ބާކީ އެއްމެޗު އޮއްވައި ޒަވީ މަގާމުން ވަކިކޮށްފި

ބާސެލޯނާ އިން ލީގުގައި ބާކީ އެއް މެޗު އޮއްވައި އެޓީމުގެ ކޯޗު ޒަވީ ހަނާންޑޭޒް މަގާމުން ވަކިކޮށްފިއެވެ.

މިދިޔަ އަހަރު ސްޕެނިޝް ލަލީގާގެ ޗެންޕިއަންކަން ބާސެލޯނާއަށް ހޯދައިދިން އެކުލަބުގެ ލެޖެންޑް ޒަވީ މަގާމުން ވަކިކޮށްފައި މިވަނީ މިހާރުގެ މެނޭޖްމަންޓުގެ ވިސްނުމާ ދެކޮޅަށް ނޫސްވެރިންގެ ބައްދަލުވުމުގައި އޭނާ ވާހަކަ ދެއްކުމުންނެވެ.

މިއާއެކު ކޯޗުކަމުން އޭނާ ވަކިކުރުމަށް ބާސެލޯނާގެ ގިނަ ބޯޑު މެމްބަރުން ވަނީ ލަޕޯޓާ އަށް ޕްރެޝަރުކޮށްފައެވެ. އަދި މި ސަބަބާއި ހުރެ އޭނާ ކޯޗުކަމުން ވަކިކުރިއިރު ޒަވީ ވަނީ މިދިޔަ ޖެނުއަރީ މަހު މި ސީޒަނަށް ފަހު ބާސެލޯނާއިން ވަކިވާނެކަން އިއުލާނުކޮށްފަ އެވެ. ނަމަވެސް އެނިންމުން އޭނާ ބަދަލުކުރީ ބާސެލޯނާގެ ނަތީޖާތައް ރަނގަޅުވުމާއި، މެނޭޖްމަންޓުން އޭނާ މަޑުކުރުމަށް އެދެމުން ދިއުމުންނެވެ.

މީޑިއާ ރިޕޯޓްތައް ބުނާގޮތުގައި ޒަވީގެ ބަދަލުގައި ބާސެލޮނާގެ ކޯޗުކަމަށް ގެންނާނީ ޖަރުމަނުގެ ބަޔާން މިއުނިކްގެ ކުރީގެ ކޯޗު ހަންސީ ފްލިކެވެ. އަދި އައު ކޯޗަކަށް ގެންނަ ފްލިކްއާއެކު ބާސެލޯނާއިން މާދަމާ ދެ އަހަރުގެ އެއްބަސްވުމެއްގައި ސޮއިކުރާނެ އެވެ. އޭނާ ކޯޗުކަމަށް ގެނައުމަށް ކުރަންޖެހޭ މަސައްކަތް ކުރުމަށް ބާސެލޯނާގެ އިސް ބައެއް ވެރިން ވަނީ ހުސްވި ހަފުތާގައި ލަންޑަނުގައި ބައްދަލުކޮށްފަ އެވެ.