ނަމާދު ވަގުތުތަކުގައި ތޮއްޑޫގެ ކުޅިވަރު ކުޅޭ ތަންތަން ބަންދުކުރަން ނިންމައިފި

ނަމާދު ވަގުތުތަކުގައި ރަށުގެ ކުޅިވަރު ކުޅޭ އެންމެހާ ސަރަހައްދުތައް ބަންދުކުރުމަށް ތޮއްޑޫ ކައުންސިލުން ނިންމައިފިއެވެ.

ތޮއްޑޫ ކައުންސިލުން އިއްޔެ ނެރުނު އިޢުލާނެއްގައި ބުނެފައިވަނީ، އިސްލާމީ ރިވެތި އާދަކާދަތައް ދެމެހެއްޓުމަށާއި ނަމާދަށް ދޭ ސަމާލުކަން އިތުރުކުރުމުގެ މަގުސަދުގައި، ކޮންމެ ދުވަހެއްގެ ނަމާދު ވަގުތުތަކާ ދިމާކޮށް ކުޅިވަރު ކުޅޭ ތަންތަން ބަންދުކުރަން ނިންމާފައިވާ ކަމަށެވެ.

މި ނިންމުމުގެ ދަށުން، ކޮންމެ ދުވަހެއްގެ އިރުއޮއްސި 18:00 އިން ފެށިގެން ރޭގަނޑު 20:00 އާ ދެމެދު ކުޅިވަރު ކުޅޭ އެންމެހާ ތަންތަން ބަންދުވާނެއެވެ.

މީގެ އިތުރުން، ހުކުރު ދުވަހުގެ ހެނދުނު 10:30 އިން ފެށިގެން މެންދުރުފަހު 14:00 އާ ހަމައަށްވެސް ކުޅިވަރު ކުޅޭ ސަރަހައްދުތަކުގައި އެއްވެސް ހަރަކާތެއް ހިންގުމަކީ މަނާކަމެއްގެ ގޮތުގައި ކައުންސިލުން ވަނީ ކަނޑައަޅާފައެވެ.

ކައުންސިލުން އިތުރަށް ހާމަކޮށްފައިވާ ގޮތުގައި، މި އެންގުމާ އެއްގޮތަށް ކަންކަން ހިނގަމުންދޭތޯ ބަލައި މޮނިޓަރ ކުރުމުގެ ޒިންމާ ވަނީ އެ ރަށު ކައުންސިލްގެ ޔޫތު އެސޯސިއޭޓް އަޒްޒާމް އަޙްމަދާއި، ސްޕޯޓްސް ކައުންސެލަރ މުޙައްމަދު މާޒިންއާ ހަވާލުކުރެވިފައެވެ.

ތޮއްޑޫ ކައުންސިލުން މިފަދަ ނިންމުމެއް ނިންމާފައިވާއިރު، ނަމާދު ވަގުތު ޖެހުމުން، ވަކި ވަގުތެއް ވަންދެން ކުޅިވަރުކުޅުން މަނާކޮށް، ކުޅިވަރުކުޅޭ ތަންތަނުގައި ނަމާދު ކުރެވޭނެ އިންތިޒާމް ހަމަޖައްސަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ހޯމަ ދުވަހު ބޭއްވެވި ނޫސްވެރިންގެ ބައްދަލުވުމުގައި ވިދާޅުވެފައެވެ.