އޭޕްރިލްމަހު މީރާއަށް 2.60 ބިލިއަން ރުފިޔާ ބަލައިގަނެފި

ހުސްވި އޭޕްރިލްމަހު ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އަށް އާމްދަނީގެ ގޮތުގައި 2.60 ބިލިއަން ރުފިޔާ ބަލައިގަނެފިއެވެ.

މީރާއިން ނެރެފައިވާ އާމްދަނީ ރިޕޯޓަށް ބަލާއިރު، މިދިޔަ އަހަރުގެ އޭޕްރިލްމަހާ އަޅާބަލާއިރު، މިއަހަރުގެ އޭޕްރިލްމަހު އެއޮތޯރިޓީއަށް ބަލައިގަތް އާމްދަނީ ވަނީ 22.7 އިންސައްތަ އިތުރުވެފައެވެ. މިއަހަރުގެ އޭޕްރިލްމަހު އާމްދަނީގެ ގޮތުގައި މީރާއަށް 2.60 ބިލިއަން ރުފިޔާ ބަލައިގަނެފައިވާއިރު، މިދިޔަ އަހަރުގެ މި މުއްދަުގައި ބަލައިގަނެފައިވަނީ، 1.6 ބިލިއަން ރުފިޔާއެވެ.

އޭޕްރިލްމަހު މީރާއަށް ބަލައިގަތް އާމްދަނީ އިތުރުވުމުގެ މައިގަނޑު ސަބަބެއްކަމަށް އެ އިދާރާއިން ފާހަގަކޮށްފައިވަނީ، ޓޫރިޒަމް ދާއިރާގެ ޖީ.އެސްޓީ އަދި ގްރީން ޓެކުހުގެ ގޮތުގައި ލިބުނު އާމްދަނީ އިތުރުވުމެވެ. އެގޮތުން މިދިޔަ އަހަރުގެ މާޗްމަހާ އަޅާބަލާއިރު، މިއަހަރުގެ އެ މުއްދަތުގެ ތެރޭގައި ދިވެހިރާއްޖެއަށް ޒިޔާރަތްކޮށްފައިވާ ފަތުރުވެރިންގެ %4.8 އިތުރުވެފައިވުމުގެ ސަބަބުން، ޓޫރިޒަމް ދާއިރާގެ އާމްދަނީ ވަނީ އިތުރުވެފައެވެ. މީގެ އިތުރުން މިއަހަރުގެ ޖެނުއަރީމަހުން ފެށިގެން ގްރީން ޓެކުހުގެ ރޭޓު ބޮޑުވުމާއި އަދި މިދިޔަ ޑިސެންބަރުމަހުން ފެށިގެން އެއަރޕޯޓް ޓެކުހާއި ފީގެ އާމްދަނީ އިތުރުވުމަކީވެސް އޭޕްރިލްމަހުގެ ޖުމުލަ އާމްދަނީ އިތުރުވުމުގެ މައިގަނޑު ސަބަބުތައްކަމަށް މީރާއިން ފާހަގަކުރެއެވެ.

އޭޕްރިލްމަހު އެންމެގިނައިން އާމްދަނީ ލިބުނީ:

- ޖީއެސްޓީ: 1.65 ބިލިއަން ރުފިޔާ

- ގްރީން ޓެކްސް: 226.7 މިލިއަން ރުފިޔާ

- އާމްދަނީން ނަގާ ޓެކުހުން: 176.5 މިލިއަން ރުފިޔާ

- އެއާޕޯޓް ޑިވެލޮޕްމަންޓް ފީ: 155.3 މިލިއަން ރުފިޔާ

- ޑިޕާޗާ ޓެކްސް: 153.2 މިލިއަން ރުފިޔާ

- ޓޫރިޒަމް ލޭންޑް ރެންޓް: 9.4 މިލިއަން ރުފިޔާ

އޭޕްރިލްމަހުގެ ތެރޭގައި އަންދާޒާ ކުރިވަރަށްވުރެވެސް ލިބުނު އާމްދަނީ ވަނީ އިތުރުވެފައެވެ. އެގޮތުން މިދިޔަ އަހަރުގެ އޭޕްރިލްމަހާ އަޅާބަލާއިރު، ހުސްވި އޭޕްރިލްމަހު ލިބޭނޭކަމަށް އަންދާޒާކުރި އާމްދަނީ ވަނީ 1.6 އިންސައްތަ އިތުރުވެފައެވެ. މީގެ މައިގަނޑު ސަބަބަކީ ޓޫރިޒަމް ދާއިރާގެ ޖީ.އެސްޓީ އަދި ޓޫރިޒަމް ލޭންޑް ރެންޓު ގޮތުގައި ލިބުނު އާމްދަނީ އިތުރުވުމެވެ.

މީގެ އިތުރުން މިއަހަރުގެ ޖެނުއަރީމަހު ލިބިފައިވާ އާމްދަނީގެ 14.8 އިންސައްތަ އަކީ ކުރީގެ މުއްދަތުތަކަށް ޓެކްސް ދައްކާ ފަރާތްތަކުން ދައްކާފައިވާ ފައިސާކަމުން، މިއީވެސް މި މުއްދަތުގައި ލިބުނު އާމްދަނީ އިތުރުވުމުގެ އެއްސަބަބުކަމަށް މީރާއިން ފާހަގަކުރިއެވެ.