި، ދައުލަތުގެ ފަރާތުން ދައުވާ ކުރުމަށް އެދި ހުށަހެޅި 431 މައްސަލައެވެ. ދައުލަތަށް ދައުވާލިބޭ މައްސަލަތަކުގެ ތެރެއިން 46 މައްސަލައެއް ނިމިފައިވާއިރު، 79 މައްސަލައެއް ކޯޓުގައި މިހާރުވެސް ދަނީ ހިނގަމުންނެވެ. އަދި ދައުލަތުގެ ފަރާތުން ދައުވާކުރުމަށް ކޯޓަށް ހުށަހެޅި 303 މައްސަލައިގެ ތެރެއިން 169 މައްސަލައެއް ނިމިފައިވާއިރު 134 މައްސަލަ ދަނީ ހިނގަމުންނެވެ.  އަދި 162 މައްސަލައެއް ވަނީ އަނބުރާ ފޮނުވާލާފައެވެ.

މީގެ އިތުރުން 2024 ވަނަ އަހަަރު ބަންޑާރަ ނައިބުގެ ގާނޫނީ ލަފައަށްއެދި 941 މައްސަލަ ހުށަހެޅުނުއިރު، އޭގެ ތެރެއިން 850 ނައްސަލައަކަށް ލަފާދީފައި ވެއެވެ. އަދި ސަރުކާރުގެ ފަރާތުން މަޖިލީހަށް ހުށަހެޅުމަށްޓަކައި 40 ބިލެއް ރައީސުލްޖުމްހޫރިއްޔާގެ އޮފީހަށް ވަނީ ފޮނުވާފައެވެ.