މަސައްކަތްތެރިންގެ ޙައްޤުތައް ރައްކާތެރިކުރުމަކީ ދިވެހި ސަރުކާރުގެ އަމާޒެއް: ހައިދަރު

މަސައްކަތްތެރިންގެ ޙައްޤުތައް ރައްކާތެރިކުރުމަކީ ދިވެހި ސަރުކާރުގެ އަމާޒެއް ކަމުގައި މަތީ ތައުލީމާއި ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

ވަޒީރު މިގޮތަށް ވިދާޅުވީ މިއަދު ފާހަގަކުރަަމުންދާ ދުނިޔޭގެ އިޖުތިމާއީ އަދާލަތު ދުވަހާއި ގުޅިގެންނެވެ.

ދުނިޔޭގެ ފެންވަރުގައި ފާހަގަކުރެވޭ އިޖުތިމާޢީ އަދާލަތު ދުވަސް ފާހަގަކުރަނީ ކޮންމެ އަހަރެއްގެ ވެސް ފެބްރުއަރީ މަހުގެ 20 ވަނަ ދުވަހުއެވެ. އެގޮތުން، މި ދުވަސް ފާހަގަކޮށް، މިނިސްޓްރީގެ ފަރާތުން މިނިސްޓަރ ޑރ. ހައިދަރު ދެއްވި ޚިތާބުގައި، އިޖްތިމާޢީ ޢަދުލަކީ ހަމައެކަނި ޚިޔާލެއް ނޫންކަމަށާއި، އެއީ ސުލްޙަވެރި ފާގަތި ޤައުމެއްގެ އަސާސްކަމަށް ވަޒީރު ވަނީ ވިދާޅުވެފައެވެ.

މީގެ އިތުރުން، އެމަނިކުފާނު ވިދާޅުވީ، ދިވެހި ދަޢުލަތުގެ އަޒުމަކީ މަސައްކަތުގެ މާޙައުލުގެ ސަލާމަތާއި ޞިއްޙީ ރައްކާތެރިކަމުގެ ޤާނޫނު އެކަށީގެންވާ ގޮތުގައި ތަންފީޒުކުރުމުގެ ތެރެއިން މަސައްކަތްތެރިންގެ ޙައްޤުތައް ރައްކާތެރިކުރުމާއެކު ދިވެހިރާއްޖޭގެ ޒުވާނުންގެ ހުނަރާއި ޤާބިލުކަން ޒަމާނާއި އެއްވަރަށް ތަރައްޤީކުރުން ކަމަށެވެ.

މިނިސްޓަރ ޑރ. ހައިދަރުގެ ޚިތާބު ނިންމަވާލައްވަމުން އެމަނިކުފާނު ވަނީ އެކުވެރިކަމާއެކު މަސައްކަތްކޮއްގެން، އިންސާފާއި، ހަމަހަމަކަމާއި، އަބުރުވެރިކަން ކޮންމެ މީހަކަށްވެސް ލިބިދެވޭނެ ރާއްޖެއަކާއި ދުނިޔެއެއް އުފެއްދުމަށް އެންމެން ގުޅިގެން މަސައްކަތްކުރުމަށް ގޮވާލައްވައިފައެވެ.