ރަނގަޅަށް ދިރާސާނުކޮށް ފަތުވާ ނުދީ: ޑރ.ޝަހީމް

އިސްލާާމްދީނުގެ ކަންކަން ރަނގަޅަށް ދިރާސާނުކޮށް ފަތުވާނުދިނުމަށް އިސްލާމިކް ޔުނިވަރސިޓީ އޮފް މޯލްޑިވްސްގެ ކުރީގެ ޗާންސެލަރ ޑރ.މުހައްމަދު ޝަހީމް އަލީ ސައީދު، އައްޝައިހް އަލީ ޒައިދަށް ނަސޭހަތްތެރިވެ ވަޑައިގެންފިއެވެ.

ޑރ.ޝަހީމް ފޭސްބުކް ޕޯސްޓެއް މެދުވެރިކޮށް މިހެން ވިދާޅުވީ ޓެކްސް ނެގޭނީ މުދަލު ޒަކާތް ނެގުމަށްފަހު، އޭގެން ނުވާނަމަ ކަމުގައި ވިދާޅުވެ ޝައިޚް އަލީ ޒައިދު ކުރެއްވި ޓްވީޓެއްގެ ހަބަރަށް ރައްދުދެއްވަމުންނެވެ.

ޑރ.ޝަހީމް ވިދާޅުވީ ޒަކާތަކީ އަށް ބަޔަކަށް ބެހިގެންވާ އެއްޗެއް ކަމަށާއި، އޭގެން އުމްރާނީ ތަރައްގީއަަށާއި ސަރުކާރު ހިންގުމަށް ހަރަދު ނުކުރެވޭނެކަމަށެވެ. އަދި ދައުލަތް ހިންގުމަށް ޒަކާތުގެ އިތުރުން ޓެކްސްވެސް ނަގައި، އަދުލުވެރިކަމާއި އެކު ބޭނުންކުރަން ޖެހޭނެކަމަށް ޑރ.ޝަހީމް ވަނީ ފާހަގަކުރައްވާފައެވެ.

ޓެކްސް ނެގުމަކީ އުމަރުގެފާނާއި ރަސޫލާ ސައްލަﷲ އަލައިހި ވަސައްލަމްގެ ހަޔާތުންވެސް އޭގެ އަސްލުތައް ފެންނަން އޮތްކަމެއް ކަމުގައި ފާހަގަކުރައްވާ ޑރ.ޝަހީމްވަނީ ޒަކާތް އަދި ޓެކްސް ނެގުމަކީ އިސްލާމީ އެހެނިހެން ގައުމުތަކުގައިވެސް އަމަލުކުރާ ނިޒާމެއްކަމަށް ވިދާޅުވެފައެވެ.

ޒަކާތާއި ޓެކްސް އެއްކޮށް ނެގުން ކުރަންވާނީ ވިޔަފާރިވެރިންނަށް ފަސޭހަވާނެ ގޮތަކަށްކަމަށްވެސް ޑރ.ޝަހީމް ވަނީ ބަޔާންކުރައްވާފައެވެ.

ޑރ.ޝަހީމްގެ ފޭސްބުކް ޕޯސްޓް ނިންމަވާލައްވަމުން އެބޭފުޅާ ވަނީ ޝައިޚް އަލީ ޒައިދުގެ އަރިހުގައި މިފަދަ ކަންކަމުގައި އިލްމީ ދިރާސާކުރުމަށް އެދިވަޑައިގަންނަވާފައެވެ.