Advertisement

އާރްޓީއެލް ބަހުގެ ހިދުމަތާއެކު ދަރިވަރުުންގެ ބޮޑު ކިއުތަކަށް ނިމުމެއް

16 Jun 2022 | 13:41

ހުޅުމާލޭ ދެވަނަ ފިޔަވައްސަކީ މިއަދު 30،000 ވުރެ ގިނަ މީހުން ދިރިއުޅެމުން އަންނަ ސަހަރެކެވެ. އެތަނުގައި އަޅާފައިވާ 25 ބުރީގެ 16 ޓަވަރުގައި އެތައް ސަތޭކަ އާއިލާއެއް ދިރިއުޅެމުން އަންނައިރު، ހިޔާ ސަހަރަށް ބޭނުންވާ އަސާސީ ގިނަ ކަންކަން އަދިވެސް ފުރިހަމަވެފައެއް ނުވެއެވެ. ކުޑަކުދިން ހިތްހަމަޖައްސާލަންދާނެ ޕާކެއް، ފައިސާ ނަގާނެ އޭޓީއެމްއެއް، ރަނގަޅު ރެސްޓޯރެންޓެއް ނެތެވެ. އެންމެ ބޮޑު ދައްޗަކަށް އޮތީ، ޕަބްލިކް ޓްރާންސްޕޯޓުގެ ދަތިކަމެވެ.

ހިޔާގައި މީހުން ދިރިއުޅެން ފެށިއިރު ސަހަރުގައި ޕަބްލިކް ޓްރާންސްޕޯޓެއް ނެތެވެ. އެމްޓީސީސީން ދެމުން އަންނަ ބަހުގެ ހިދުމަތް ދެވަނަ ފިޔަވައްސަކަށް އެއިރު ނުކުރެއެވެ. ނަމަވެސް ހިޔާ ސަރަހަކީ އެތައް ހާސް ދަރިވަރުންނެއްވެސް ދިރިއުޅެމުން އަންނަތަނަކަށް ވުމާއި އެ ސަހަރުގައި ސްކޫލެއް ނެތި، އެހެން ސްކޫލުތަކަށް ކުދިން ގެންދަން ޖެހޭތީ އޮތް ތަކުލީފަށް ތަސައްލީއެއް ގެނެސްދިއުމަށް އެމްޓީސީސީން ވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ގުޅިގެން އެ ސަރަހައްދުގައި ބަސް ސްޓޮޕްތަކެއް ގާއިމްކޮށް ބަހުގެ ހިދުމަތްތައް ދޭން ފަށާފައެވެ. ނަމަވެސް އެއީ ގަޑިއިރަކުން އެއް ފަހަރުއެވެ. އެކަމުގެ ސަބަބުން އެ ސަހަރުގައި ދިރިއުޅޭ މީހުންނަށް ކޮންމެވެސް ވަރެއްގެ ހިތްހަމަޖެހުމެއް ލިބުނު ނަމަވެސް އެއީ އެންމެ އެދެވޭ، ދަތުރުފަތުރުގެ ހިދުމަތެއް ކަމަށް އެ ސަހަރުގައި ދިރިއުޅޭ ރައްޔިތުން ގަބޫލެއް ނުކުރެއެވެ. އެހެންވެ، ހިޔާ ސަހަރަށް ފެންވަރު ރަނގަޅު އަދި އަވަސް ބަހުގެ ހިދުމަތެއް ފޯރުކޮށްދިނުމަށް، ސަރުކާރުން ދިޔައީ އެއިރުވެސް މަސައްކަތް ކުރަމުންނެވެ.

ހިޔާ ސަހަރަށް އަވަސް އަދި ފެންވަރު ރަނގަޅު ބަހުގެ ހިދުމަތެއް ދިނުމަށް އެމްޓީސީސީން ވަނީ އެކުންފުނީގެ ވަސީލަތްތައް އިތުރުކުރުމުގެ މަސައްކަތް މީގެ މަސްތަކެއް ކުރިން ފަށައިފައެވެ.

އެ މަސައްކަތުގެ ދަށުން މުޅިން އާ 15 ބަސް މިދިޔަ މޭ މަހުގެ ތެރޭގައި ވަނީ ރާއްޖެ ގެނެސް، އެ ބަސްތަކަށް ބޭނުންވާ މުވައްޒަފުން ތަމްރީނުކުރުކޮށް ދަތުރުތަކަށް ބަސްތައް ފައްކާކޮށްފައެވެ. ދެ ބުރިއަށް ހަދާފައި ހުންނަ 80 މީހުންގެ ޖާގައިގެ އެ ބަސްތަކާއެކު، ކޮންމެ ދިހަ މިނެޓަކާއި 15 މިނެޓަކުން ދަތުރުތައް އޮންނާނެ ކަމަށް އެމްޓީސީސީން އެއިރު ބުނެފައިވެއެވެ.

އެމްޓީސީސީން އާ ބަސްތައް ރާއްޖެ ގެނެވުމާއެކު އެ ބަސްތަކުން ހިދުމަތް ލިބިގަތުމަށް ފެންބޮވައިގެންފައިވާ ހިޔާ ސަހަރުގެ ރައްޔިތުންގެ ދިގު އިންތިޒާރަށް ނިމުމެއް އައީ، ރާއްޖެ ޓްރާންސްޕޯޓް ލިންކް"ގެ ބަހުގެ ހިދުމަތް އެ ސަހަރުގައި ރޭ ރަސްމީކޮށް ފެށުމާއެކުގައެވެ. "ރާއްޖެ ޓްރާންސްޕޯޓް ލިންކް"ގެ ބަހުގެ ހިދުމަތް ރަސްމީކޮށް އިފްތިތާހުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިކެވެ. ރައީސް ސޯލިހު ވަނީ، އެ ހިދުމަތް ފެށުމުން ހިޔާ ސަހަރުގައި ދިރިއުޅޭ ރައްޔިތުންނަށް ރަނގަޅު ބަހުގެ ހިދުމަތެއް ލިބޭނެ ކަމަށާއި ނަމަވެސް އަދިވެސް އެ ހިދުމަތް އިތުރަށް ފައްކާވާން ޖެހޭ ކަމަށް ވިދާޅުވެފައެވެ.

ފެންވަރު ރަނގަޅު ބަހުގެ ހިދުމަތާއެކު، ކިއޫގައި މީގެ ކުރިން ތިބޭ ތިބުން ވަނީ ނިމުމަކަށް އައިސްފައެވެ. ގަޑިނުޖެހި ދަރިވަރުންނަށް ސްކޫލަށް ދެވޭނެ ކަމުގެ ޔަގީންކަން މިވަނީ އާވެފައެވެ. ބަސް ޓާމިނަލްތަކުގެ ތޮއްޖެހުން މިވަނީ ކުޑަކުރެވިފައެވެ. އެންމެ ދިހަ މިނެޓުން އެމްޓީސީސީން މިހާރު އެދަނީ ދަތުރުތައް ބާއްވަމުންނެވެ. އެމްޓީސީސީގެ އުންމީދަކީ ހިޔާ ސަހަރަށް ފޯރުކޮށްދޭ ބަހުގެ ހިދުމަތުގެ ފެންވަރު އިތުރަށް ރަނގަޅުކޮށް މާލެ ސަރަހައްދުގައި އަވަސް ބަހުގެ ހިދުމަތެއް ގާއިމް ކުރުމެވެ.

ހިޔާ ސަހަރުގައި 70،000 މީހުންގެ އާބާދީއެއް ކުރިއަށް އޮތް ދުވަސްތަކުގައި އުޅޭނެ ކަމަށް ލަފާކޮށްފައިވާއިރު ހިޔާ ސަހަރަށް ބޭނުންވާ ހުރިހާ ކަންކަން ފުރިހަމަ ކުރުމަށް، ކުރަން ޖެހޭ މަސައްކަތްތައް ސަރުކާރުން އަދިވެސް އަންނަނީ ކުރަމުންނެވެ. އެގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުވެސް ވަނީ، 70،000 މީހުންގެ އާބާދީއަކަށް ބޭނުންވާ ހުރިހާ ކަމަކާއެކު ހިޔާ ސަހަރު ތަރައްގީކުރެވޭނެ ކަމަށް ވިދާޅުވެ، އެ ސަހަރުގެ ރައްޔިތުންގެ ދަތިތަކަށް ހައްުލު ހޯއްދަވައި ދެއްވާނެކަމަށް ވިދާޅުވެފައެވެ.

Advertisement

ކޮމެންޓް