ވަޒީރު އަލީ އިހްސާނަށް ވޯޓު ދިނީ ތާއިދުކުރާތީއެއް ނޫން؛ އެއީ ހެދުނު ގޯހެއް: މުހައްމަދު އިބްރާހިމް

އިއްޔެ ރައްޔިތުންގެ މަޖިލީހުގައި ސަރުކާރުން ކެބިނެޓަށް އަލަށް އައްޔަނުކުރި ވަޒީރުންނަށް ރުހުން ދިނުމަށްޓަކައި ނެގި ވޯޓުގައި، ވަޒީރު އަލީ އިހްސާނަށް ވޯޓު ދިނީ ތާއިދުކުރާތީއެއް ނޫންކަމަށާއި އެއީ ހެދުނު ގޯހެއް ކަމަށް ގަލޮޅު އުތުރު ދާއިރާގެ މެންބަރު އިބްރާހިމް މުހައްމަދު (ކުޑޫ) ވިދާޅުވެއްޖެއެވެ.

ކުޑޫ މިހެން ވިދާޅުވެފައިވަނީ، މިއަދު އޭނާ އެކްސްގައި ކުރި ޕޯސްޓަކުންނެވެ.

ކުޑޫ ވިދާޅުވި ގޮތުގައި، އިއްޔެ އޮތް ވަޒީރުންގެ މަޖިލީހަށް ރުހުން ދިނުމުގެ ވޯޓުގައި ހޯމް މިނިސްޓަރ އަލީ އިހުސާނަށް ވޯޓު ދިނުމުގައި އޭނާއަށް ހެދުނީ ވަރަށް ބޮޑު ގޯހެކެވެ. އަދި އޭނާ ވަނީ އެކަން ގަބޫލުކުރާ ކަމަށްވެސް ވިދާޅުވެފައެވެ.

މީގެ އިތުރުން ކުޑޫ ވިދާޅުވީ، އެ ވަގުތު އެކަމާ މެދު އެންމެ ފުންކޮށް ނުވިސްނާ އަމަލުކުރެވުނީތީ، އެކަމަށްޓަކައި އޭނާ އިޚުލާޞްތެރިކަމާއެކު މާފަށް އެދޭކަމަށެވެ. އަދި އެކަން ބަލައިގަތުމަކީ އުނދަގޫކަމެއްކަން އޭނާއަށް އިނގޭކަމަށްވެސް ކުޑޫ ވަނީ ވިދާޅުވެފައެވެ. ކުރިޔަށް އޮތް ތަނުގައި މިފަދަ ކަންކަން ތަކުރާރު ނުވާނޭގޮތަށް އަމަލުތައް ބަހައްޓާނޭ ކަމުގެ ޔަޤީންކަން ކުޑޫ ވަނީ އަރުވާފައެވެ.

ކުޑޫ އެކްސްގައި ކުރި ޕޯސްޓް

އިއްޔެ ކުޑޫގެ އިތުރުން އެމްޑީޕީގެ ޕީޖީ ގްރޫޕްގެ ޖުމްލަ 8 މެންބަރަކު ވަނީ ވަޒީރު އިހްސާނަށް ރުހުން ދެއްވާފައެވެ. މިކަމާއި ގުޅިގެން އެމްޑީޕީގެ އާންމު ގިނަ މެންބަރުން ދަނީ ކަންބޮޑުވުން ފާޅުކުރަމުންނެވެ. އެގޮތުން، ގިނަ ބަޔަކު ފާހަގަކުރާ ގޮތުގައި، އެ މީހުން އެމްޑީޕީއާއި ގުޅުނީ އެއީ އެމްޑީޕީއަކީ އޮޕޮޒިޝަން ޕާޓީއަށް ކަމުގައި ވާތީއެވެ. އަދި އެމްޑީޕީން ސަރުކާރުގެ ކަންތައްތަކައް ތާއިދުކުރުމަކީ ވަރަށް ދެރަކަމެއްގެ ގޮތުގައި ގިނަ ބަޔަކު ދަނީ ފާހަގަކުރަމުންނެވެ.