މިދިޔަ އަހަރަކީ މާފަރު އެއާރޕޯޓަށް ރެކޯރޑު އަދަދަކަށް ޖެޓް އައި އަހަރެއް

ނިމިގެން މިދިޔަ 2023 ވަނަ އަހަރަކީ މާފަރު އެއާރޕޯޓަށް ރެކޯރޑު އަދަދަކަށް ޕްރައިވެޓް ޖެޓް އައި އަހަރެއްކަމަށް ތަފާސް ހިސާބުތަކުން ދައްކައިފިއެވެ.

އައިލެންޑު އޭވިއޭޝަނުން އާއްމުކޮށްފައިވާ ތަފާސް ހިސާބުތަކުން އެނގޭގޮތުގައި މިދިޔަ އަހަރުތެރޭ އެ އެއަރޕޯޓަށް 353 ޕްރައިވެޓް ޖެޓް ޖައްސާފައިވާއިރު މިއީ 2022 ވަނަ އަހަރަށްވުރެ 125 ޖެޓުގެ އިތުރުވުމެކެވެ.

ރާއްޖޭގައި ހިމެނޭ އެންމެ މަތީފަންތީގެ ގިނަ ރިސޯރޓުތަކެއް އެކުލެވޭ ނ. އަތޮޅުގައި އޮންނަ މާފަރު އިންޓަރނޭޝަނަލް އެއަރޕޯޓު މެދުވެރިކޮށް މިދިޔަ އަހަރު 1934 ފަތުރުވެރިން ރާއްޖެއަށް އެތެރެވެފައިވާ އިރު 2082 ފަތުރުވެރިން ރާއްޖެއިން ބޭރަށް ދަތުރުކޮށްފައި ވާކަމަށް އައިލެންޑު އޭވިއޭޝަނުން އާއްމުކޮށްފައިވާ ތަފާސް ހިސާބުތަކުން ދައްކައެވެ.

މި ތަފާސް ހިސާބުތަކުން އެނގޭ ގޮތުގައި މާފަރު އިންޓަރނޭޝަނަލް އެއަރޕޯޓު މެދުވެރިކޮށް އެންމެ ގިނަ އަދަދަކަށް ރާއްޖެއަށް އެތެރެވެފައިވަނީ ޔޫރަޕުގެ ފަތުރުވެރިންނެވެ. ދެވަނައަށް އެންމެ ގިނަ އަދަދަކަށް އައިސްފައިވަނީ މެދުއިރުމަތީގެ ޤައުމުތަކުގެ ފަތުރުވެރިންނެވެ.

މާފަރު އެއާރޕޯޓް ހުޅުވާފައިވަނީ 2019 ވަނަ އަހަރުއެވެ. އެހެން ނަމަވެސް އެ އެއާރޕޯޓް އިންޓަރނޭޝަނަލް އެއަރޕޯޓެއްގެ ގޮތުގައި ބޭނުންކުރަން ފަށާފައިވަނީ 1 ޖުލައި 2020 ވަނަ ދުވަހުން ފެށިގެންނެވެ.

ސަރުކާރުން ދަނީ މާފަރު އެއާރޕޯޓު އިތުރަށް ތަރައްޤީކުރުމުގެ ބިޔަ މަޝްރޫއެއް ހިންގަމުންނެވެ. މި މަޝްރޫއު ނިމޭއިރު ރަންވޭ އަށް 650 މީޓަރު އިތުރުކުރެވި، ރަންވޭގެ ދިގުމިން 2800 މީޓަރަށް ބޮޑުކުރެވިގެން ދާނެއެވެ. އޭރުން ބައިނަލްއަޤްވާމީ އުދުހުންތަކުގައި ބޭނުންކުރާ ބޮއިންގ 777 މަރުކާގެ މަތިންދާބޯޓުތަކަށް ވެސް ރަންވޭއަށް ޖެއްސޭނެއެވެ.

މިހާރު މާފަރު އެއަރޕޯޓު ތަރައްޤީކޮށްފައި ވަނީ، ބައިނަލްއަޤުވާމީ ވައިގެ ދަތުރުފަތުރުގައި އެންމެ އާއްމުކޮށް ބޭނުންކުރާ އެއާބަސް އޭ320 އާއި ބޮއިން 737ގެ ބޯޓުތަކަށް ޖެއްސޭ ގޮތަށެވެ.