ހެނބަދޫ ފިޓްނެސް އެންޑް ރިކްރިއޭޝަން ސެންޓަރާއި މިސްކިތުގެ ބިންގާ އަޅައިފި

ނ. ހެނބަދޫ ފިޓްނެސް އެންޑް ރިކްރިއޭޝަން ސެންޓަރާއި މިސްކިތުގެ ބިންގާ އަޅައިފިއެވެ.

މި ދެ ތަނުގެ ބިންގާ އަޅާފައިވަނީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އާއި ސަރުކާރުގެ އިސްވެރިން ނ އަތޮޅަށް މިހާރު ކުރައްވަމުންދާ ދަތުރުފުޅުގެ ތެރެއިން މިއަދު ހެނބަދޫއަށް ވަޑައިގެންނެވެ.

މި ދެ މަޝްރޫޢުވެސް ހަވާލުކޮށްފައިވަނީ ފެނަކަ ކޯޕަރޭޝަނާއެވެ.

އެގޮތުން، ހެނބަދޫ މިސްކިތުގެ ބިންގާ އަޅުއްވައި ދެއްވީ، އިސްލާމިކް މިނިސްޓަރ ޑރ މުޙައްމަދު ޝަހީމް ޢަލީ ސަޢީދެވެ.

500 މީހުންގެ ޖާގައިގެ މި މިސްކިތް ނިމިގެންދާއިރު މިސްކިތުގައި ސޯލާ ހަރުކުރެވި، އޭސީ ކުރުމަށް ހަމަޖެހިފައިވާއިރު މިސްކިތުގައި ލައިބްރަރީއަކާއި ކުލާސްރޫމެއް ހިމެނޭނެކަމަށް މިނިސްޓްރީން ބުނެއެވެ.

11,616,359.76 ރުފިޔާގެ މި މަޝްރޫޢު ފެނަކައާ ހަވާލުކޮށްފައިވަނީ އެއް އަހަރުދުވަހުގެ ތެރޭގައި ނިންމާ ގޮތަށެވެ.

ހެނބަދޫ ފިޓްނަސް އެންޑް ރެކްރިއޭޝަން ސެންޓަރު (އެފްއާރުސީ) އިމާރާތުގެ ބިންގާ އަޅުައްވައި ދެއްވީ ސްޕޯޓްސް މިނިސްޓަރ އަބްދުالله ރާފިޢު އެވެ.

މިނިސްޓްރީން ބުނީ، މިއީ ރާއްޖޭގެ މީހުން ދިރިއުޅޭ ހުރިހާ ރަށެއްގައި ފިޓްނަސް އެންޑް ރެކްރިއޭޝަން ސެންޓަރުތައް ޤާއިމްކުރުމަށް   ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅާއި އެއްގޮތަށް ކުރިއަށްގެންދާ މަޝްރޫއުއެއް ކަމަށެވެ.