އިޔާދަކުރަނިވި ހަކަތައިގެ ޤާބިލުކަން ދެ ގުނައަށް ވުރެ މައްޗަށް ގެންގޮސްފިން: އަލީ ޝަރީފް

ރާއްޖޭގެ ކަރަންޓުގެ 33 އިންސައްތަ އިޔާދަކުރަނިވި ހަކަތައަށް ބަދަލުކުރުމުގެ ލަނޑުދަނޑި ރައީސް ޑރ. މުޙައްމަދު މުޢިއްޒު އިޢުލާނު ކުރެއްވިއިރު 53 މެގަވޮޓުގައި ހުރި އިންސްޓޯލްޑް ކެޕޭސިޓީ މިހާރު 126 މެގަވޮޓަށް ގެންގޮސްފައިވާ ކަމަށް އެންވަޔަރަންމެންޓް މިނިސްޓަރު ޢަލީ ޝަރީފު މިއަދު ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، ރާއްޖޭގެ އެކި ސަރަޙައްދުތަކުގައި ހިންގި މަޝްރޫޢުތައް މެދުވެރިކޮށް އެ ޢަދަދަށް ކެޕޭސިޓީ މައްޗަށް ޖައްސައިފައިވެއެވެ. އެއީ 2023 ވަނަ އަހަރާ ހަމައަށް ހުރި މިންވަރާ އަޅައިބަލާއިރު ދެ ގުނައަށް ވުރެ ވެސް ބޮޑު އިތުރުވުމެކެވެ.

އެގޮތުން، ރ. އަތޮޅާއި ބ. އަތޮޅުގެ ޖުމްލަ 23 ރަށެއްގައި 6.5 މެގަވޮޓުގެ ސޯލާ ޕީވީ ނިޒާމާއި 10 މެގަވޮޓުގެ ބެޓެރީ ސިސްޓަމެއް ބަހައްޓައި މިދިޔަ ޖުލައި މަހު އެ ނިޒާމުތައް ބޭނުންކުރަން ފެށި ކަމަށް މިނިސްޓަރު ވިދާޅުވިއެވެ.

މީގެ އިތުރުން، އެ ރަށްތަކުގެ ތެރެއިން ރ. ރަސްމާދޫ ރ. ވާދޫ ރ. ކިނޮޅަސް އަދި ބ. ކުޑަރިކިލުގައި ފަސް ގަޑިއިރާއި ހަ ގަޑިއިރާ ދެމެދުގެ ވަގުތަކަށް ޖަނެރޭޓަރު ނިއްވައިލައި ހަމައެކަނި އިޔާދަކުރަނިވި ހަކަތައިން ކަރަންޓު ފޯރުކޮށްދެމުންދާ ކަމަށް މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވި ގޮތުގައި މި ކެޕޭސިޓީ އިތުރުވުމާ އެކު ކަރަންޓު އުފެއްދުމަށް އަހަރެއްގެ މައްޗަށް އަންދާ ޑީސަލުން 3.1 މިލިއަން ލީޓަރު ސަލާމަތް ކުރެވެއެވެ. އެހެންކަމުން، އެ ބަދަލުގެ ސަބަބުން ޖައްވަށް ދޫކުރާ ކާބަންޑައިއޮކްސައިޑުގެ ތެރެއިން 8400 ޓަނު މަދުކުރެވޭނެ ކަމަށް އެ ވުޒާރާއިން ލަފާކޮށްފައިވެއެވެ.