ދިމިޝްގުގައި ހުންނަ އީރާނުގެ ކޮންސިއުލޭޓަށް ދިން މިސައިލް ހަމަލާ ދިވެހި ސަރުކާރުން ކުށްވެރި ކޮށްފި
ސީރިއާގެ ވެރިރަށް ދިމިޝްގުގައި ހުންނަ އީރާނުގެ ކޮންސިއުލޭޓަށް ދިން މިސައިލް ހަމަލާ ދިވެހި ސަރުކާރުން ކުށްވެރި ކޮށްފިއެވެ.
މި ކަމާއި ގުޅިގެން ޚާރިޖީ ވުޒާރާއިން ނެރުނު ބަޔާނެއްގައި ބުނީ މި ހަމަލާ ދިވެހި ސަރުކާރުން ހަރުކަށި އިބާރަތުން ކުށްވެރި ކުރާ ކަމަށާއި، ޑިޕްލޮމެޓިކް ފެސިލިޓީތަކަށް ތަކަށް އަމާޒުކޮށް ހަމަލާ ދިނުމަކީ ބައިނަލްއަގްވާމީ ގާނޫނުތަކާ ހިލާފު ކަމެއް ކަމަށެވެ.
ޚާރިޖީ ވުޒާރާގެ މި ބަޔާނުގައި ބައިނަލްއަޤްވާމީ މުއާހަދާތަކާ އެއްގޮތްވާ ގޮތުގެ މަތިން ޑިޕްލޮމެޓިކް ތަންތަނުގެ ރައްކާތެރިކަން ދެމެހެއްޓުމުގެ މުހިންމު ކަމަށް ވެސް ވަނީ އަލު އަޅުވާލާފައެވެ. ހަމައެއާއި އެކު، މި ހާދިސާގައި ޝަހީދުވި މީހުންގެ އާއިލާތަކުގެ މެންބަރުންނަށާއި ހާލުގައި ޖެހުނު އެންމެހާ ފަރާތްތަކަށް ދިވެހި ސަރުކާރާއި ރައްޔިތުންގެ ނަމުގައި ސަރުކާރުން ވަނީ އިހްލާޞްތެރިކަމާއެކު ތައުޒިޔާ ފޮނުވާފައެވެ.
އީރާނުގެ ކޮންސިއުލޭޓަށް ދިން މިހަމަލާގައި އެ ތަނުގެ 7 މުއައްޒަފަކު މަރުވެފައިވާއިރު، އޭގެ ތެރޭގައި އީރާނުގެ އެލައިޓް ރިވޮލިއުޝަނަރީ ގާޑްސް (އައިއާރުޖީސީ) ކޮމާންޑަރެއް ކަމަށްވާ މުހައްމަދު ރެޒާ ޒާހިދީ އާއި ސީނިއާ ކޮމާންޑަރު މުހައްމަދު ހާދީ ހާޖީ ރަހީމީ ހިމެނެއެވެ. މީގެ އިތުރުންވެސް މި ހަމަލާގައި ސީރިއާގެ އާންމުންގެ ތެރެއިން 6 މީހުންވެސް ވަނީ މަރުވެފައެވެ.
އީރާނާއި ސީރިއާއިން ވަނީ މިއީ އިސްރާއީލުން ދިން ހަމަލާއެއް ކަމަށް ތުހުމަތުކޮށް، އެކަމަށް ރައްދު ދޭނެ ކަމަށް ވައުދުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
