ގިިނީސް އިން ބ. އަތޮޅު ކައުންސިލު ޖޫރިމަނާކުރިކަމަށް ބުނެ ފަތުރަނީ ދޮގެއް: ކައުންސިލު
ބ. އަތޮޅު ކައުންސިލުން ޤަވާއިދާއި ޚިލާފުވެގެން ގިނިސް ވޯލްޑް ރެކޯޑްސްއިން ބ. އަތޮޅު ޖޫރިމަނާކުރިކަމަށް ބުނެ ފަތުރަނީ ދޮގެއް ކަމަށް އެ ކައުންސިލުން ބުނެފިއެވެ.
ބ. އަތޮޅު ކައުންސިލުން ޤަވާއިދާއި ޚިލާފުވިކަމަށް ބުނެ ބޮޑު އަދަދަކުން ޖޫރިމަނާކޮށްފައިވާ ކަމަށް ބުނެ ރިޕޯޓުކޮށްފައިވަނީ ރާއްޖޭގެ ނޫހަކުންނެވެ. އެގޮތުން އެ ނޫހުން ރިޕޯޓުކުރި ގޮތުގައި ބ. އަތޮޅު ކައުންސިލް ޖޫރިމަނާ ކުރަން ނިންމި ސަބަބަކީ ގިނީސްގެ ހުއްދަ ނެތި, ގިނީސް ގެ ނަން ޖަހައިގެން މެޑަލްތަކެއް ތައްޔާރުކޮށް އިވެންޓުގައި ބައިވެރިވި ފަރާތްތަކަށް ދިނުމެވެ.
އަދި އެކަމުގެ ސަބަބުން ބ. އަތޮޅު ކައުންސިލް 10,000 ޕައުންޑާއި 5000 ޕައުންޑާއި ދެމެދުގެ އަދަދަކުން ޖޫރިމަނާ ކުރަން ނިންމައިފައިވާ ކަމަށް އެ ނޫހުން ރިޕޯޓުކޮށްފައިވެއެވެ.
އެކަމާއި ގުޅިގެން އެ ކައުންސިލުން މިއަދު ނެރުނު ބަޔާނެއްގައި ބުނީ، އެ ނޫހުން ރިޕޯޓުކުރި ދޮގު ކަމަށާއި އެއީ ވަރަށް ޒިންމާދާރުކަން ކުޑަ ހަޑިމުޑުދާރު ޢަމަލެއް ކަމަށެވެ.
"މި ޚަބަރުގެ ސަބަބުން މި ހަރަކާތުގައި ޝާމިލުވި ހުރިހާ ފަރާތްތަކަށާއި އަދި ޖުމްލަކޮށް ބ. އަތޮޅުގެ ރައްޔިތުންނަށް މިކަމުގެ ސައްޚަ މައުލޫމާތު ވަނީ އޮޅޭގޮތް މެދުވެރިވެފައެވެ،" އެ ބަޔާނުގައި ބުންޏެވެ.
އެ ބަޔާނުގައި އެ ކައުންސިލުން ވަނީ ގިނީސްއިން އެފަދަ ޖޫރިމަނާއެއް އަދި އެ ޝަރަފު ގެއްލިދާނެ ފަދަ އެއްވެސް އިޝާރާތެއް އެ ކައުންސިލަށް މިއަދާއި ހަމައަށް ކޮށްފައިނުވާކަން ކަށަވަރުކޮށްދީފައެވެ. އަދި އެ ނޫހުން ކުރި ރިޕޯޓާއި ގުޅިގެން ޤާނޫނީ ފިޔަވަޅު އެޅުމުގެ މަސައްކަތްކުރަމުންދާ ކަމަށް ވެސް އެ ކައުންސިލުން ބުންޏެވެ.
ބ. އަތޮޅު ކައުންސިލުން އެފަދަ ބަޔާނެއް ނެރުނު ނަމަވެސް، ގިނީސްގެ ވެބްސައިޓުން އަދިވެސް ބ. އަތޮޅުގެ އެ ހަރަކާތުގެ މައުލޫމާތު ފެންނަން ނެތްކަން ފާހަގަކުރެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
