ރާއްޖޭގެ ފުރަތަމަ އެސްއީޒެޑް މަޝްރޫޢު 'ސޯލާ ސިޓީ' އެއްބަސްވުމުގައި ސޮއިކޮށްފި
ރާއްޖޭގެ ސްޕެޝަލް އިކޮނޮމިކް ޒޯން (އެސްއީޒެޑް)ގެ ދަށުން ހިންގާ ފުރަތަމަ މަޝްރޫޢު ކަމަށްވާ "ސޯލާ ސިޓީ" މަޝްރޫޢު ކުރިއަށް ގެންދަން ކެނެޑާގެ އެބްރެކްސަސް ޕަވަރ ކޯޕަރޭޝަންއާ އެކު އިންވެސްޓްމަންޓް އެއްބަސްވުމެއްގައި ރަސްމީކޮށް ސޮއިކޮށްފިއެވެ.
މި އެއްބަސްވުމުގައި ސޮއިކުރެވުނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިންގަޕޫރަށް ކުރައްވާ ރަސްމީ ދަތުރުފުޅުގައި ރާއްޖެ-ސިންގަޕޫރު ބިޒްނަސް ފޯރަމްގެ ތެރެއިންނެވެ.
ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ ފަތުރުވެރިކަމާއި ތިމާވެށީގެ ވަޒީރު ތޯރިޤް އިބްރާހީމް އެވެ. އަދި އަބްރަކްސަސްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ޖޭމްސް ކޯލްޓާ އެޑީ އެވެ.
"ސޯލާ ސިޓީ" މަޝްރޫޢުގެ ދަށުން 100 މެގަވޮޓުގެ ސޯލާ ހަކަތަ އުފެއްދުމަށް ހަމަޖެހިފައިވެއެވެ. މިއީ ދިވެހިރާއްޖެ ތެލަށް ކުރާ ޚަރަދު ކުޑަވެގެންދާނެ ކަމަށް ސަރުކާރުން ބުނެއެވެ. އެގޮތުން، މި މަޝްރޫޢުގެ ސަބަބުން ކޮންމެ އަހަރަކު ގާތްގަނޑަކަށް 42 މިލިއަން އެމެރިކާ ޑޮލަރުގެ ތެލުގެ ޚަރަދު ސަލާމަތް ކުރެވޭނެ ކަމަށް ސަރުކާރުން އަންދާޒާ ކޮށްފައިވެއެވެ.
މި މަޝްރޫޢު 2027 ވަނަ އަހަރުގެ ނިޔަލަށް ނިންމާލެވޭނެ ކަމަށް ސަރުކާރުން ބުނެއެވެ.
މި މަޝްރޫޢުއަކީ 2028 ވަނަ އަހަރުގެ ނިޔަލަށް ޤައުމުގެ ކަރަންޓުގެ 33 އިންސައްތަ އިއާދަކުރަނިވި ހަކަތައަށް ބަދަލުކުރުމަށް ރައީސް މުޢިއްޒު އިއުލާންކުރައްވާފައިވާ މަޝްރޫއުގެ ދަށުން ހިންގާ މަޝްރޫއެކެވެ.
"ސޯލާ ސިޓީ" އެއްބަސްވުމުގެ އިތުރުން، ރާއްޖޭގެ ސަރުކާރުން ވަނީ ރެސިޑެންސް އަދި ރައްޔިތުކަން ލިބިގަތުމުގެ އިންވެސްޓްމަންޓް ޕްރޮގްރާމްތަކަށް ޚާއްސަވެފައިވާ ބައިނަލްއަޤްވާމީ ފަރާތެއް ކަމަށްވާ ހެންލީ އެންޑް ޕާޓްނާސްއާ އެކު އިންވެސްޓްމަންޓް ޚިދުމަތްތަކުގެ އެއްބަސްވުމެއްގައި ވެސް ސޮއިކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
