ބްރޯޑްކޮމްގެ މެމްބަރު ކަމަށް ޒަމްއަތު އައްޔަނު ކުރަން މަޖިލީހުން ފާސްކޮށްފި

މޯލްޑިވްސް ބްރޯޑްކާސްޓިންގ ކޮމިޝަނުގެ މެމްބަރުކަމަށް ޒަމްއަތު އަހްމަދު ވަހީދު އައްޔަނުކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

ބްރޯޑްކޮމްގެ މެމްބަރުކަމުގެ މަގާމަށް ބޭފުޅަކު އައްޔަނުކުރުމަށް ރައީސުލްޖުމްހޫރިއްޔާ ފޮނުއްވެވި ނަންތަކުގެ ތެރެއިން އެންމެ މަތިން މާކުސް ލިބިފައިވަނީ ޒަމްއަތެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި ޒަމްއަތު ބްރޯޑްކޮމްގެ މެމްބަރުކަމަށް އައްޔަނުކުރަން ފެންނަ ކަމަށް 56 މެމްބަރުން ވަނީ ވޯޓް ދެއްވާފައެވެ. ނުފެންނަކަމަށް އެއްވެސް މެމްބަރަކު ވޯޓް ދެއްވާފައެއް ނުވެއެވެ. ބްރޯޑްކޮމްގެ މެމްބަރުކަމަށް އައްޔަނުކުރުމަށް ފާސްކުރި ޒަމްއަތު މިވަގުތު ހުންނެވީ އިސްލާމިކް މިނިސްޓްރީގެ ޗީފް އެގްޒެކްޓިވް އޮފިސަރިގެ މަގާމުގައެވެ.

ބްރޯޑްކާސްޓިން ކޮމިޝަނަށް ކުރިމަތިލި ފަރާތްތަކާ މިނިވަން މުއައްސަސާތަކާ ބެހޭ ކޮމެޓީން ވަނީ މިދިޔަ ބުރާސްފަތި ދުވަހު އިންޓަވިއު ކޮށްފަ އެވެ. އެއީ ޒަމްއަތު އަހްމަދު ވަހީދު، ޒީނާ ޒާހިރު، ޝިމްލާ އަހުމަދު، އަޝްރަފް އަލީގެ އިތުރޔުން އަލީ ޔޫސުފެވެ.

މީގެ ތެރެއިން 3 ކެނޑިޑޭޓުންގެ ޝަރުތު ހަމަވިއިރު، ކޮމެޓީގެ ނިންމުމުގައި ކުރީގައި އޮތީ ޒަމްއަތު އެވެ. ޒަމްއަތަށް 89.29 މާކުސް ލިބިފައިވެ އެވެ. ބްރޯޑްކާސްޓިން ކޮމިޝަންގެ މެންބަރު ކަމަށް ކުރީން ހުޅުވާލުމުން އެންމެ މަތީން މާކުސް ލިބުނު ޒީނާއަށް މި ފަހަރު ކޮމެޓީން ދިނީ 84.57 މާކުސް އެވެ.

ބްރޯޑްކޮމްގެ މެމްބަރުކަމަށް ހުޅުވާލާފައިވަނީ ކުރީގެ މެންބަރު އާމިނަތު އަމީނާގެ ދައުރު މިމަހުގެ 14 ވަނަ ދުވަހު ހަމަވުމާއި ގުޅިގެންނެވެ. ބްރޯޑްކޮމްއަކީ 7 މެމްބަރުންގެ މައްޗައް އެކުލެވޭ ކޮމިޝަނެކަށްވާއިރު، ބްރޯޑްކޮމްއަށް މެންބަރުން އައްޔަން ކުރެވެނީ 5 އަހަރު ދުވަހުގެ ދައުރަކަށެވެ.

ބްރޯޑްކޮމްގެ މެމްބަރުންގެ ގޮތުގައި މިވަގުތު ތިއްބެވި ބޭފުޅުންގެ ތެރޭގައި ހިމެނެނީ އެ ކޮމިޝަނުގެ ރައީސާ ޞަފާ ޝަފީޤާއި، ނައިބު ރައީސާ ޝިފްލާ އިބްރާހީމްއެވެ. އެކޮމިޝަންގެ މެންބަރުންގެ ގޮތުގައި ތިއްބެވީ އާމިނަތު ނުޒުހާއާއި، މުޙައްމަދު އަބްދުﷲ އާއި އަޙުމަދު ރިޟްވާނުގެ އިތުރުން އާމިނަތު ޞަރާޙަތު ޢިއްޒަތެވެ.