ގަދަވަޔާއެކު މަގު މައްޗަށް ގަހެއް ވެއްޓި އުޅަނދު ތަކަކަށް ގެއްލުންވެއްޖެ!

ވިއްސާރަޔާއި، ގަދަ ވަޔާއިއެކު، މާލޭގެ މަގުމައްޗަށް ގަހެއް ވެއްޓި އުޅަނދުތަކަކަށް ގެއްލުން ވެއްޖެއެވެ.

މި ކަމާއި ގުޅިގެން 'ވޮއިސް' އަށް މަޢުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، މާލޭގެ ރެހެންދި ހިނގުމުގައި ހުރި ގަހެއް ވެއްޓިފައިވާ ކަމުގެ މަޢުލޫމާތު މިއަދު ހެނދުނު 10:30 ގައި ފުލުހުންނަށް ލިބިފައިވާ ކަމަށެވެ.

އަދި ގަސް ވެއްޓިފައިވާ ސަރަހައްދަށް ފުލުހުން ގޮސް، ފުލުހުންނާއި މާލެ ސިޓީ ކައުންސިލް ގުޅިގެން އެ ގަސް ނަގައި، އެތަން ހަމައަކަށް އެޅުވުމުގެ މަސައްކަތް ކުރައްވަމުންދާ ކަމަށްވެސް އޮފިޝަލު ވިދާޅުވި އެވެ.

މިއާއެކު މީޑިއާ އޮފިޝަލް ވިދާޅުވީ، މި ހާދިސާގައި އެތަނުގައި ހުރި ކާރު ތަކަކާއި ސައިކަލް ތަކަކަށް ގެއްލުންވެފައިވާ ކަމަށެވެ.

ވައިގަދަވެ، ބޯކޮށް ވާރޭ ވެހޭނެ ކަމަށް ލަފާކޮށް މެދު ރާއްޖެ ތެރެއަށް ރީނދޫ ސަމާލު ނެރެފައި ވާއިރު، މިއަދު ހެނދުނުން ފެށިގެން މާލެއަށްވެސް ވައިގަދަވެ ބޯކޮށް ވާރޭވެހެމުންދާކަން ފާހަގަކޮށްލަންޖެހެއެވެ.