މަޖިލީހަށް މިސާލު ދައްކަވައިދެއްވި މެންބަަރަަކަށް ހައިތަމް!

ނަވާރަ ވަނަ ރައްޔިތުންގެ މަޖިލީހަކީ އެއްފަހަރު ބޭނުންކުރުމަށްފަހު އެއްލާލާ ޕްލާާސްޓިކް، ނުވަތަ ސިންގަލް ޔޫސް ޕްލާސްޓިކުން ދުރުވެފައިވާ ތަނަކަށް ހެއްދެވުމަށް އެމަޖިލީހުގެ ރައީސް ނިންމެވުމީ ތިމާވެށްޓަށް ލޯބިކުރާ ގިނަބަޔެއްގެ މޫނަށް އުފާވެރިކަން ގެނުވި ކަމެކެެވެ. ޕްލާސްޓިކްގެ ނުރައްކަލުން ރާއްޖެ ސަލާމަތްކުުރުމަށް ގިނަބަޔަކު އަތުކުރި އޮޅާލާފައިވާއިރު، ގާނޫނު ހަދާ މަޖިލީހުން އެކަމަށް ތަރުހީބު ދިނުމަކީ މުހިންމު ކަމެއް ކަމަށް ގިނަ ފަރާތްތަކުން ދެކެއެވެ.

މަޖިލީހަކީ ޕްލާސްޓިކުން ދުރުވެފައިވާ ތަނަކަށް ހައްދަވާނެކަމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވިތާ ދުވަސްތަކެއް ފާއިތުވެގެން ހިނގައްޖެއެވެ. އެހެނަސް އަމަލީ ސިފައިގައި އެކަމުގެ ކުލަތައް ފެންނާާކަށް ނެެތެވެ. އޭގެ ބަދަލުގައި މަޖިލީހުގެ ޖަލްސާތަކާއި ކޮމެޓީތަކުގައި އަދިވެސް ބޭނުންކުރަނީ ޕްލާސްޓިކް ފެންފުޅި ފަދަ ތަކެއްޗެވެ.

ނަމަވެސް މަޖިލީހުގެ މިއަދުގެ ޖަލްސާގައި އެންމެ މެންބަރަކު ނަމަވެސް ވަނީ މިސާލު ދައްކަވައި، މަޖިލީހުގެ މެންބަރުންނަކީވެސް ޕްލާސްޓިކާއި ދުރުގައި އުޅެވޭނެ ފަރާތްތަކެއްކަން ދައްކުވައިދީފައެެވެ. މިއަދުގެ ޖަލްސާއަށް މައްޗަންގޯޅި ދެކުުނު ދާއިރާގެ މެންބަރު އަހުމަދު ހައިތަމް ވަޑައިގެންނެވީ ބިއްލޫރި ފުޅިއަކާއި އެކުގައެވެ.

ހައިތަމް އެ ދެއްކެވި ފުރިހަަމަ މިސާލަށް ސޯޝަލް މީޑިޔާގައި ގިނަބަޔަކު ތައުރީފު ކުރަމުންދާއިރު، މިއަދުގެ ޖަލްސާގައި މަޖިލީހުގެ ރައީސްވެސް ވަނީ އެބޭފުޅާއަށް ތައުރީފްކުރައްވާފައެެވެ. ހައިތަމްގެ މިސާލުން ދެން ތިއްބެވި މެންބަރުންވެސް މަޖިލީހުގެ ތަޅުމުން ޕްލާސްޓިކްގެ ބޭނުން ހަމަ މަދުކުރެވިދާނެއެވެ.

ފާހަގަކޮށްލެވޭ ގޮތުގައި މިއީ މަޖިލިސް މެންބަރަކު ޕްލާސްޓިކް ފުޅި ބޭނުންކުރުން ހުއްޓާލި ފުރަަތަަމަ ފަހަރެއް ނޫނެވެ. ނިމިދިޔަ ދައުރުގެ ފަހުކޮޅުގައި ދިއްގަރު ދާއިރާގެ މެންބަރު އަހުމަދު ފާރިސް މައުމޫންވެސް ވަނީ މަޖިލީހުގެ ތަޅުމުގައި ބިއްލޫރި ފުޅިއެއް ބޭނުންކުރައްވާފައެެވެ.