ފެނަކައިން ދެމުން އަންނަ ޚިދުމަތްތަކަށް މިހާރު އޮންލައިންކޮށް އެދެވޭނެ!

ފެނަކަ ޑިޖިޓަލައިޒް ކުރުމުގެ މަސައްކަތުގެ ތެރެއިން ހިދުމަތްތަކަށް އޮންލައިންކޮށް އެދެވޭ ގޮތަށް ހަދައިފިއެވެ.

މި ޚިދުމަތް ތަޢާރަފްކުރުމުގެ މަޤްސަދަކީ، އެ ކުންފުންޏަކީ އަސާސީ ގިނަ ހިދުމަތްތަކަކަށް ވަރަށް ގިނަ ރައްޔިތުން ބަރޯސާވާ ކުންފުންޏަކަށް ވުމުން، އެ ކުންފުނިން ދެމުން އަންނަ ޚިދުމަތްތަކުގެ ފެންވަރު ރަނގަޅު ކުރުން ކަމުގައި ފެނަކައިން ވަނީ ވިދާޅުވެފައެވެ.

ފެނަކައިގެ ޑިޖިޓަލް މަގުޗާޓަކީވެސް، އެފަދަ ގިނަ ބަދަލުތަކަކާއި ކުރިއެރުންތަކެއް ގެނެސްދޭނެ ކަންކަމުގެ މައްޗަށް އެކުލެވޭ މަގުޗާޓެއް ކަމަށް އެ ކުންފުނިން ވިދާޅުވެއެވެ.

ކުންފުނީގެ ހިދުމަތްތަކަށް ބޭނުންވާ ޑޭޓާ ހިމެނޭ ސޮފްޓްވެއާ އަދި އެޗްއާރު ސިސްޓަމްގެ އިތުރުން ކުންފުނިން ދޭ ހިދުމަތްތަކަށް އޮންލައިންކޮށް އެދެވޭނެ ޕޯޓަލްތަކެއްވެސް މި މަގުޗާޓުގައި ހިމެނޭކަމަށާއި އެއީ ފެނަކަ ޓެންޑާ ޕޯޓަލް އަދި މައި ފެނަކަ ޕޯޓަލްކަމަށް ވަނީ ވިދާޅުވެފައެވެ.

ފެނަކައިން ވިދާޅުވާ ގޮތުގައި މައި ފެނަކަ ޕޯޓަލްގެ ޒަރީއާއިން އެކި އެކި ކަންކަމުގައި ފެނަކަ ބްރާންޗްތަކަށް އައުމުގެ ދަތިތަކަށް ހައްލެއް ލިބިގެން ގޮސް އެކަންވެސް ލުއި ފަސޭހަވެގެންދާނެއެވެ.

އެގޮތުން އެ ޕޯޓަލް ފަރުމާކުރެވިގެންދާނީ، ޚިދުމަތްތަކުގެ ޕްކޭޖްތައް އެކުލަވާލެވި، ކަސްޓަމަރުންނަށް ފަސޭހަވާނެހެން ވަކިވަކި ޕެކޭޖްތައް ނެގޭނެހެންކަމުގައި އެ ކުންފުނިން ވަނީ ވިދާޅުވެފައެވެ.

ފެނަކައިން ވިދާޅުވީ އެ ޕޯޓަލް ގާއިމްކުރެވެނީ، ޓެންޑާއަށް ބިޑް ހުށައެޅުމަށް ކަނޑައެޅިފައިވާ ވަގުތުގައި އެކަނި ހުށައެޅޭ ގޮތަށް ކަމަށެވެ. ވަގުތު ހަމަވުމުން އެ ފުރުސަތު އޮޓަމެޓިކުން ބަންދުވާނެއެވެ. އަދި ބިޑްތަކުގެ މައުލޫމާތާއި، ބިޑް ހުށައެޅި ފަރާތްތަކުގެ މައުލޫމާތުވެސް، ކުންފުނީގެ އެއްވެސް ފަރާތަކަށް ފެންނާނީ، ވަގުތުހަމަވެ، ބިޑް ހުށައަޅާ ލިންކް ބަންދުވުމުންނެވެ.