ރައީސް ޔާމީން އުފައްދާ ޕާޓީ އީސީއަށް ފޯމް ހުށަހަޅައިފި
ލިޔުންތެރިޔާ
ޝަފްރާޒް އަހްމަދު
ރައީސް ޔާމީން އިސްވެ ހުންނަވައި އުފައްދާ "ޕީޕަލްސް ނޭޝަނަލް ކޮންގްރެސް" ގެ ނަމުގައި ސިޔާސީ ޕާޓީއެއް އުފެއްދުމަށް ޕީޕީއެމްގެ ނައިބު ރައީސް އަދި ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ އިލެކްޝަންސް ކޮމިޝަނަށް ފޯމު ހުށަހަޅުއްވައިފިއެވެ.
އިލެކްޝަންސް ކޮމިޝަނުން ވަނީ މިކަން ކަށަވަރުކޮށްދެއްވާފައެވެ.
އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވީ، ޕީޕަލްސް ނޭޝަނަލް ކޮންގްރެސްގެ ނަމުގައި ޕާޓީއެއް އުފެއްދުމަށް އިލެކްޝަންސް ކޮމިޝަނަށް ހުށަހެޅި ލިއުންތަކަށްބަލައި، އެއްވެސް މައްސަލައެއް ނެތްނަމަ މި ހަފްތާގެތެރޭގައި ޕާޓީ އުފެއްދުމުގެ ހުއްދަދެއްވާނެކަމަށެވެ. އަދި ހުށަހެޅި ލިޔެކިއުންތަކުގައި މައްސަލައެއް އޮތްނަމަ އެކަން އިސްލާހުކުރުމަށްފަހު ވަކި މުއްދަތެއްގެ ތެރޭގައި ހުށަހެޅުމަށް ފުރުސަތު ދެއްވާނެކަމަށް ޝަރީފް ވިދާޅުވިއެވެ.
ރައީސް ޔާމީން ވިދާޅުވީ ޕީއެމްގެ މުސްތަގްބަލާ މެދު ގޮތެއް ނުނިމި ކަށި ކުނބުރު ވަލެއްގެ ތެރޭގައި ހިނގަން ބޭނުން ނުވާ ކަމަށާއި، އެމަނިކުފާނަށް ތާއިދު ކުރައްވާ ޕީޕީއެމްގެ އާންމު މެންބަރުންގެ ހިތްތަކަށް ތަސައްލީއެއް ގެނެސްދެވެން އޮތީ އާ ޕާޓީއެއް ހަދައިގެން ކަމަށެވެ.
ރިޔާސީ އިންތިޚާބުގެ ފަހުން އައު ފަސް ޕާޓީއެއް އުފެއްދުމަށް އިލެކްޝަންސް ކޮމިޝަނަށް ހުށަހަޅާފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
