ބީއެމްއެލްގެ ނަމުގައި ހިންގާ ސްކޭމްތައް އިތުރުވާން ފަށައިފި؛ ސަމާލުވާން އެދިއްޖެ

ބޭންކް އޮފް މޯލްޑިވްސްގެ ނަމުގައި އެކިގޮތްގޮތަށް އޮޅުވާލައިގެން ފައިސާ ހޯދުމަށް މަސައްކަތް ކުރަމުންދާތީ ސަމާލުވުމަށް އެދިއްޖެއެވެ.

ދިވެހި ފުލުހުންގެ އެންޓި ސްކޭމް ސެންޓަރުން މިއަދު ފޭސްބުކުގައި ކުރި ޕޯސްޓެއްގައި ބުނީ، ބޭންކް އޮފް މޯލްޑިވްސް (ބީއެމްއެލް) ގެ ނަމުގައި ގުޅައި، އޮޅުވާލައިގެން މީހުންގެ ބޭންކިންގް މައުލޫމާތު ހޯދުމަށް އައު އުކުޅުތަކެއް ބޭނުންކުރަމުންދާކަމަށެވެ.

ފުލުހުން ހާމަކުރި ގޮތުގައި، މި ދުވަސްވަރު ސްކޭމް ހިންގާ ފަރާތްތަކުން އާންމުންނަށް ގުޅަމުންދަނީ ބޭންކުގެ މުވައްޒަފުންގެ ގޮތުގައި ހެދިގެންނެވެ. އަދި އިތުބާރު ހޯދުމުގެ ގޮތުން ވަރަށް ފަރިތަކަމާއެކު އިނގިރޭސިބަހުން ވާހަކަދައްކާކަން ފާހަގަކުރެވިފައިވާ ކަމަށް ފުލުހުން ބުނެއެވެ.

މީގެ އިތުރުން، ބޭންކުގެ ރަސްމީ އީމެއިލް އެޑްރެސްތަކާ ވައްތަރު ގޮތްގޮތަށް ހުންނަ "[email protected]" ފަދަ ޖީމެއިލް އެކައުންޓްތައް ބޭނުންކޮށްގެން މުއާމަލާތްކުރަމުންދާކަން ވެސް ފާހަގަކުރެވިފައިވާ ކަމަށް ބުންޏެވެ.

ސްކޭމް ހިންގާ ފަރާތްތަކުން ބޭނުންކުރާ ބައެއް އުކުޅުތައް:

އެކައުންޓަށް މައްސަލައެއް ދިމާވެފައިވާ ކަމަށް ބުނުން.

ވަރަށް އަވަހަށް މައުލޫމާތު "ވެރިފައި" ކުރަންޖެހޭ ކަމަށް ބުނެ ބިރުދެއްކުން.

މައުލޫމާތު ނުދީފިނަމަ އެކައުންޓް ބްލޮކްވާނެ ކަމަށް ބުނެ އަވަސްއަރުވާލައިގެން ކަންކަން ކުރުވަން އުޅުން.

މިކަމާ ގުޅިގެން އެންޓި ސްކޭމް ސެންޓަރުން ވަނީ ބޭންކުތަކުން އެއްވެސް ހާލެއްގައި ޖީމެއިލް މެދުވެރިކޮށް މުއާމަލާތް ނުކުރާނެ ކަމަށާއި، އަދި އޯޓީޕީ ނުވަތަ އެކައުންޓުގެ ޕިން ނަންބަރު ފަދަ ސިއްރު މައުލޫމާތު ހޯދުމަށް ނުގުޅާނެކަން ހަނދާންކޮށްދީފައެވެ.

އަދި މީހަކު އިނގިރޭސިބަހުން ވާހަކަދެއްކުމަކީ އެއީ ބޭންކުގެ ރަސްމީ މުވައްޒަފެއްކަން ކަށަވަރުވާނެ ކަމެއް ނޫން ކަމަށްވެސް ފުލުހުން ބުނެއެވެ.

ރައްކާތެރިވުމަށް ކުރަންވީ ކަންކަން:

ޝައްކުކުރެވޭ ފޯނު ކޯލެއް އަތުވެއްޖެނަމަ ވަގުތުން ފޯނު ކަނޑާލުން.

އެއްވެސް މީހަކަށް ބޭންކިންގް މައުލޫމާތު ނުދިނުން.

މައުލޫމާތު ސާފުކުރުމަށް ބޭންކުގެ ރަސްމީ ނަންބަރުތަކަށް ގުޅުން.

ސްކޭމްގެ މައްސަލަތައް ލަސްނުކޮށް އެންޓި ސްކޭމް ސެންޓަރަށް ރިޕޯޓްކުރުން.

ފުލުހުން ވަނީ މިފަދަ ކަންކަމަށް ހޭލުންތެރިވެ، އަމިއްލަ މުދަލާއި ފައިސާ ރައްކާތެރިކުރުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ.