އެންމެ ގިނައިން ހޭދަ ކުރަންޖެހެނީ ބިހޭވިއަރ ތެރަޕީއަށް: އެންސްޕާ

ދައުލަތުގެ އެހީގައި ރާއްޖޭގައި ދެމުން އަންނަ ތަފާތު ތެރަޕީތަކުގެ ތެރެއިން އަދިވެސް އެންމެ ބޮޑު ހޭދައެއް ކުރަންޖެހެނީ ބިހޭވިއަރ ތެރަޕީއަށް ކަމަށް ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ ތަފާސްހިސާބުތަކުން ދައްކައިފިއެވެ.

އެންސްޕާއިން އެންމެ ފަހުން އާންމުކޮށްފައިވާ މާލީ ރިޕޯޓުތަކަށް ބަލާއިރު، އެ އިދާރާއިން ތެރަޕީތަކަށް ކުރާ ހޭދައިގެ އެންމެ ބޮޑު ބައެއް ހިއްސާކުރަނީ ބިހޭވިއަރ ތެރަޕީއެވެ. އެގޮތުން، ނިމިދިޔަ އޮގަސްޓް މަހު އެކަނިވެސް ތަފާތު އެކި ތެރަޕީތަކަށް އެންސްޕާއިން ޖުމްލަ 8.1 މިލިއަން ރުފިޔާ ހޭދަކޮށްފައިވާއިރު، އޭގެ ތެރެއިން 2.7 މިލިއަން ރުފިޔާ ހޭދަވެފައިވަނީ ބިހޭވިއަރ ތެރަޕީތަކަށެވެ.

މީގެ އެއް އަހަރު ކުރީގެ ތަފާސްހިސާބުތަކަށް ބެލި ނަމަވެސް އެންމެ ބޮޑު ޚަރަދެއް ހިނގާފައިވަނީ މި ބާވަތުގެ ތެރަޕީއަށެވެ. އެގޮތުން މިދިޔަ އަހަރުގެ އޮގަސްޓް މަހު ތެރަޕީތަކަށް އެންސްޕާއިން 7.7 މިލިއަން ރުފިޔާ ހޭދަކުރިއިރު، ބިހޭވިއަރ ތެރަޕީއަށް 1.9 މިލިއަން ރުފިޔާ ވަނީ ޚަރަދުކޮށްފައެވެ.

އެންސްޕާގެ ހިސާބުތައް ދައްކާގޮތުން ބިހޭވިއަރ ތެރަޕީގެ އިތުރުން ދެން އެންމެ ގިނައިން ފައިސާ ހޭދަކުރަންޖެހެނީ އޮކިއުޕޭޝަނަލް ތެރަޕީ އަދި ސްޕީޗް ތެރަޕީ އަށެވެ.

ދައުލަތުގެ ބައިތުލްމާލުން ތެރަޕީތަކަށް މިފަދަ ބޮޑު ހޭދައެއް ކުރަމުން އަންނައިރު، ނުކުޅެދުންތެރިކަން ހުންނަ ކުދިންނަށް ބޭނުންވާ ތެރަޕިއުޓިކް ޚިދުމަތްތައް ފޯރުކޮށްދޭ ތަންތަނުގެ ފެންވަރު ބެލޭނެ ހަރުދަނާ ނިޒާމެއް އަދި މިހާތަނަށް ގާއިމުކުރެވިފައެއް ނުވެއެވެ.

މިދިޔަ އަހަރުގެ އޭޕްރީލް މަހުގެ ތެރޭގައި ރައްޔިތުންގެ މަޖިލީހުގެ ޕެޓިޝަން ކޮމިޓީގައި ވާހަކަދައްކަވަމުން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ސްޓޭޓް މިނިސްޓަރު އަހުމަދު އާތިފް ވިދާޅުވެފައިވަނީ، 2019 ވަނަ އަހަރުން ފެށިގެން މި ޚިދުމަތްތަކަށް ފައިސާ ދޫކުރަމުން އައި ނަމަވެސް، ތެރަޕީތަކުގެ ފެންވަރު ވަޒަންކުރެވޭނެ ވަކި އުސޫލުތަކަކާއި މިންގަނޑުތަކެއް އެކުލަވާލެވިފައި ނެތް ކަމަށެވެ. މިކަމާ ގުޅޭ އުސޫލުތައް އެކުލަވާލުމުގެ މަސައްކަތް މިނިސްޓްރީ އޮފް ހެލްތާ ގުޅިގެން ކުރިއަށްދާ ކަމަށް އެ ދުވަހު އޭނާ ފާހަގަކުރެއްވި ނަމަވެސް، އެ މަސައްކަތް އެއްކޮށް ނިމުނުކަން ކަމާބެހޭ އެއްވެސް އިދާރާއަކުން މިހާތަނަށް ހާމަކޮށްފައެއް ނުވެއެވެ.