ތަސްލީމް ހޯދަން އިންޓަޕޯލް ޔެލޯ ނޯޓިސް ނެރެން އެދިއްޖެ

މާލެ އަތޮޅު ހުވަފެންފުށި ރިސޯޓު ކައިރީ އޮންނަ ފިނޮޅަކަށް ދަތުރު ގޮސް އުޅެނިކޮށް ގެއްލިގެން ހޯދަމުންދާ މ. އަސަރީ ހަނދާން، ތަސްލީމު މުހައްމަދު ހޯދުމަށް އިންޓަޕޯލް ޔެލޯ ނޯޓިސް ނެރެން އެދިފައިވާކަމަށް ފުލުހުން ބުނެފިއެވެ.

މިކަމާ ގުޅިގެން ފުލުހުން ނެރުނު ބަޔާނުގައި ބުނީ، މިއަދާ ހަމަޔަށް ކުރެވުނު މަސައްކަތުންވެސް ތަސްލީމުގެ ހަބަރެއް ނުވާކަމަށާއި މިހާތަނަށް އެމްއެންޑީއެފުންގެ ކޯސްޓްގާޑުން  943،998 އަކަމީޓަރުގެ ބޮޑު ސަރަހައްދެއް ޑައިވްކޮށްގެންވެސް ބަލާފައިވާކަމަށެވެ.

ތަސްލީމު މުހައްމަދު ގެއްލިފައިވާ ކަމަށް ފުލުހުންނަށް ރިޕޯޓުކޮށްފައިވަނީ މިދިޔަ މަހުގެ 30 ވަނަ ދުވަހުގެ 13:20 އެހާ ކަން ހާއިރު ކަމަށާއި އެހާހިސާބުން ތަސްލީމުގެ އެއްވެސް މައުލޫމާތެއް ލިބޭތޯ ފުލުހުން މަސައްކަތް ފަށާފައިވާކަމަށެވެ.

ފުލުހުން ބުނީ ތަސްލީމް ދަތުރު ގޮސްފައި ވަނީ އޭނާ ހިމެނޭހެން 25 މީހުންނާއި ދެ ކުޑަކުދިންނާއެކު، މިދިޔަ މަހުގެ 29 ވަނަ ދުވަހު 17:00އާއި 17:30އާ ދޭތެރޭގެ ވަގުތެއްގައި ކަމަށާއި އެ ދަތުރުގައި އޭނާ ބައިވެރިވީ ދަތުރު ރޭވި މީހުންގެ ރައްޓެހިކަމުގައ ކަމަށެވެ. އޭނާ އެ ދަތުރުގައި ބައިވެރިވެފައިވަނީ ދަތުރުގެ ތެރެއިން ކުރިއަށްގެންދިއުމަށް ނިންމާފައިވާ އުފަންދުވަހާއި އެންގޭޖްމެންޓް ޕާޓީއެއް ފާހަގަކުރުމަށް ޕާޓީގެ ބެކްޑްރޮޕް އަދި ލައިޓިންގެ ކަރަންޓުގެ މަސައްކަތް ކުރުމަށް ކަމަށް ފުލުހުންގެ ތަހުގީގަށް އެނގިފައިވާ ކަމަށް ވެސް އެ ބަޔާނުގައިވެއެވެ.

ނޫސްބަޔާނުގައި ފުލުހުން ބުނީ ތަސްލީމް ގެއްލުނު މައްސަލައިގެ ތަހުގީގުގައި ފަސްގަނޑަށް އޭނާއާއި އެކު ދަތުރު ދިޔަ 25 މީހުންގެ އިތުރުން އިތުރު ގުރޫޕެއްގައި ހިމެނޭ 12 މީހުންނާއި ސުވާލުކޮށްފައިވާ ކަމަށާއި އޭނާ ބޭނުންކުރާ ފޯނާއި ލެޕްޓޮޕް ފޮރެންސިކް ތަހުލީލު ކުރުމުގެ މަސައްކަތް ފަށާފައިވާ ކަމަށެވެ.

ފުލުހުން ބުނީ އެ މީހުން ފަސްގަނޑަށް ދިޔައިރު އިތުރު ބަޔަކު ވެސް ފަސްގަނޑުގައި ތިބި ކަމަށާއި އޭނާ އެތަނުގައި ހުއްޓާ އެންމެ ފަހުން ފެނިފައި ވަނީ މިދިޔަ މަހުގެ 30 ވަނަ ދުވަހުގެ ހެނދުނު 7:45އާއި 9:00އާ ދެމެދު ކަމަށެވެ. އަދި އޭނާ މާލެ ދާން ބޭނުންވާ ކަމަށް ބުނެފައި އޮތުމުން، އެ ދުވަހުގެ 10:00 އާއި 11:00އާ ދެމެދު މާލެ ފުރި ލޯންޗުގައި އޭނާ މާލެ ފޮނުވާލުމަށް ދަތުރުގެ ބައިވެރިން އޭނާ ހޯދުމުން ފެނިފައިނުވާތީ އެ މީހުން އޭނާގެ އާއިލާއަށް ގުޅާފައިވާ ކަމަށް ތަހުގީގަށް އެނގިފައިވާ ކަމަށް ވެސް ފުލުހުން ބުނެއެވެ.

ފުލުހުން ބުނީ ތަސްލީމާއި އިތުރު ބަޔަކު ދަތުރު ދިޔުމަށް ބޭނުން ކުރި ދެ ލޯންޗަކާއި މާލޭގައި އޭނާ އާންމުކޮށް ގޮސް އުޅޭ ސަރަހައްދުތަކާއި ތަންތަން ބަލައި ފާސްކޮށްފައިވާ ކަމަށް ވެސް ފުލުހުންގެ ބަޔާނުގައި ބުނެފައިވެއެވެ.

ތަސްލީމް ހޯދުމަށް އިންޓަޕޯލު ޔެލޯ ނޯޓިސް އަށް އެދިފައިވާ ކަމަށާއި މި މައްސަލަ ފުލުހުން ތަހުގީގު ކުރަމުންދާއިރު މި މައްސަލަ އާއި ގުޅޭ ގޮތުން އޭނާގެ އާއިލާއާއި ފުލުހުން ބައްދަލުކޮށް މައުލޫމާތު ސާފުކޮށް ތަހުގީގު ކުރިއަށް ދާ ގޮތުގެ މައުލޫމާތު އާއިލާ އާއި ހިއްސާ ކުރަމުންދާ ކަން ފުލުހުންގެ ބަޔާނުގައި ބުނެފައިވެއެވެ.